Wuměłska hudźba mištersce w přirodźe
Stróža (SN/bn). Zahajenski koncert Stróžanskich nazymskich wikow přirody pod hesłom „W změnje časow“ zahori minjeny pjatk něhdźe 80 wopytowarjow w swjedźenskim stanje při centrumje biosferoweho rezerwata, kotryž je zarjadowanje zhromadnje z towarstwom Radiška a z podpěru Załožby za serbski lud na iniciatiwu Liany Bertók wuhotował.
Nowu cejdejku předstajili
Countertenor Šćěpan Nowak předstaji wčera w Röhrscheidtowej bašće Serbskeho ludoweho ansambla spěwy, kotrež bě zhromadnje z dalšimi hudźbnikami za CD „Mi róžička je zakćěła“ nahrawał.
Budyšin (SN/bn). Z wuspěšnym komornym koncertom we wupředatej Budyskej Röhrscheidtowej bašće předstaji Šćěpan Nowak wčera wječor swoju nowu CD „Mi róžička je zakćěła“, kotruž je Załožba za serbski lud wudała. Do witanja přez jednaćelku SLA Dianu Wagnerec, kotraž so countertenorej a bywšemu wjelelětnemu čłonej ansambla dźakowaše a na to skedźbni, zo „je interpret jenički Serb, kiž register altusa wobknježi“, zaklinča prěnja, titulna pěseń. Nowakej poboku běchu sopranistka Daniela Hazec, pianistka Gina Hentsch, fletistka Marie-Luisa Fryčowa a cellist Helfried Knopsmeier.
Samozrozumliwosć
Njedźelu, 10. septembra, skónči so 3. Zhorjelski fotowy festiwal, ...
Jakub Šewčik
Wo knihach a kniharni (08.09.17)
Za někotre dny wuńdźe Serbska protyka 2018. To budu swěrni roznošowarjo zaso na wsach po puću, zo bychu ju zajimcam poskićeli. Nětko so snano prašeće, što na was w aktualnym wudaću čaka. Tónkróć podamy so zhromadnje z redaktorom Pětrom Šołtu do Sulšec pola Kulowa. Na tu wjes so Šołta sam rady dopomina, wšako je tam hromadźe z Róžeńčanskej młodźinu kermušu na tykancyspěwanje jězdźił.
„Wjelorakosć zwjazuje“
Interkulturne tydźenje w Budyskim wokrjesu skića wšěm zajimcam wot přichodneho tydźenja přiležnosć, sej cuze kultury aktiwnje spřistupnić a tak integraciju podpěrać.
Budyšin (SN/bn). Organizatorojo „Interkulturnych tydźenjow w Budyskim wokrjesu“ předstajichu na wčerawšej nowinarskej konferency w krajnoradnym zarjedźe program a ćežišća lětušeho zarjadowanja. Wjace hač 35 wobłukow chcedźa wot 15. do 30. septembra poskićeć. Zahajenje pod hesłom „Wjelorakosć zwjazuje“ wotměje so pjatk, 15. septembra we Wojerowskim wobydlerskim centrumje mjez druhim z dźiwadłowym předstajenjom „RECHTS: ex und pop – oder eine Proklamation für die Demokratie“ skupiny COMMUNITYartCENTERmannheim. Kruch zaběra so z prašenjom, što za prawicarskimi myslemi tči. Zdobom wobjednawa jednu z centralnych temow interkulturnych tydźenjow – prawicarski ekstremizm a rasizm w konteksće přiběraceje ličby požadarjow wo azyl w regionje. W tym zwisku pokazaja tež dokumentaciju „Wojerecy 26 lět po 1991: Dohlady, perspektiwy, měnjenja“ w Kulturnej fabrice.
Wo Španiskej byrgarskej wójnje w radnicy města
Budyšin (SN/bn). „Tale wustajeńca eksemplarisce pokazuje, što so stawa, wotstronja-li so demokratiske struktury a zakładne prawa. Nadźijam so, zo sej tójšto ludźi přehladku wobhlada.“ Z tutymi słowami wotewrě Budyski wyši měšćanosta Alexander Ahrens (SPD) wčera wustajeńcu „Wobwojowane wopominanje“ w radnicy sprjewineho města. Nimo toho pokaza na paralele podawkow do wuwića frankistiskeje diktatury k dźensnišemu połoženju w Pólskej a Madźarskej a naspomni tež „njesławnu rólu Němskeje w Španiskej byrgarskej wójnje“.
Zapósłanc Sakskeho krajneho sejma a patron wustajeńcy Heiko Kozel (Lěwica) po měšćanosće na to skedźbni, zo jedna so wo „zakónčenje projekta, kotryž bu hižo lěta 2010 zahajeny a so nětko po intensiwnym dźěle zjawnosći spřistupni“. Kaž sej wón přeje, měhło so město wo to prócować, zo „mnozy ludźo, wosebje tež šulerjo, wo tym zhonja a sej přehladku wobhladaja“. Zhromadnje ze zarjadowanje wuhotowacymaj towarstwomaj Europaklub International a Verein Grenzenlos chce Kozel w kooperaciji ze španiskim wulkopósłanstwom „temu tež přichodnje w Budyšinje šěrić“.
