Wustup Saxonierow bě sobotu wjeršk lětušeho jubilejneho programa ...
Dale podpěru přilubili
Serbsku identitu Miłoraza tež na nowym stejnišću zachować
Rowno (SN/JaW). Łužiska energija hórnistwo AG a Łužiska energija milinarnje AG (LEAG) budźetej dale serbsku rěč a kulturu podpěrować. To je hłowny wuslědk wčerawšeje dźěłoweje rozmołwy zastupnikow energijoweju koncernow a Domowiny w Rownom, informowaše nowinski rěčnik třěšneho zwjazka Marcel Brauman wčera w medijowej zdźělence. Wo wysokosći lětneho spěchowanja pak wobě stronje kaž hižo cyłe minjene lěta tež nětkole dale mjelčitej.
Kelko smy hódni?
44 lět předsydari Wochožanskej Domowinskej skupinje
Dźensa swjeći w ródnych Wochozach bywša županka Běłowodźanskeje župy a wučerka na wuměnku Inga Nowakowa swoje wosomdźesaćiny. Wona bě so 13. februara 1940 Domelec ratarskej swójbje narodźiła. Hižo jako dźěćo bě pěknje serbowała. Wopyta Delnjoserbsku wyšu šulu w Choćebuzu, hdźež maturowaše. Na Serbskim pedagogiskim instituće w Budyšinje bě na wučerku wyšeho schodźenka za serbšćinu a rušćinu studowała a w Brězowce, Trjebinje a 27 lět na Hamorskej šuli wuwučowała.
Jako aktiwna Domowinjanka bě mnohe lěta čłonka župneho předsydstwa, bu 1995 za županku wuzwolena a wosta to hač do 2010. Wosebje je so w tutym času wo serbsku wučbu a zdobywanje dźěći za Witaj-pěstowarnje starała. Wot lěta 2001 do 2013 bě Inga Nowakowa tež čłonka Zwjazkoweho předsydstwa Domowiny. Wona je tohorunja do Serbskeje protyki a Serbskich Nowin dopisowała a přisłušeše čitarskej přiradźe SN.
Kamjenjakma noweho předsydu
Miłoćicy (SN/MiR). Sydom zajimcow su byli zwólniwe, přichodnej lěće w předsydstwje towarstwa za wuměłstwo a kubłanje Kamjenjak sobu skutkować. Mjez nimi běštaj tež dwaj Serbaj. Nowowólby běchu trěbne, dokelž bě dotalny předsyda Wieland Schild loni zastojnstwo złožił. Wjelelětny pokładnik Lukaš Delenk njeje hižo k wólbam nastupił. Nowy předsyda Kamjenjaka je Chróšćan Ignac Wjesela, jeho zastupjer je Hubert Lange a Maritta Mielhardt-Lange pokładnica. Thomas Nowak a Milenka Rječcyna skutkujetaj jako přisydnikaj. Ignac Wjesela rjekny: „Zajimuju so předewšěm za wobłuk permakultury. Kulturu mam za wažny wobstatk dźěła towarstwa. Na wutrobje leži mi tež, měć dobry poměr k ludźom w regionje a k tomu słuša tež nałožowanje serbšćiny w našim towarstwje Kamjenjak.“
Brigada znowa w Hejnicach
We Łužicy garnele pytał
Karnewalowe towarstwo před wjerškom 50. póstniskeje sezony
Njebjelčicy (AKR/SN). Na wosebite zarjadowanje k 50. sezonje Serbskopazličanskeho karnewaloweho towarstwa běchu minjenu sobotu wosebje wšitke dotalne princowske pory, něhdyše škrički a sobustawojo rady jědnaćoch do Njebjelčanskeje „Bjesady“ přeprošeni. Tam rěkaše hesło „WCV swjeći kulojće, 50 lět su pisane!“ Ze zaćahom tuchwilneho princowskeho pora Marcella II. a jeho princesny Christiny II. ze zubneje skały kaž tež dźěćacych princow Metoda a Józefa a princesny Lucije wulkotny wječor zahajichu. Škrički předstajichu ze zapalom nowu reju a holča garda prezentowaše so w nowych gardowych drastach. Nětko so runje tak rjenje frinkola kaž wulke škrički.
Na wšelakore wašnje „Doma a po puću“
Sejmikarjo maja wo swojich aktiwitach rěčeć
Njebjelčicy (SN/MiR). Něšto dlěje hač lěto Serbski sejm mjeztym wobsteji, skonstituowany 17. nowembra 2018 w Slepom. Iniciatoram je wón prěnje demokratiske zastupnistwo Serbow. Jeho 24 zapósłancow stara so wot toho časa wo zajimy Serbow w Hornjej, srjedźnej a Delnjej Łužicy. Dźěl z nich bě wčera do Njebjelčic přijěł, zo bychu zhromadnje lětničku swjećili. Něhdźe 40 ludźi – zapósłancy, sympatizanća a dalši zajimcy – słyšeše spočatnje na gmejnskej žurli přednošk dr. Měrćina Wałdy. Wón zaběraše so z prašenjom, čehodla Serbja swój sejm trjebaja, a spominaše na spočatki zjawneje diskusije wo zastupnistwje Serbow jako korporacija zjawneho prawa. „Zo so němska politika tak mało wo hódnoty fungowaceje demokratije w Serbach starosći, je ćmowa perspektiwa.“ Hajko Kozel rozprawješe po tym wo zaměrje sejma, sobu- a samopostajowanje serbskeho ludu pohonjeć a namakać konsens mjez sejmom a Domowinu.
Na rozmołwje w stolicy
Drježdźany (SN). Předsyda frakcije CDU w Sakskim krajnym sejmje Christian Hartmann a předsyda Domowiny Dawid Statnik zetkaštaj so wčera w Drježdźanach na wuměnu měnjenjow. Kaž Domowina informuje, běštaj sej wobaj přezjednaj, zo stej rěč a kultura Serbow wažny potencial za dalše wuwiće regiona.
„Ze serbskosću ma Łužica něšto jónkrótne, štož ze žiwymi nałožkami zwjazanosć z domiznu posrědkuje a ze swojej rěču mjezsobnosći ludow wosrjedź Europy polěkuje“, rjekny Statnik. Z widom na předstejace wulke wužadanje skedźbni frakciski šef Christian Hartmann na to, zo „dyrbimy při strukturnej změnje we Łužicy serbsku rěč a kulturu bóle do kóždeho nadawka při wuwiću regiona zapřijeć, zo bychmy jónkrótnu identitu regiona wobchowali“.
Dale staj Hartmann a Statnik wukubłanje wučerjow rozjimałoj. Rěčałoj staj tež wo dołhodobnym financnym wuhotowanju Załožby za serbski lud, kotrež měło potrjebje přiměrjene być, a wo lěpšim wothłosowanju terminow mjez wuběrkami krajneho sejma a Radu za serbske naležnosće při Serbow nastupacych temach.
