Z Hórčanami „po swěće pućował“

wutora, 26. nowembera 2019 spisane wot:
Hórčanske wjesne towarstwo Při skale je minjeny pjatk swojich čłonow a dalšich wjesnjanow na přednošk Bena Bělka do rjaneje swjedźenskeje rumnosće na Weh­ner­tec statoku přeprosyło. Wjelelětny znaty moderator Serbskeho rozhłosa sćelaka MDR rozprawješe něhdźe 30 přitomnym na jara zajimawe wašnje wo swojich jězbach­ po swěće. We wjace hač 40 epizodach a k tomu přisłušnych fotach je Beno Bělk hosći na kuriozne a mjenje zwjeselace pućowanja po Iranje, Słowakskej, Chinje a Vietnamje sobu wzał. W Dubaiju bě samo Serba zetkał. Foto: Katharina Jurkowa

„Ta razna postawa mi nochce z hłowy“

pjatk, 22. nowembera 2019 spisane wot:

Na Maćičnej akademiji je superintendent Jan Malink wčera w Budyskim „Wjelbiku“ něhdźe dwaceći zajimcam wo Jaroměrje Hendrichu Imišu – mjez druhim załožer serbskeho homelitiskeho seminara – přednošował.

Budyšin (MCu/SN). Jan Malink započa swój zajimawy a nazorny přednošk z recitaciju soneta Jakuba Barta-Ćišinskeho z lěta 1897 „Za Hendrichom Imišom“. W basni jewja so charakterowe rysy Imiša, předstajace jeho awtoritarne, razne a zasakłe wašnje. W prěnim wjeršu rěka: „Ta razna postawa mi nochce z hłowy“. Na Lipšćanskej uniwersiće bě wón studentski rěčnik a zastupi 1841 do korpsa Lusatia. Wo nim prajachu, zo bě w bojach z tesakom a w pistolowych duelach druhim strašny. Na litografiji z lěta 1842 je widźeć mjez studentami jako „piwowy kral“.

Kulowske Bratrowstwo z hłownej zhromadźiznu

štwórtk, 21. nowembera 2019 spisane wot:

Kulow (aha/SN). Městopředsyda towarstwa Bratrowstwo Handrij Rab móžeše zawčerawšim wjace hač 30 čłonow na hłownej zhromadźiznje na Kulowskej farje­ witać. Spočatnje spominachu zhromadźeni, wuspěwawši Wótčenaš, na w rozprawniskej dobje zemrětych čłonow. Dale wuži Rab składnosć, gratulować štyrjom čłonam k 85tym a pjatnaćom ke kulowatym narodninam.

Namjetuje drastowy zwjazk

póndźela, 18. nowembera 2019 spisane wot:

Židźino (SN/at). We Wojerowskej wokolinje kaž tež w gmejnje Halštrowska Hola skutkuje telko drastowych skupin a towarstwow kaž w žanym dalšim regionje serbskeho sydlenskeho ruma. Na to je Wojerowčan Werner Bejma na njedawnym serbskim wječorku w Židźinom skedźbnił. Cyłki často kóždy za sebje dźěła­ja. Tohodla Bejma namjetowaše, takrjec jako třěšne zjednoćenstwo załožić Serbski drastowy zwjazk, kotryž za­jimy wjesnych skupin napřećo třećim zastu­puje. „Mam to za logiske“, rjekny předsyda Towarstwa k pěstowanju regionalneje kultury srjedźneje Łužicy.

Społnomócnjena za serbske nalež­no­sće města Wojerec a čłonka předsydstwa Serbskeje rejwanskeje skupiny Ćisk Gabriela Linakowa doda, zo dyrbjał tajki Serbski drastowy zwjazk status kraj­neho zwjazka měć. Chcedźa-li skupiny fachowemu zwjazkej přistupić, přińdźe za nje tuchwilu jeno Srjedźoněmski domizniski a drastowy zwjazk do prašenja. Jemu přisłu­šeja towarstwa z Berlina, Braniborskeje, Saksko-Anhaltskeje a Sakskeje. Ćišćenjo su w nim jenički serbski cyłk ze Sakskeje.

Nowy princowski por knježi

póndźela, 18. nowembera 2019 spisane wot:

Marcel II. a Christina II. ze „Zubneje skały“ nawjedujetaj 50. sezonu WCV

Njebjelčicy (AKR/SN). Lěto regentstwa princowskeho pora Michała III. a Christiny I. ze „Šmigetoniskej“ je so na sobotnym kapičkowym wječoru Serbskopazličanskeho karnewaloweho kluba (WCV) w Njebjelčanskej „Bjesadźe“ zakónčiło. WCV trjebaše tuž, kaž kóžde lěto, no­weho princa na čole.

Na wupředatej žurli wosadnicy dožiwichu wopytowarjo znowa rjany a wotměnjawy połdrahodźinski program. Po zaćahu škričkoweje gardy a rady jědnaćoch smědźeše so dotalny princowski por hišće raz prezentować, prjedy hač dyrbješe ceptar wotedać.

Ze zapalom předstajichu škrički „gardowu reju“ a slědował je skeč skupiny 0815 z Romanom Krječmarjom, Měrćinom Domšom a Tomašom Matku. Hósć z Baltiskeho morja pytaše delikatesu za swój restawrant z mórskimi specialitami. Dokelž dźeń a wjac wotpadkow morjo zanjerodźa, je jemu ćežko wšědnje dosć kulinariskich chłóšćenkow nałójić. Nadźija so tuž garnelow, kotrež wšak mjeztym w Njebjelčicach plahuja.

„Šorcuch, jaka, hutawka“ rěkaše dźěłarnička k hotowanju narodneje drasty předwčerawšim w Brětni, na kotruž bě Serbski drastowy forum přeprosył. Mějićelka Wojerowskeho Wjacsławkec drastoweho domu a sobuzałožerka Kirsten Bejmina je tam ze swojej dźowku Lisu pokazała, kak so dźěłowu drastu ewangelskich Serbow wokoło Wojerec woblěkać. Přitomni diskutowachu tam tež wo naležnosćach serbskeje narodneje drasty a wuměnjachu sej nazhonjenja. Foto: Gernot Menzel

Swěrna partnerka w Namysłowje

srjeda, 13. nowembera 2019 spisane wot:

Styki Domowinskeje župy „Michał Hórnik“ do pólskeho Namysłowa njewobeńdu tež tamniši měšćanski muzej. W zarjadnišću zhonja wopytowarjo wo serbskim narodnym prócowarju, nowinarju a spisowaćelu Janje Skali. Zo je trajna wustajeńca wo nim lěto wob lěto na informatiwnosći přibywała, je hłownje zasłužba Jadwigi Kaweckeje. Jako sobudźěłaćerka muzeja bě so wona zaměrnje tomule předmjetej wěnowała. Na přikład nawjaza styki ze Serbskim muzejom w Budyšinje, zo by přehladku z nowymi eksponatami wudospołnjała. Zwiski do Hornjeje Łužicy běchu jej dalši pohon, zajimcam tež wědu wo Serbach a Domowinje spřistupnić. Štož je jako přistajena muzeja za­počała, wona nětko jako wuměnkarka z wjeselom dale wjedźe.

W Kamjenskej župje so na lońšu kubłansku jězbu do Namysłowa rady dopominaja, hdźež su wobdźělnicy Jadwigu Kawecku jako swěrnu přewodnicu a organizatorku dožiwili. „Bjez jeje pomocy njeby wuprawa tak wuspěšna była“, stej sej županka Zala Cyžowa a regionalna rěčnica Katharina Jurkowa přezjednej.

Lětuši rjad zarjadowanjow skónčeny

srjeda, 13. nowembera 2019 spisane wot:

Rowno (JoS/SN). Z přazu su minjenu sobotu w Rownom lětušu sezonu zjawnych zarjadowanjow na tamnišim Njepilic statoku­ zakónčili. Dokelž bě chětro mokre a chłódne wjedro, wostachu čłonojo Rownjanskeho towarstwa Njelipic dwór mjenje abo bóle mjez sobu. Wšako je mjeztym tež po wjedrje nazyma. Kołwróty pak so přiwšěm pospochi wjerćachu. Přaza dźě je z tradiciju, wšojedne što so wonka póćmje stawa.

Štyri kołwróty so lětsa wjerćachu; dalšej – kompletnje zasadźomnej – móžachu sej zajimcy dokładnje wobhladać. Wšitke słušeja towarstwu Njepilic dwór. Znowa natwarili a sporjedźeli su je na iniciatiwu čłona towarstwa Manfreda Richtera z pomocu Helmuta Kurja z Blunja. Tak móža předźěłanje lenu dźensa zaso pokazować: Na kołwrótach nitki přadu a je na historiskich krosnach na płat tkaja. Krosna sobu sporjedźał je tohorunja Helmut Kurjo ze swojej fachowej wědu.

Na demonstraciji so wobdźělić

wutora, 12. nowembera 2019 spisane wot:

Budyšin (SN). Domowina namołwja wobydlerjow Łužicy, na demonstraciji za­jutřišim w Berlinje so wobdźělić. Zastupjerjo komunow regiona, kotrež su we Łužiskim kruhu zjednoćene, zarjadowanje organizuja. Jeho zaměr je sej žadać, zo zwjazkowe knježerstwo poručenja hladajo na kónčiny strukturneje změny skónčnje na wědomje bjerje. Dotal njeje Łužica w zakonju wo zesylnjenju struk­turow dosć wobkedźbowana. Tak měł so Zwjazk na přikład wo to prócować, zo sta­nu so brunicowe regiony ze spěchowanskim regionom EU.

Předsyda Domowiny Dawid Statnik namołwja, „ze zastupjerjemi komunow so solidarizować. Runja łužiskim komunam tež my Serbja zwěsćamy, zo naćisk zakonja naše namjety njewobkedźbuje. Tohodla wobroćamy so na wšěch Ser­bow a wšitkich, kotřiž su serbskemu ludej přichileni, na demonstraciji w Ber­linje so wobdźělić.“ Jeli so njeporadźi zajimy­ Łužicy w zakonju zakótwić, budźe ćežko ju jako žiwjenjahódnu dwu­rěčnu kónčinu zachować. Štwórtkowna demonstracija započnje so w 10 hodź. na forumje před kanclerskim zarjadom.

Skutkowanje chórow wobšěrne

štwórtk, 07. nowembera 2019 spisane wot:

Wojerecy (SN/JaW). Pětr Cyž wostanje předsyda Zwjazka serbskich spěwarskich towarstwow (ZSST). Jednohłósnje su zastupnicy čłonskich chórow jeho wčera we Wojerecach w zastojn­stwje wobkrućili.

Wolili su tež nowe předsydstwo. No­wa mě­stopředsydka za Hornju Łužicu je Lubina Žurec-Pukačowa. Jej poboku je městopředsyda za Delnju Łužicu Gerald Schön. Dalši čłonojo předsydstwa su Mónika Wenclowa (chór Meja), Sylwija Jancyna (chór Budyšin), Melanie Bulankowa (chór Lipa), Susann Herrmann (Žónski chór Lubin), Cornelia Vahder (Žónski chór Janšojce) a Janek Wowčer (muski chór Delany). Rozžohnowali su z předsydstwa Angeliku Häneltowu (chóra Me­ja)­. Wona gremij po 28lětnym skutko­wanju wopušći. Z wutrobnymi słowami a kwěćelom so jej wčera za wjelelětne dźěło dźakowachu. Häneltowa wupraji dźak Załožbje za serbski lud, bjez čejejež podpěry njebychu ZSST a jeho čłonske cyłki mnohe projekty přewjesć móhli.

Serbska debata

nowostki LND