Praski chór spěwa
Róžant. Cyrkwinski chór Cantus Amici z Prahi wuhotuje jutře, sobotu, we 18.30 hodź. koncert w Róžeńčanskej cyrkwi. Mjez druhim zaklinčitej Antona Brucknerowe „Locus iste“ a „Ave Maria“. Wuměłski nawod změje Lukáš Dobrodinský, na pišćelach hudźi Ondřej Valenta. Nazajtra we 8.30 hodź. wobrubi chór Božu mšu w Ralbicach.
Swójby pućuja
Malešecy. Serbske koło „Budyski kraj“ a Rěčny centrum WITAJ přeprošujetej serbske swójby a dalšich zajimowanych na pućowanje podłu hatow wokoło Malešec. Něhdźe pjeć kilometrow dołhe pućowanje je wuraznje přistupne za swójby z Witaj-dźěćimi, zo móhli so wone serbsce rozmołwjeć. Zajimcy zetkaja so jutře, sobotu, w 14.30 hodź. na nawsy w Malešecach. Po puću chcedźa z dźěćimi hry hrać a sposrědkuja wobdźělnikam zajimawosće wo Malešanskich Serbach. Po nawróće poskićuja kofej a poprjančki.
Spominaja na wopory
FSV Zwickau w Kamjencu
Jednota Kamjenc, načolnik krajneje koparskeje ligi, hraje jutře w 13 hodź. doma w Kamjencu přećiwo FSV Zwickau, kotryž kopa hewak w třećej lize Němskeje. Je to duel w štwórćfinalu wo krajny pokal. Zachod Nordstraße steji jenož hosćom ze Šwikawy k dispoziciji. Wšitkich domjacych přihladowarjow prosy Jednota wo wužiwanje zachoda na Dittrichowej. Tež tam namakaće w njeposrědnjej bliskosći zarjadniskeho areala dosć parkowanskich móžnosćow. Wšitke kasy wotewrja w 11.30 hodź. Połny zastup płaći dźewjeć eurow, potuńšeny sydom eurow a dźěći do 14 lět smědźa sej hru zadarmo wobhladać. Zastupne lisćiki za cyłe lěto, sudniske abo druhe wupokazy za tutu partiju płaćiwe njejsu. Dalšej pokalnej hrě na krajnej runinje:
17.11. 15:30 Kamjeničanski FC
– Biskopičanske KT 08
18.11. 13:00 Drježdźany Laubegast
– Budissa Budyšin
Kónctydźenska kopańca
17.11. 13:30 FSV Łuty
– ST Marijina hwězda
17.11. 13:30 ST Lubuš – SJ Njebjelčicy
17.11. 13:30 HZ Rakecy II / Sćeńca
– SJ Chrósćicy II
18.11. 11:00 LSV Hory
– Módro-běli Kulow
18.11. 13:30 ST Radwor
– ST Kinspork/Łužnica
18.11. 13:30 Drohotka Ramnow
– Rakečanske ST
18.11. 13:30 Sokoł Ralbicy/Hórki
– Póst Germ. Budyšin
Chrósćicy (JK/N). Poměrnje spěšnje wotdźěłachu Chróšćanscy gmejnscy radźićeljo na swojim wčerawšim posedźenju dnjowy dypk, w kotrymž dźěše wo to, kak wužiwaja pawšalne připokazanje k skrućenju žiwjenja na wsach w Swobodnym staće Sakskeje za lěto 2018. To su wone 70 000 eurow, na kotrež so w kóždej sakskej komunje wjesela.
Njebjelčicy. Serbskopazličanske karnewalowe towarstwo je minjenu njedźelu do swojeje 49. sezony startowało. Prěni wjeršk budźe jutře, sobotu, w 19.30 hodź, hdyž w Njebjelčanskej „Bjesadźe“ noweho princa wuzwola. Zbywace zastupne lisćiki předawaja při wječornej kasy.
Kretschmer w rozmołwje
Trjebin. Za wobydlerjow Slepjanskeje, Trjebinskeje a Dźěwinskeje gmejny wotměje so póndźelu, 19. septembra, w 19 hodź. wobydlerska rozmołwa w Trjebinskim Domje towarstwow. Na njej wobdźěli so sakski ministerski prezident Michael Kretschmer (CDU). Mjez druhim póńdźe wo prašenje, kak móhli so wotstorkowane inwesticije nachwatać a kotre spěchowanje móža wobydlerjo za swoje předewzaća wužiwać.
Zběraja podpisma
Budyšin. Za ludowy namjet za zhromadnu šulu w Sakskej zběra Budyski zwjazk Zelenych wutoru, 20. nowembra, wot 10 do 12 hodź. na Budyskej Bohatej hasy blisko Bohateje wěže podpisma. Tute su trěbne, zo móhli zapodać do Sakskeho krajneho sejma zakoń, po kotrymž móhli šulerjo dlěje hač jenož hač do 4. lětnika zhromadnje wuknyć.
Rěčne hodźiny
Slepo (CK/SN). Nawodnicu Slepjanskeho Serbskeho kulturneho centruma (SKC) Silwiju Panošinu su zawčerawšim ze Slepjanskim Mytom za angažowanje počesćili. Při tym jedna so wo wuznamjenjenje, kotrež je tak nowe, zo za nje hač krótko do spožčenja ani hišće mjeno njemějachu. Nowe myto je paralelnje k Čestnemu mytu myslene za ludźi, kotřiž w swojim powołanju na časnik njehladaja, wjele wjace činja, hač so wočakuje, a tak wulku hódnotu za zhromadne žiwjenje ludźi w Slepom tworja.
Komu słušeja pjenjezy?
Ottendorf-Okrilla. Wjacore tysac eurow namakachu wobydlerjo w oktobru w Ottendorfje-Okrilli. Hdy a hdźe dokładnje a pod kotrymi wuměnjenjemi, policija njepřeradźi, dokelž móže to jenož wobsedźer sam wědźeć. Wobsadka policajskeho awta je štyricyfrowu sumu zawěsćiła. Dotal so nichtó přizjewił njeje, komuž by wona słušała. Zo móhli dokładnje zwěsćić, zwotkel pjenjezy su, a je wobsedźerjej wróćić, policija jeho prosy, so přizjewić. Wón měł mjenować nadrobnosće, kak je pjenjezy zhubił. Tele informacije přepruwuja. Pokiwy přijimuja pod telefonowym čisłom 03578/ 35 20.
„Blachowa kista“ rěka na trochu schowanej tafličce na kromje Nowych Poršic. Tam ma instrumentytwarc Constantin Nürnberger swoju dźěłarnju. W minjenych třoch lětach je sej ju krok po kroku w bywšej bróžni dźěda a wowki wutwarił. Byrnjež hišće wšitko hotowe njebyło, hižo pilnje najwšelakoriše dźěła wukonja, nadawkowa knižka je derje pjelnjena.
„W lětnich prózdninach mějach 60 pozawnow tu. To so najprjedy raz dźiwaš, kelko ludźi w našej wokolinje na tajkim instrumenće hraje. Ale mamy we Łužicy tójšto pozawnowych chórow – štož mje wězo wjeseli –, a kóždy instrument dyrbi so prawidłownje hladać, ewentualnje wuporjedźić a hłosować. A jedna-li so wo blachowy dujerski, wězo tež polěrować. Sym wuknył, zo směš hakle potom, móžeš-li so w blachu špihelować na wašnje, zo móhł so truhać, woprawdźe wo polěrowanju rěčeć. Wšo druhe je kepsanka“, młody rjemjeslnik powěda.
„Poprawom wšak chcychmy wot Lubnjowa hač k Słowjanskemu hrodźišću Raduš kolesować, ale z toho dźensa ničo wjace njebudźe!“ Kaž Christinje Tivador z Königswusterhausena dźěše so wjele ludźom, kotřiž běchu připadnje na Lědach pozastali. Wina na tym běchu mnohe poskitki a putacy program na Lědźanskim swjedźenju, kotryž stajnje nazymu přewjeduja. Při najrjeńšim wjedrje z módrym njebjom a tójšto słóncom bě to mnohim wulkotne dožiwjenje. Wosebje dźěćom so lubješe, předewšěm hdyž kiwachu myta, kaž při kałanju šćukow. Z machotawku, na kotrejž wisaše blachowa šćuka z hozdźikom, dyrbjachu do čorneho trjechić. Šěsćlětnemu Thejej Tivadorej je so to po jenož někotrych pospytach poradźiło a tak móžeše so nad mytom wjeselić. Wulce motiwowany je so hólčec hišće na dalšich hrach wuspytał. Tež za dorosćenych bě wšelka zabawa spřihotowana.