Čaputová w Praze
Kiska ma stronu
Banská Bystrica (SŽ/K/SN). Wčera hłowa stata, dźensa předsyda strony. Tajku karjeru je sej dotalny słowakski prezident Andrej Kiska sam připrawił, załožejo po skónčenju zastojnstwa nablaku swójsku stronu. Dał je jej mjeno Za ľudí (Za ludźi) a je ju w srjedźosłowakskej Banskej Bystricy zjawnosći předstajił. Do stronskeho skutkowanja nastupuje Kiska ze zaměrom, Słowaksku ludźom wróćić. „Smy rozhněwani, smy zludani, wěmy wšak, što je trjeba činić“, wón rjekny. Kiska prezentowaše při tej składnosći nawodny team, z kotrymž chcył wón swoju nowu stronu w ludnosći zakorjenić. Poboku ma tak diplomatow, wyšich měšćanostow, starostow gmejnow a managerow.
Nětk žona hłowa stata
Zuzana Čaputová zastojnstwo z dojimawej narěču přewzała
„Podawam wam tuž rozum, wutrobu a ruce. Njejsym knježić přišła, sym słužić přišła. W zmysle swojeje přisahi na wustawu budu słužić na dobro słowakskeho naroda, narodnych mjeńšin a etniskich skupin, kotrež w Słowakskej bydla.“
Bratislava (SŽ/K/SN). Na swjedźenskim schadźowanju parlamenta minjenu sobotu w Bratislavskim domje filharmonije je nowowuzwolena prezidentka kraja pod Tatrami Zuzana Čaputová w přitomnosći wšěch štyrjoch dotalnych prezidentow słužbnu přisahu na wustawu złožiła a tak jako prěnja žona najwyše statne zastojnstwo nastupiła.
Babiš njejimany
Klaus jr. nowe hibanje załožił
Praha (ČŽ/K/SN). Štwórć lěta po wuzamknjenju z Wobydlerskeje demokratiskeje strony ODS je Václav Klaus junior w stolicy Čěskeje w Praze nowe politiske hibanje załožił. Mjenował je wón dalši subjekt na čěskej politiskej scenje „Trikoloru“. Najskerje tohodla, dokelž po słowach syna něhdyšeho čěskeho prezidenta Václava Klausa jeho hibanje na „třoch nošnych stołpach“ steji. Prěni rěka „Smy w Čěskej republice žiwi“, štož woznamjenja, zo maja jeničce čěske problemy rozrisać a žane druhe. „Wšo bohatstwo pochadźa z dźěła“ je druhi stołp a „Škitamy normalny swět“ třeći, při čimž su swójba, sydlišćo a stat tři zakładne kamjenje normalneho swěta.
Na nowinarskej konferency Václav Klaus jr. podšmórny, zo je jeho hibanje konserwatiwnje a prawicowje wusměrjene. Prajiwši, zo je w minjenymaj lětomaj dožiwił pokupnosć, ludarstwo, hłuposć a wosobinske zajimy kopicy zastupnikow elity, wón zwurazni: „Přišoł je čas, wróćić tutón kraj ludźom, kotřiž dźěłaja, dawki płaća a dźěći kubłaja. Přišoł je čas, tutón kraj sej zaso wróćo wzać.“
Prěnje šěsćniki w Pólskej
Krakow (JBR/SN). W Krakowskej uniwersitnej klinice su so 20. róžownika šěsćniki narodźili, a to prěni raz w Pólskej, štož bě wulka sensacija. Dźěći – štyri holčki a hólčkaj – leža hišće w inkubatorach, dokelž waža wšitke hakle něhdźe tysac gramow. Statistika podawa, zo su šěsćniki jenož jónu na 4,7 miliardow samodruhich po cyłym swěće.
Krótko po narodźe wopyta dźěćatka prezident Andrzej Duda a gratulowaše staršimaj z kwěćelom. Wojewódstwo přilubja nowonarodźenym jónkrótny dar 100 000 złotych. Ministerski prezident Mateusz Morawiecki přepoda staršimaj wot narodneje banki PKO klučiki za dźewjećwosobowe awto. Kóždy z jeju dźěći dóstanje jónkrótnje 1 000 złotych a nimo toho z noweho socialneho programa 500 złotych měsačnje hač do 18. žiwjenskeho lěta. Město Krakow płaći staršimaj tuchwilu bydlenje blisko chorownje, zo móhłoj swoje pjeraški wšědnje widźeć. Sportowy klub Cracovia chce jim zastupne lisćiki na swoje koparske hry přewostajić, a to hač do kónca žiwjenja. A doma čaka na Zosiju, Kaju, Nelu, Malwinu, Filipa a Tymona dwuapołlětny bratřik.
Nastroj awtonomnje ratari
PÓLNY ROBOTER běše wobdźiwana atrakcija, jako eksperća na zahonach pola Chotovic w Kolínskim wobwodźe njewšědny aparat wupruwowachu. Kupiła bě sobu najmoderniši agregat toho razu čěska towaršnosć Leading Farmers norwegskich inwestorow pola danskeje firmy Agrointelli. Tak mjenowany roboter-nošak z mjenom „Robotti“ wukonja najwšelakoriše dźěła, kotrež burja hewak jednotliwje z pomocu traktora wobstaruja. Zasadźić hodźi so tuž na přikład za wusyw, popryskanje abo wuplěwanje resp. dalše hladanske naprawy. Po wotpowědnym programěrowanju nastroj dospołnje awtonomnje dźěła. Móhłrjec připódla wobstaruje hišće wšelake dalše funkcije. Přisłušne sensory měrja mjez druhim włóžnotu pódy, mjelnosć role abo jeje staw zastaranja z trěbnymi hnojiwami a mineralijemi.
Znowa mjenje bjezdźěłnych
Róčnicu wšelako swjećili
Pólska prěnje zdźěla swobodne wólby w juniju 1989 wopominała
Waršawa. Pólska swjećeše minjenu wutoru 30. róčnicu politiskeho podawka, kotryž je kraj a skónčnje wšu Europu změnił.
Dnja 4. junija 1989 běchu w Pólskej prěnje, znajmjeńša zdźěla swobodne wólby parlamenta, z kotrychž wuńdźe Tadeusz Mazowiecki jako prěni njekomunistiski ministerski prezident kraja. Do toho bě „Wobydlerski komitej Solidarność“ z Lechom Wałęsu na čole dwaj měsacaj w Gdańšćanskej łódźnicy z knježerstwom za kulojtym blidom jednał. Hladajo na sylnu Solidarność z mjeztym dźesać milionami čłonow a na přiběracu njespokojnosć w kraju njewidźachu komunisća žanu druhu móžnosć, hač jednanjam z opoziciju přizwolić. Přiwšěm sej woni wuwojowachu, zo wobchowaja sej njewotwisnje wot wólbneho wuslědka 65 procentow mandatow w parlamenće. Opozicija docpě 35 procentow. Najebać to mějachu Polacy wólby za swobodne. Lěto pozdźišo sta so Lech Wałęsa z prezidentom Pólskeje.
