Wobradźenje kulturneho konwenta
Projektowe spěchowanje steješe mjez druhim na dnjowym porjedźe 109. posedźenja kulturneho konwenta Hornja Łužica-Delnja Šleska minjeny pjatk w Zhorjelskim krajnoradnym zarjedźe.
Zhorjelc (SN/CoR). Cyły hornc pjenjez njejsu čłonojo kulturneho konwenta Hornja Łužica-Delnja Šleska při předhodownym wobradźenju pjatk wučerpali. Dohromady 700 000 eurow bě w klětušim etaće za projekty zaplanowane. Z toho pak jenož něhdźe 678 000 wužiwachu. Přičina za to pak njeběchu pobrachowace próstwy, ale jich njedocpěty narok. Z dohromady 47 próstwow bě kulturna přirada 39 za spěchowanje poručiła a wosom wotpokazała. „Zdźěla njespjelnichu wone formalne kriterije, kaž zo dyrbi projekt znajmjeńša 5 000 eurow spěchowanja měć. Na tamnym boku njewotpowědowachu próstwy wobsahowym fachowym kriterijam“, rozłoži předsyda kulturneje přirady Thomas Pilz.
Wjele připóznaća za kantatu Feliksa Brojera
Budysin (CRM/SN). Hižo 24. raz wuhotowa chór 1. serbskeje kulturneje brigady sobotu w Budyskej Michałskej cyrkwi adwentny koncert. A zaso běše Boži dom połnje wobsadźeny. Wospjet poda na hudźbnym nyšporje superintendent Jan Malink meditaciju a žohnowanje. Z připowědźenym prapředstajenjom noweje serbskeje adwentneje kantaty wuwabi sej chór Serbskeho gymnazija Budyšin ze swojim mnoholětnym dirigentom Friedemannom Böhmu tónraz přidatnu kedźbnosć. Předstajena bu kompozicija „Přińdź, Knježe!“ młodeho cyrkwinskeho hudźbnika Feliksa Brojera. Starodawny němski kěrluš na tekst swj. Ambroža z Milana, wot Michała Wałdy hižo 1787 tež do katolskeho serbskeho kěrlušnika přiwzaty, twori titul jědnaće čisłoweje twórby za chór, spěwny kwartet, pišćele pozitiw a smyčkowy orchester. Připosłucharstwo honorowaše nowosć z respektom a wulkej chwalbu.
Porjedźenka
85 lět lodohokej w Běłej Wodźe
Štó pyta hišće darik z formatom?
Što dawa noweho?
Ludmiła Bizoldowa předstaji akwarele
Budyšin (SN/CoR). „Kak přindźech w času wuměnka k molowanju“ je hesło noweje wustajeńcy w Budyskej Serbskej kulturnej informaciji (SKI), kotruž su wčera wotewrěli. Nimale 50 ludźi, mjez nimi tež knjez domu, direktor Załožby za serbski lud Jan Budar, je přišło, zo by wot wustajowaceje lajskeje wuměłče Ludmiły Bizoldoweje wotmołwu na titul dawace prašenje dóstało. Přitomnym přiwuznym, bywšim kolegam Budyskeje Lessingoweje kaž tež Serbskeje wyšeje šule, přećelam, wosadnym a dalšim zajimcam předstaji Budyšanka přećelku, kotraž bě jeje wuměłske wuwiće nastorčiła: „2013 smy na wustajeńcy šulskeje přećelki dr. Bianki Frencloweje byli, a jako so dźiwachmy, kak su wobrazy nastali, rěkaše: Sobotu so zetkamy z paperju a barbami na Hrodźišku!“ Tak je sej Ludmiła Bizoldowa akwarelowe molowanje wotkryła a, tež přez kursy na ludowej uniwersiće, dale wuwiła.
Z wosebitej słowjanskej zběrku so dźakowali
Zhorjelc (Łu/SN). Hornjołužiska towaršnosć wědomosćow w Zhorjelcu wobsedźi jako jenička biblioteka w Němskej wosebje drohotny eksemplar knihi. Je to prěnja wuchodosłowjanska ćišćana kniha. Dźakowano nawodnistwu Hornjołužiskeje towaršnosće wědomosćow móžachu drohoćinku wospjet we wjacorych wustajeńcach, mjez druhim tež w běłoruskim Minsku, zjawnosći pokazać.
Běłoruska republika wopomina lětsa wuznamny skutk w stawiznach swojeho naroda – 500. róčnicu prěnjeho běłoruskeho knihićišća. Najwjetše hódnoćenje dósta w tym wobłuku skutkowanje Francišaka Skaryny (1486–1541). Jeho přełožkej Swjateho pisma, kotryž bu lěta 1517 w Praze ćišćany, přicpěwaja fachowcy samsnu hódnotu za běłorusku kulturu kaž Martina Lutherowemu přełožkej biblije za kulturu Němskeje. Z wjacorymi konferencami a wustajeńcami su w kraju na mjenowanu róčnicu spominali.
Duchowna hudźba k adwentej zaklinčała
Zhromadnje ze sopranistku Magdalenu Kircheis, tenorom Christianom Lotzom a wiolinistku Magdalenu Römhild wuhotowa cyrkwinski hudźbny direktor Friedemann Böhme njedawno w Budyskej cyrkwi Našeje lubeje knjenje koncert, kotryž běše cyle na adwentny čas wusměrjeny. Poskitk přiwzachu zaso w bohatej ličbje katolscy a ewangelscy křesćenjo, mjez nimi tež tójšto Serbow.
Bajkowy swět na Wojerowskim hrodźe předstajili
Wojerecy (SiR/SN). Wuměłstwowe towarstwo Wojerecy přeprosy wčera, njedźelu, na wosebite adwentne popołdnjo. Basnica Róža Domašcyna přewza tam rólu bajkarki. W srjedźišću čitanja stejachu powědančka z knihi „Das goldene Gut“, kotruž bě Ludowe nakładnistwo Domowina nalěto wudało. Tam předstajene bajki pochadźeja zdźěla z ertnych, w ludźe dale dawanych powědanjow, na tamnym boku pak tež z pisomnych žórłow, na přikład z časopisow a druhich literarnych zběrkow, kotrež běchu je za potomnistwo wobchowali.
Wjace hač 60 serbskich bajkow móžeš w knižnej zběrce čitać. Wosebitosć na tym je, zo so stawizny zwjetša w regionje wothrawaja a zo su zwěrjata protagonisća. Wuzwoliła, zestajała, wobdźěłała a do němčiny přenjesła bě bajki Róža Domašcyna. Wuměłča Jutta Mirtschin je knihu ilustrowała.
