Adwentnička ZSW zdobom rezimej
Adwentnička Zwjazka serbskich wuměłcow (ZSW) bě towarstwu lětsa zdobom přičina, minjene lěto retrospektiwnje rozjimać a wo wuhladach na přichod sej mysle wuměnjeć. Přiwšěm bu swjedźeń wězo tež kulturnje wobrubjeny.
Budyšin (SN/bn). Po witanju něhdźe 30 hosći wčera w Budyskej Röhrscheidtowej bašće zahaji předsyda ZSW Jan Bělk wječor z powšitkownej rozprawu wo dźěławosći towarstwa w zašłych dwanaće měsacach. Mjez druhim wuzběhny wón diskusijny rjad TracTare, w kotrehož wobłuku debatowachu čitarjo z awtorami aktualnych knihow na přikład Róže Domašcyneje, Benedikta Dyrlicha a Měrany Cušcyneje. Nimo toho naspomni lětušu hłownu zhromadźiznu Domowiny w Chrósćicach, na kotrejž zastupowaštaj ZSW delegataj Juro Mětšk a Křesćan Krawc, kaž tež přihotowanski zjězd festiwala Łužica w Zhorjelcu, na kotrymž je zwjazk wuměłcow „serbske zajimy z wuspěchom zastupował“. Dalšej wjerškaj běštej Bělkej spožčenje Myta Domowiny čłonce ZSW Jěwje-Mari Čornakec a wustajeńca Měrki Pawlikoweje w Drježdźanskim ministerstwje za wědomosć a wuměłstwo (SMWK).
Štó by sej to myslił?
Přestrjeń dale wudospołnjeja
Na arealu Čornochołmčanskeho Krabatoweho młyna ma pjekarnja nastać
Čorny Chołmc (SN/JaW). Přestrjeń Krabatoweho młyna w Čornym Chołmcu ma dale rosć. Prěnje plany za dalše rozšěrjenje je jednaćel towarstwa Krabatowy młyn Tobias Čižik minjeny pjatk na nowinarskej konferency rozłožił.
Jenož w měsće serbskej cyrkwi
Budyšin (SN/at). Swědki ewangelskeje serbskosće w Budyšinje a na wsach Michałskeje wosady je Trudla Malinkowa wobdźělnikam adwentnički župy „Jan Arnošt Smoler“ wčera w Budyskim Serbskim domje předstajiła. Domowinjenjo słyšachu pod aspektom lětušeje 400. róčnicy tuteje ewangelskeje serbskeje wosady wo stawiznach Michałskeje cyrkwje, wo zwonach z napisami w našej maćeršćinje a wo dalšich kedźbyhódnych faktach. Tak rěčeše referentka wo tym, zo bě tehdyši němski farar Rudolf Lange 1945 na kóncu Druheje swětoweje wójny serbske paramenty w Božim domje napołožić dał, zo bychu pólske a sowjetske wójska wo tu bydlacych Słowjanach zhonilia Michałsku cyrkej njezničili. Z njej a katolskej cyrkwju Našeje lubeje knjenje je Budyšin drje jeničke město z dwěmaj serbskimaj Božimaj domomaj, Trudla Malinkowa wuwjedźe.
Skupinarjo běchu za lětušu adwentničku zhromadne spěwanje namjetowali. Bywši wučer Gerald Hapač jich tuž wčera na klawěrje přewodźeše, zo bychu na zakładźe wupołoženych tekstow zymske a dohodowne pěsnje zanošowali.
Přirada by w měsće wunošniša była
Po cyłej Łužicy je dr. Susanne Hozyna znata jako wědomostnica Serbskeho instituta. Nimo slědźenskeho dźěła je skutkowanje dźěłoweho kruha za serbske naležnosće w Budyskej měšćanskej radźe z jeje mjenom wusko zwisuje. Dwě wólbnej periodźe běše wona jako měšćanska radźićelka najprjedy z mandatom zwjazkarstwa Pegasus-Budyšin direktnje a na to z mandatom CDU zdobom rěčnica tohole gremija. Byrnjež nowej měšćanskej radźe wjace njepřisłušała, je ta dr. Hozynu na swojim posedźenju minjeny tydźeń z najwjace hłosami wšitkich kandidatow jako wěcywustojnu wobydlerku do serbskeho dźěłoweho kruha wuzwoliła. Jeje bohate nazhonjenja dźě nochcedźa parować.
Zjawnu diskusiju klětu zahaja
Zwjazkowe předsydstwo Domowiny wo změnje wustawkow rěčało
Budyšin (SN/JaW). Starosće serbskich hudźbutwórcow, swoje nowe twórby w online-masce Towaršnosće za prawa hudźbnych předstajenjow a mechaniskeho rozmnoženja (Gema) hižo w maćeršćinje zapodać njemóc, bě mjez druhim tema zetkanja poradźowaceho wuběrka za serbske naležnosće w zwjazkowym ministerstwje nutřkowneho, kotrež přewjedźechu w nowembrje w Čornym Chołmcu. Wo tym informowaše předsyda Domowiny Dawid Statnik přitomnych na wuradźowanju jeje zwjazkoweho předsydstwa minjeny pjatk w Budyšinje.
Maja swoje žadanja za přiwzate
Wuprajenja nastupajo serbske zajimy w koaliciskim zrěčenju CDU, Zwjazka 90/Zelenych a SPD za zhromadne sakske knježerstwo w dobje 2019–2024 žněja w Domowinje kaž tež w Serbskim sejmje pozitiwny wothłós.
Budyšin (SN/at). Wšitke žadanja Domowiny na přichodnych koalicionarow su wobdźělene strony do swojeho knježerstwoweho programa zapřijeli, štož organizacija jara wita. „Hódnoćimy to jako politiske připóznaće našeho dotalneho dźěła, je pak nam tež nastork, zo pokročujemy ze swojim stronsce njewotwisnym a strony přesahowacym skutkowanjom“, wuzběhnje předsyda Dawid Statnik.
Wotměnjawy a hnujacy koncert
Njebjelčicy (BW/SN). Tójšto wjesnjanow a zajimcow z blišeje wokoliny přichwata předwčerawšim popołdnju do Njebjelčanskeje cyrkwje, hdźež je jich tamniši cyrkwinski chór z adwentnym koncertom wokřewił. Pod nawodom Chrystofa Mikławška je dźesać muži a 17 žonow a cappella woblubowane a přewažnje serbske dohodowne pěsnje a kěrluše cunjo a přitulnje zanjesło.
Z interimnej nawodnej dwójku
Budyšin (SN/JaW). Dr. Viktor Zakar njeje hižo nawoda Choćebuskeje wotnožki Rěčneho centruma WITAJ (RCW). To wobkrući předsyda Domowiny Dawid Statnik na pjatkownym wuradźowanju Zwjazkoweho předsydstwa Domowiny w Budyskim Serbskim domje. „Smy 25. nowembra zrěčenje z Viktorom Zakarom rozwjazali“, rjekny Statnik na naprašowanje SN. „K přičinam pak ničo rjec njemóžu.“ Nawodnistwo wukonja wotnětka muska dwójka, zdźěli na kromje wuradźowanja nawodnica RCW dr. Beata Brězanowa. „Interimnje staj je redaktor Płomjenja Bernd Melcher a rěčny pedagoga Alexander Draguła přewzałoj.“ Tež wona so k pozadkam njewupraji.
Stajnje optimistisce do přichoda zhladował
Zrudźaca powěsć je so minjeny tydźeń tež mjez Serbami srjedźneje Łužicy rozšěriła, zo je 16. nazymnika Werner Baumhöfer w starobje 72 lět zemrěł.
Sprawny, wotewrjeny a horliwy Serb, kiž bě stajnje wjesołeje mysle, narodźi so 5. winowca 1947. Wotrosće w serbskej katolskej swójbje w Pěskecach. Narodne a nabožne kubłanje je jeho myslenje a jednanje čas žiwjenja wobwliwowało. Po wuspěšnym złoženju srjedźneje zrałosće studowaše w Drježdźanach ratarstwo. Mjez serbskimi młodostnymi w tehdyšim Kamjenskim wokrjesu měješe wjele přećelow. Zo by z nimi dźěłać, so rozmołwjeć a jich nawjedować móhł, so tež zwólniwy wupraji přewzać dźěło we wokrjesnym wjednistwje SNM – młodźinskeje organizacije – w Kamjencu.
