Z wutworjenjom Zwjazka serbskich towarstwow a župow jako towarstwo před 30 lětami njebě po dotal płaćiwych wustawkach w Domowinje sobustawstwo jednotliwcow móžne. To móhło so nětko změnić, přihłosuja-li delegatki a delegaća hłowneje wólbneje zhromadźizny přichodnu sobotu w Slepom změnje Domowinskich wustawkow. Ćežišćo wobkrućenja tajkeho kroka měri so na zajimcow, kotřiž bydla zwonka Łužicy. Samo wo wutworjenju swójskeho cyłka Domowinjanow-Njełužičanow pod třěchu narodneje organizacije bě rěč na pjatkownej nowinarskej konferency. Sobustawstwo jednotliwcow zmóžnić je zasadnje prawy puć. Tele přeće je mnohe lěta njesłyšane wostało. Čłonstwo na mjenowany kruh wobmjezować pak zda so mi z widom na serbski sydlenski rum wobmjezowanje być. Bych čłonow-jednotliwcow tež w teritorialnych župach za wudospołnjenje měł. Wězo měli wone swoje wustawki tomu přiměrić. W Slepom móhli nastork k tomu dać. Axel Arlt

Chrósćicy (SN). Nowe předsydstwo župy „Michał Hórnik“ je so wčera na posedźenju w Chróšćanskim gmejnskim a kulturnym centrumje skonstituowało. Kaž regionalna rěčnica Domowiny za teritorij Kamjenskeje župy Katharina Jurkowa informowaše, su Zalu Cyžowu za městožupanku wuzwolili. Ze swojimi bohatymi nazhonjenjemi je wona nowej župance Dianje Wowčerjowej, swojej naslědnicy w zastojnstwje, poboku.

Předsydstwo je sej předewzało nazymu zetkanje chronikarjow a koło hotowarničow přewjesć, za winowc je župna tradicionalna kermuša planowana. Župa budźe tež aktiwnje k wopominanju Chróšćan zběžka składnostnje jeho 20. róčnicy přinošować. Kaž regionalna rěčnica rozłoži, přihotuja za to zarjadowanje spočatk noweho šulskeho lěta. Budźe-li móžno, chcedźa so tamniši Domowinjenjo rady na kubłansku jězbu składnostnje zarjadowanja na teritoriju župy Delnja Łužica podać. Domowina namołwja we wobłuku „Lěta župow“, kotrež so srjedź smažnika ze stoćinami załoženja župow zahaji, k wuměnje nazhonjenjow a myslow mjez Serbami wšelakich regionow.

Budyšin (SN/at). W swojej zestawje personelnje zesylnjene a womłodźene poda so předsydstwo Domowinskeje župy „Jan Arnošt Smoler“ Budyšin krótko do hłowneje zhromadźizny serbskeho třěšneho zwjazka do dalšeho narodneho dźěła. Po tym zo běchu čłonojo nawodneho gremija župy Klawsa Petrenca minjeny měsac rozžohnowali (SN rozprawjachu), kooptowachu Kita Hendricha z Barta nětko za naslědnika. Na wčerawšim posedźenju župneho předsydstwa, kotrež wotměchu znowa jako telefonowu konferencu, so Barćan prěni raz wobdźěli.

Njebjelčicy (SN). Předsyda spěchowanskeho towarstwa Serbskeho sejma Smy z.t. dr. Měrćin Wałda kritizuje wotpokazane institucionelne financowanje demokratisce wuzwoleneho serbskeho ludoweho zastupnistwa přez Załožbu za serbski lud. Rozsud jeje rady mjenuje wón „znowa bjez słyšenja tajnje schwaleny“.

Dokelž njewotpowěduje spěchowanski předmjet po měnjenju załožboweje rady „ani wopisanemu zaměrej załožby ani woli załožerjow“, rěka to za Wałdu, zo „wopokazuje so załožba z aktualnym wobzamknjenjom znowa jako statny kontrolny organ k cementowanju předdemokratiskeho statusa quo, pod se­lektiwnym njewobkedźbowanjom de­mokratiskich principow reprezentacije a wustawowych zarukow našeho stata“. Tale „wola załožerjow“ zwuraznja so za Wałdu zdobom „we wotstopnjowanju Domowiny wot korporacije zjawneho prawa na ryzy towarstwo“.

Serbski sejm pak sej žada, zakładne prawa samopostajowanja za serbski lud připóznać a zaručić, kotrež je zhromadna dźěłowa skupina pod nawodom zwjazkoweho ministerstwa nutřkowneho w lěće 2011 zdźěłała, kaž ze zdźělenki wuchadźa.