Peter Čačko z Bratislavy rozprawja za Serbske Nowiny

Dźeń wote dnja su ranja a zažne wječory za Bratislavčanow hotowe čwěle, w prěnim rjedźe za tych, kotřiž su w měsće, z předměstow abo blišeje wokoliny z awtom po puću na dźěło resp. po swjatoku na dompuću. Dźesatki kilometrow dołhe kolony na wšěch přijězdnych dróhach a nastajnosći zatykane jězdnje znjepřijomnjeja wobdźělnikam wobchada žiwjenje. Nětko je wšak wuhladow na lěpše časy. Po dołhich, cyłych třinaće lět tra­jacych přihotach z tajkimi a hinašimi planami předleži skónčnje projekt wu­puća z mizery. Tele dny staj minister za wobchad­ Roman Brecely a španiska twarska firma Cintra podpisałoj zrěčenje wo natwarje awtodróhoweho wobjězda Bratislavy. Hdyž budźe trasa kołowokoło stolicy srjedź lěta 2020 hotowa, „wotpopadnje“ wona centrumej wšědnje dźesaćitysacy wozydłow, wěšća wobličenja ekspertow. Za wobjězd cyłkowneje dołhosće 59 kilometrow nałoži stat dwě miliardźe eurow.

Zwada mjez Europskej uniju a Pólskej justicneje reformy dla traje dale

Waršawa. Čłonojo pólskeho knježerstwa kaž tež wulki dźěl zapósłancow sejma mějachu srjedu tydźenja po jeho posedźenju chětro nuzne: Wšitcy chwatachu do Torunja, zo bychu so na poswjećenju noweje cyrkwje wobdźělili. Přeprosył bě jich pater redemptoristow Ojciec Rydzyk. Tón njeje jenož nawoda katolskeho rozhłosoweho sćelaka Radio Maryja a telewizijneho sćelaka TRWAM, ale stara so tež wo nowe Bože domy w kraju. Nowo­twar w Torunju su po słowach Rydzyka jeno z pjenježnych darow ludźi zwoprawdźili. W tym zwisku wón přitomnych politikarjow tohorunja wo dary prošeše. W nowej Toruńskej cyrkwi, kotrejež wołtarnišćo kapałku zemrěteho bamža Jana Pawoła II. napodobnja, je so Rydzyk tež sam zwěčnił. Na hoberskim škleńčanym woknje je wón poboku bamža zwobraznjeny. Kritikarjam je wobdźělenje knježerstwa na swjatočnosći znamjo wuskeho splećenja noweho pólskeho nawodnistwa z cyrkwju kraja.

Z WOBYDLERJOW Čěskeje je nimale dźesaćina, něhdźe 1,2 milionaj ludźi, žiwa pod hranicu dochodoweje chudoby. Pola samostejacych wučinješe wona loni 10 220 krónow (379 eurow), pola swójbow z dźěćimi 21 461 krónow (795 eurow). Najnowše daty w tym nastupanju wozjewja Čěski statistiski zarjad (ČSÚ). Materielna situacija ludnosće bě při- wšěm najlěpša minjenych dźesać lět. „Dochody domjacnosćow su realnje wo 2,4 procenty přibyli. Najbóle polěpšili su so domjacnosće dźěławych“, přispomnja k tomu zastupnica ČSÚ Šárka Šustová. Dochodowa chudoba hrozy štyrjom procentam dźěławych. Pod jeje hranicu je sydom procentow rentnarjow, 15 procentow dźěći do 15 lět a 45 procentow bjezdźěłnych. Tři štwórćiny rentnarjow pod hranicu chudoby su samostejace a zwje­tša žónskeho splaha. Třećina dźěći pod hranicu chudoby wotrostuje w njedospołnych swójbach. Tak mjenowana depriwacija – njedostatk – nastupa 5,6 procentow Čechow a Čechowkow, cyłkownje něhdźe 590 000 ludźi. To je dobrych 100 000 mjenje hač lěta 2014. Depriwowany być rěka, njeměć znajmjeńša štyri wěcy z dźewjeć – na přikład telefon, płokawu, telewizor abo awto.