Z wudaća: septembera 2018

Budyšin (SN/JaW). Wokrjes Budyšin ma nowy imageowy film. Krajny rada Michael Harig (CDU) je jón sobotu na swjatočnosći k 10lětnemu wobstaću noweho wokrjesa w Budyskim Němsko-Serbskim ludowym dźiwadle zjawnosći předstajił. „Hakle tón tydźeń su jón dozhotowili“, zwurazni Harig přitomnym regionalneje a nadregionalneje politiki. Nimo mini­sterskeho prezidenta Michaela Kretsch­mera přitomni běchu tež serbskaj zapósłancaj Sakskeho krajneho sejma Marko Šiman (wobaj CDU) a Hajko Kozel (Lěwica), mnozy tuchwilni a bywši hamtscy kolegojo Hariga susodnych wokrjesow, zastupnicy komunow kaž tež zastupnicy kubłanskich zarjadnišćow a serbskich institucijow.

W Rakečanskej plahowarni swini wot oktobra dźěłać přestanu

Rakecy (SN/BŠe). W Rakečanskej plahowarni swini njebudu přichodnje hižo žane­ swinje dźeržane. „To bě jednotliwy rozsud, kotryž za tamne zawody njepłaći. Za přichod našeho agrarneho drustwa pak je to móžnosć, efektiwnje dale hospodarić“, zdźěli jednaćel Zarěčanskeho ratarskeho zawoda Stefan Triebs na naprašowanje. Hižo we februaru na zhromadźiznje towaršnikow běchu rozsu­dźili, kormjernju zawrěć. W 70- a 80tych lětach twarjenu bě ju Zarěčanska ratarska towaršnosć před dwaceći lětami wot rukowaćelnje dóstała. Přiwšěm běchu tehdy hižo inwesticije trěbne.

Přihoty na Domowinsku konferencu wo strukturnym wuwiću we Łužicy 13. a 14. septembra we Złym Komorowje stejachu mjez druhim w srjedźišću pjatkowneho wuradźowanja Zwjazkoweho předsyda Domowiny w Narću.

Dr. Roberta Malinka (srjedźa klečo) su wčera za noweho fararja ewangelskeje wo­sady­ w Rakecach zapokazali. Nimo přitomnych duchownych žohnowaše jeho tež předsyda cyrkwinskeho předstejićerstwa Olaf Langner (hlej wobraz). Wón ma wulki podźěl na tym, zo je Robert Malink farske městno w Rakecach přewzał. Wědomje běchu so tam po wotchadźe dotalneho fararja Andreasa Kecke loni w septembru za serb­skej fararskej swójbu rozhladowali. Wosebje serbscy wěriwi Rakečanskeje wosady so nadźijeja, zo změja nětko wjace serbskich zarjadowanjow. 42lětny farar dr. Malink pochadźa z Kamjenicy, je pak serbšćinu nawuknył a ma serbsku swójbu. Zašłe dźesać lět skutkowaše wón w Spitzcunnersdorfje. Foto: Rafael Ledźbor

Smječkecy (SN/JaW). Dom swj. Jana w Smječkecach, w kotrymž su duchownje zbrašeni zaměstnjeni, změje noweho nawodu. Wot 1. januara 2019 budźe to Marko Kliman. To wobkrući wón Serbskim Nowinam na kromje sobotneje swjatočnosće k 10lětnemu wobstaću Budyskeho wokrjesa w Budyšinje. Kliman, skutko­wacy tuchwilu w Budyskej chorowni we wotdźělu za hladanje nutřkowneje a urologiskeje kliniki, přewozmje zastojnstwo tuchwilneho nawody Smječkečanskeho domu Tadeja Šimana, kiž ma jeho do noweho dźěła zapokazać. Šiman budźe w nadawku nošerja Smječkečanskeje hladarnje zbrašenych Křesćansko-socialneho skutka (CSW) regionalnje a nadregionalnje fachowje dale skutkować.

Kaž Marko Kliman na naprašowanje našeho wječornika wobkrući, ma wón přichodnje wšitke štyri zarjadnišća CSW w Hornjej Łužicy w Smječkecach, Kamjencu, a Budyšinje jako regionalny nawo­da zastupować. „Wjeselu so na nowy nadawk. Tu móžu so hišće regionalnišo na dobro našeje dwurěčneje kón­činy zasadźeć“, rjekny wón SN. Zdobom Prawočan wobkrući, zo wostanje dale čestnohamtski wjesnjanosta Chróšćanskeje gmejny.

Landau (dpa/SN). Dobre wosom měsacow po smjertnym nadpadźe z nožom na 15lětnu Miju w Kandelu je krajne sudnistwo w porynsko-pfalcskim Landauwje dźensa něhdyšeho přećela morjeneje k jastwu wosom lět a šěsć měsacow zasudźiło. Sudnicy zasudźichu prawdźepodobnje z Afghanistana pochadźaceho Abdula D. morjenja dla po młodźinskim chłostanskim prawje. Muž bě holcu loni po hodźoch we wobchodźe zakłół, dokelž bě so krótko do toho z nim rozešła.

400 jatych ćeknyło

Tripolis (dpa/SN). Chaosa w libyskej stolicy Tripolisu dla je so něhdźe 400 jatym poradźiło z jastwa ćeknyć. Po wudyrjenju nowych wojowanjow bě w kłódźe k rokoćenju dóšło. Zo njebychu swójske žiwjenje wohrozyli, su stražnicy jatych radšo hić dali. W Tripolisu hižo cyły tydźeń wjacore znjepřećelene skupiny mjez sobu wojuja. Wujednany přiměr su jeno krótko dodźerželi. Oficialne žórła rozprawjeja wo 49 mortwych a 129 zranjenych. Po powalenju mócnarja Muammara al-Gaddafija w lěće 2011 knježitej w kraju chaos a wobydlerska wójna.

Wulkowoheń w muzeju

Wjace hač 150 zajimcow je sobotu wotewrjenje wosebiteje wustajeńcy Iris Brankačkoweje (2. wotlěwa) „Wo prěčenju rěkow – Mólby a dźěła na papjerje“ składnostnje 60. narodnin wuměłče w Muzeju Budyšin dožiwiło. Hač do spočatka nowembra wustajeja tam 35 wulkich a 21 mjeńšich twórbow. Michaelis Šusterowa a Maja Nagelowa jej gratulowaštej. Foto: SN/Maćij Bulank

Konja ze swimmigpoola wuchowali su pomocnicy w sewjerorynsko-westfalskim Meerbuschu. Kón bě z bliskeje pastwy ćeknył a běžeše přez bazenk, kotryž bě jeno z lamelemi wodźěty. Kóń so přełama a padny do wody. Jeho wuchować pak bě wobćežne, dokelž bě ležownosć za jězdźidła wohnjoweje wobory přemała. Tak přijědźe susod z małym bagrom. Z pomocu pasow móžachu konja po hodźinomaj skónčnje wućahnyć, po tym zo bě jeho skótny lěkar z lěkami změrował.

Bamžej moped přepodali su čłonojo ­Vespa-cluba w Italskej. K historiskemu rolerej słušeja tež běły nahłownik, wopon Vatikana a swójska čisłowa taflička „BF362918“. „B“ rěka Bergoglio, swójbne mjeno bamža, „F“ rěka Franciskus a „36“ je jeho narodne lěto. Na kóncu steji datum přepodaća. 81lětny bamž je připowědźił, zo chce jězdźidło přesadźować.

Praha (dpa/SN). Čěski prezident Miloš Zeman ma zrozumjenje za najnowše pro­testne zarjadowanja w Kamjenicy. „Sprawnje prajene, sympatizuju na kóždežkuli wašnje z demonstrantami“, zwurazni 73lětny w priwatnym telewizijnym sćelaku TV Barrandov. „Woni dźě praja: Mama Merkel je migrantow přeprosyła – a tu maće wuslědk.“ Jenički wupuć po jeho měnjenju je, kriminelnych ćěkancow spěšnje wotsunyć. Po smjertnym nadpadźe z nožom na 35lětneho bě w Kamjenicy k namócnosćam dóšło. Pozadk njeskutka njeje hišće wujasnjeny.

Po informacijach swojeho rěčnika wo­py­ta Miloš Zeman tutón měsac Němsku a zetka so tež ze zwjazkowej kanclerku Angelu Merkel (CDU). Potom chce z njej wo wikowanskich poćahach a wo energijowej politice rěčeć.

Gdańsk (dpa/SN). W Pólskej su minjeny kónc tydźenja wudyrjenje Druheje swětoweje wójny před 79 lětami wopomi­nali. Na zarjadowanju w sewjeropólskim Tczewje njedaloko Gdańska namołwješe statny prezident Andrzej Duda, wšitko činić, zo by so nowej wójnje zadźěwało. Wón ludźi zdobom k jednoće namołwješe. Z nadpadom němskeje Wehrmachty na pólske zepěranišćo Westerplatte a na móst w měsće Tczew započa so 1. septembra 1939 wójna, kotraž je sej 50 milionow woporow žadała. Duda dopominaše tež na 17. september 1939, jako sowjetske jednotki wuchodnu Pólsku wobsadźichu.