Filharmonija koncertuje
Ličba přihladowarjow w NSLDź dale rozrostła
Budyšin (SN/MiR). Němsko-Serbske ludowe dźiwadło Budyšin zhladuje na přewšo wuspěšne lěto 2017. Ličba wopytowarjow je wospjet rozrostła. W lěće 2016 bě 152 500 zajimcow na předstajenja přišło, loni 2 581 wjace. NSLDź bě na 961 předstajenjow přeprosyło, lěto do toho na 895. Loni witachu hrajerjo publikum we wobłuku inscenacijow na 19 premjerow, klankodźiwadźelnicy mějachu jich dźewjeć. Šěsć króć dožiwichu lubowarjo serbskorěčneho dźiwadła w tymle wobłukomaj nowy poskitk.
Zdeněk Boháč
Štyri prapremjery serbskeje hudźby
K zazběhej noweho lěta zaklinči we wobłuku „wosebitych koncertow“ komorna hudźba mjez druhim w Choćebuzu, Budyšinje a Wojerecach. Wotměnjawy program saha wot baroka hač do dźensnišeho časa a wopřijima zdobom štyri prapremjery serbskich komponistow. Wěnowany je hudźbny rjad lětsa Klětnjanej Hincej Rojej.
Budyšin (SN/bn). Mjeztym hižo 22 lět organizuje pianistka Heidemarja Wiesnerec rjad „Wosebity koncert k nowemu lětu“. Tón sta so minjene lěta z kruće etablěrowanym a woblubowanym kulturnym wjerškom we a za mjezami Łužicy. W srjedźišću steji wot 5. januara pod hesłom „ROY 90!“ serbski komponist Hinc Roj, kiž swjećeše loni w decembru dźewjećdźesaćiny. Jeho najnowše „Nócne modlenčko opus 185“ zaklinči w tymle wobłuku prěni raz.
Sorbian Art Trio z přećelemi lěto rozžohnowało
Radwor (SN/bn). „Trio a kumple“ bě hesło koncerta, kotryž přiwabi minjenu sobotu něhdźe 200 zajimcow do Radworskeje „Meje“. Kapała Sorbian Art Trio bě jón organizowała a sej wjacorych přećelow přeprosyła.
Dypkownje w 21.37 hodź. band SerBeat wječor zahaji. Njetraješe ani dźesać mjeńšin a tójšto porikow na žurli rejwaše. Měšeńca znatych ludowych spěwow, šlagrow a mjezynarodnych titulow wukopa so wospjet jako zaruka dobreje nalady, najlěpši wothłós wšak žnějachu hudźbicy z pěsnju „Z tobu“, hitom skupiny Wusmuž.
Čitajće w nowym rozhledźe (29.12.17)
Nowe lěto hišće před durjemi steji, a hižo směm nowe wudaće Rozhlada připowědźić. Zawěsće su sej w decembrje mnozy z was třidźělnu serbsku wersiju dokudramy wo Słowjanach we Wuhladku wobhladali. Lubina Malinkowa poby hižo w nowembrje na předpremjerje němskeho filma a podawa w recensiji swoje mysle wo nim. Jutře w 17.10 hodź. jón telewizija Arte pokaza a tak maće nětko składnosć, wobě wersiji přirunować.
Instanca, kotraž dawa telewizijnym sćelakam feedback wo tym, kak su so wusyłanja radźili, je telewizijna rada. Wot lońšeho ma telewizijna rada sćelaka ZDF 16 zastupjerjow towaršnostnych skupin, na přikład za wobłuk „čestnohamtski ciwilny škit a škit přećiwo katastrofam“ (pomjenowany wot Sakskeje) abo „seniorojo, swójby, žony a młodźina“ (pomjenowany wot Braniborskeje). Jedna ze zastupjerkow je friziska žurnalistka Karin Haug, kotraž je wot Schleswigsko-Holsteinskeje za wobłuk „regionalne a mjeńšinowe rěče“ do rady powołana. W interviewje rozkładuje wona nadawki rady, wopisuje móžnosće, wliw wukonjeć a namołwja naposledk tež, jej zdźělić, je-li so něšto nimokuliło.
Zajim we wukraju wjetši był
Z wustajeńcomaj „Pjeć lětstotkow – Serbja a reformacija“ a „Krabat – Muž – Mytos – Marka“ je Budyski Serbski muzej lětsa wopytowarjam něšto wosebite poskićił. Najwjace zajimcow pak přiwabi přehladka we wukraju.
Wosebite wodźenje po měsće
Wupućować pomha!
Wočakowanja spjelnjene
Wunošk hodowneho nyšpora chóra Lipa na dobro projektow w Malawiju
Róžant (CRM/SN). Kaž kóžde lěto składnostnje hodowneho nyšpora z chórom Lipa, běše tež wčera wječor Róžeńčanski Boži dom hač na poslednje městno wobsadźeny. Chór Lipa ze swojej dirigentku Jadwigu Kaulfürstowej ma dźě tež nastupajo tónle hodowny koncert jara dobre mjeno. Sep znatych a woblubowanych serbskich pěsnjow w swětle swěčkow w swjatnicy dožiwić, to hrěje připosłucharjam wutrobu a wokřewja dušu.
W zwučenej spěwnej kwaliće zaklinčachu tak dźěle z oratorija „Zyma“ Handrija Zejlerja a Korle Awgusta Kocora. Chórisća poskićichu wobkuzłace a zdobom wužadace sadźby Bjarnata Krawca na teksty Michała Nawki a Józefa Nowaka. K tomu předčita Katka Baierowa zeserbšćenu powědku Astrid Lindgren „Dobry wječor, knježe prošerjo“. A pokaza z nim na přećiwk mjez dźensnišim našim wašnjom zromantizowanja a komercionalizowanja hodowneho swjedźenja a jeho poprawneho zmysła.
