Župa Delnja Łužica
Towaršnosć za strukturnu změnu załožiła
Choćebuz (HA/SN). Hač do lěta 2021 dóstanje Delnja Łužica w zwisku ze strukturnej změnu 1,5 milionow eurow za spěchowanje wosebje imaterielneho serbskeho kulturneho namrěwstwa. Wobhospodarjeć budźe tele srědki powšitkownowužitna towaršnosć z womjezowanym rukowanjom (ptzwr) Delnja Łužica. Jeje hłowne towaršnicy su Domowinska župa Delnja Łužica, Serbski institut a Domizniski muzej Dešno.
Předsydstwo župy Delnja Łužica, kotrež bě tele postupowanje spočatk septembra namjetowało a wobzamknyło, je so na swojim wčerawšim wuradźowanju w Choćebuskim Serbskim domje hišće raz z tymle konstruktom zaběrało. Předsydstwu noweje ptzwr – tajki status ma tež Krabatowe towarstwo – přisłušeja tři wosoby, 1. a 2. jednaćel kaž tež prokurist. Mjenowane funkcije přewozmu zastupowacy jednaćel Domowiny Marcus Końcaŕ, projektowy sobudźěłaćer župy Delnja Łužica Frank Kosyk a župan Wylem Janhoefer. Jednaćelstwo towaršnosće čestnohamtsce skutkuje a dóstawa podpěru notara. Dwójce wob lěto wone župne předsydstwo wo swojim dźěle informuje.
Lětuši lawreaća Myta Domowiny
Budyšin (SN). Mjena lětušich lawreatow Myta Domowiny, Myta Domowiny za dorost kaž tež z Čestnym znamješkom Domowiny počesćenych je mytowanski wuběrk třěšneho zwjazka wčera wozjewił.
Swoje najwyše wuznamjenjenje spožči třěšny zwjazk prof. dr. Geraldej Stonej z Oxforda, Mikławšej Krawcej z Budyšina, Lubinje Dučmanowej ze Spal a skupinje serbskich duchownych z Delnjeje Łužicy, wobstejacej z Helmuta Hupaca, Dietera Schütta a Cyrila Pjecha.
Z Mytom Domowiny za dorost 2019 počesća předšulsku skupinu Witaj-pěstowarnje „K wódnemu mužej“ Malešecy a Józefa Brězana ze Smječkec.
Skutkowanje Alenki Hageroweje z Komorowa pola Rakec, Ursel Domašcyneje ze Slepoho, Jěwy-Marje Čornakec z Drježdźan, Michaela Biskopa z Dubrawki, dr. Susanny Hozyneje z Budyšina, Jadwigi Kawieckeje z pólskeho Namysłowa, Bernda Jurka z Dubjeho, Hansa Groby z Wojerec, Sonje Hrjehorjoweje ze Sulšec a Kerstin Liederoweje z Narća připóznaja z Čestnym znamješkom Domowiny.
Mytowanske zarjadowanje budźe 2. oktobra w Budyskim Serbskim domje.
Swój hłós pozběhnyć
Serbske wušiwarki jónkrótnje dokumentowała
Za serbstwo a swoju maćeršćinu Marka Cyžowa jako čłonka Zwjazkoweho předsydstwa Domowiny a předsydka jeho wuběrka za zjawnostne a lobbyjowe dźěło zaměrnje skutkuje. Jej leži wonkowny wobraz serbskeho třěšneho zwjazka jara na wutrobje. Tu widźi wona, kotraž zastupuje Maćicu Serbsku w tymle gremiju, swoje tuchwilne městno aktiwneho narodneho dźěła. Staraše so wo wobsah lońšeho online-naprašowanja Domowiny mjez sobustawami serbskich cyłkow. Tam zwěsćene „deficity w informacijach wo dźěle organizacije“ ju starosća. Tohodla wona nětko wjele mocy nałožuje, předležace konkluzije na dobro nahladnosće Domowiny zeskutkownić.
Kapała Kula Bula a Złokomorowska Přěza stej minjenu njedźelu 20 ...
Młodźinske towarstwo Pawk z nowym předsydstwom
Budyšin (ap/SN). Młodźinskeho towarstwo Pawk je sobotu w Budyšinje nowe předsydstwo woliło. Nowy předsyda je Radworčan Jakub Wowčer. Wón naslěduje Francisku Grajcarekec z Chasowa, kotraž je cyłk tři lěta nawjedowała. Ju wuzwoli něhdźe dźesać přitomnych čłonow za městopředsydku. Radworčan Fabian Šěrak je dale pokładnik. Wobsadku wudospołnitej nowej čłonaj předsydstwa Helena Hejduškec z Hory a Marta Hantušec z Radworja.
Třoch Serbow powołali
Choćebuz (SN/JaW). Třo čłonojo Zwjazkoweho předsydstwa Domowiny budu přichodnje naležnosće našeho ludu w poradźowanskim wuběrku za prašenja serbskeho ludu při Zwjazkowym nutřkownym ministerstwje zastupować. To je zwjazkowe předsydstwo na swojim minjenym posedźenju w Choćebuzu wobzamknyło.
Čłonojo gremija přepodachu nadawk po krótkim dorozumjenju předsydźe a městopředsydomaj Domowiny Dawidej Statnikej, Wylemej Janhoeferej a Markej Hančikej. Jich zastupować maja jednaćel Domowiny Marko Kowar, zastupowacy jednaćel třěšneho zwjazka Marcus Końcaŕ a referent Domowiny za nutřkowne naležnosće Werner Sroka. Wšitcy su za přichodnej dwě lěće powołani a maja Zwjazk we wšitkich naležnosćach, kotrež Serbow potrjechja, poradźować.
Namjet wyšeho měšćanosty „dotalne zasady střase“
Choćebuz (SN/at). Jako jedyn z prěnich načolnych łužiskich komunalnych politikarjow bě Choćebuski wyši měšćanosta Holger Kelch (CDU) Serbski sejm přeprosył, so w tamnišim měšćanskim domje schadźować. Na žurli měšćanskich zapósłancow wotmě so sobotu wone posedźenje. A to, štož je wyši měšćanosta swojim hosćom prajił, kwitowachu tući wospjet z přikleskom.
Samo popcorn njepobrachował
Kino za wjesne dźěći. Kajke to dožiwjenje za najmłódšich a jich staršich wčera w Malešanskim „Wódnym mužu“. Samo popcorn su za prawu kinowu atmosferu předawali.
Malešecy (SN/at). Z błyšćatymi wočemi su dźěći a starši wčera do žurle Malešanskeho „Wódneho muža“ zastupili. Kino na wsy za swójby je njewšědne. Wotpowědnje wulke bě wjeselo něhdźe třicećoch, kotřiž so – z titu popcorna kaž we wulkim kinje – na to tam zesydachu. Domowinska župa „Jan Arnošt Smoler“ bě we wobłuku swojeho projekta ze sakskeho wubědźowanja „Čiń sobu!“ k wožiwjenju tradiciskeho hosćenca jako zetkawanišćo Serbow a Němcow přeprosyła.
Folklora so na swjedźeń njehodźi
Wojerecy (pi/SN). Předsydstwo Wojerowskeje župy „Handrij Zejler“ je na swojim wčerawšim posedźenju wjacore terminy wothłosowało. Tak přewjedu popołdnjo za swójby 2. nowembra na žurli Ćišćanskeho hosćenca „Zeleny wěnc“, kaž župan Marcel Brauman zdźěli.
Swoju kubłansku jězbu planuja Wojerowscy Domowinjenjo lětsa zhromadnje z Budyskej župu 4. oktobra na zahajenje serbskeho lěta w Liberecu. „Mamy hišće městno. Štóž chce so wobdźělić, njech so pola Sonje Hrjehorjoweje přizjewi“, Brauman rjekny. Dalši župje wažny termin je serbski wječork ze zastupjerjemi Domowiny, Załožby za serbski lud, Rady za serbske naležnosće Sakskeje a dalšich institucijow 7. nowembra na Židźinskej starej šuli. Tam budźe składnosć za wuměnu a naprašowanja zastupjerjam Serbow wšelakich gremijow.
