CUZORĚČNY je w Čěskej kóždy dźewjaty kwas. Najnowše daty Čěskeho statistiskeho zarjada (ČSÚ) wupokazuja, zo je so loni nimale 5 000 měšanych mandźelstwow wjazało. Do toho bě jich to ně- hdźe 4 000. Při tym je tak, zo sej mužojo najradšo Słowjanki bjeru. Předewšěm ženja so z Pólkami, Ukrainjankami a Rusowkami. Čechowki porno tomu za zapadnymi mužemi hladaja a wudawaja so na Němcow, Britow a Američanow. Žony móža při tym bóle wuběrać hač mužojo. W kraju je dźě wjele wjac wukrajnikow hač wukrajničow, wuswětla sociologowka Jiřina Šíklová. Najwoblubowaniše su pak přeco hišće čěsko-słowakske zmandźelenja. Tajkich je bjezmała třećina była. 830 Čechow je so ze Słowačku woženiło a 717 Čechowkow sej Słowaka za muža brało. „Słowakscy ludźo njejsu za nas wukrajnicy“, Šíklová k tomu přispomnja. Mjeztym zo ličba ryzy čěskich mandźelstwow hižo dlěje pola něhdźe 45 000 wob lěto stagněruje, budu měšane dale při­běrać, wědomostnica wěsći: „Dokelž so narody měšeja a podźěl wukrajnikow w kraju hišće přibudźe.“

Praha (ČŽ/K). Druhe koło wuzwolenja třećiny nowych senatorow je wuslědk prěnjeho přisamom na hłowu stajiło. Hdyž bě „hibanje njespokojnych“ ANO ministra-předewzaćela Andrea Babiša z wuhladom na dźesać zapósłancow hornjeje komory parlamenta do wotuma šło, je wone runje třoch dóstało. ČSSD premiera Bohuslava Sobotki bě pjeć mandatow kiwało, docpěła je jenož dwaj. Porno tomu mała KDU-ČSL, kiž bě so dweju senatorow nadźijeć móhła, njenadźicy pjećoch nažnja. Prawicowej ODS a TOP 09 pósćeletej kóžda dweju noweju zastupnikow do senata. Přiwšěm wobchowaja strony knježaceje koalicije ČSSD, ANO a KDU-ČSL z cyłkownje 48 sydłami wot 90 w hornjej komorje wustawowu wjetšinu. Komentatorojo maja wuslědk senatnych wólbow za selenu plistu Sobotce a Babišej. Wosebje Babiš je dyrbjał bolostnje začuć, zo je druhe koło běžało pod hesłom „wšitke tamne přećiwo ANO“. Přičina drje bě, zo žana druha strona njebě zwólniła, z „njespokojnymi“ koalěrować. Njemału starosć načinja zamołwitym wólbne wobdźělenje: Z 15,3 procentami bywa wone najniše wšěch časow.

Brüssel (SN/at). Serbiske multinarodne město Novi Sad budźe Kulturna stolica Europy 2021. Wo tym informuje komisija Europskeje unije, kotraž je namjet njewotwisneho gremija fachowcow sćěhowała, kónc tydźenja w Brüsselu. Komisar za kubłanje komisije EU Tibor Navracsics je optimistiski, „zo skića Novi Sad swojim wopytowarjam z Europy a ze swěta móžnosć, zo bychu sej město a jeho kulturne bohatstwa wotkryli, ale sej tež mnohotnosć europskich kulturow a naše zhromadne hódnoty wažili.“

Wurisanje wo titl Kulturna stolica Europy w kraju, kotryž je kandidat za přistup, je komisija EU w decembrje 2014 za města z Albanskeje, Bosnisko-Hercegowiny, Makedonskeje, Čorneje Hory a Serbiskeje startowała. Do wušeho wuběra za 2021 běštej so čornohórski Herceg Novi a serbiski Novi Sad dóstałoj.

W Novym Sadźe bydla Južni Serbja, Madźarojo, Słowakojo, Chorwaća, Romojo a dalše narodnosće. Město je nimo toho domizna Matice Srpskeje, kotraž ma tam wot lěta 1864 swoje sydło.

Praha (ČŽ/K). Z prěnim zjawnym koncertom po schorjenju na rak, operaciji brjucha, chemoterapiji a wuhojenskej kurje je sławny spěwar Karel Gott wčera w Praze wustupił. Za podium bě sej wuzwolił Malostranskou besedu, zo njebychu medije do kluboweho miljeja přistup měli. Podawk dožiwić je tež jeno 115 ludźi móh­ło. Mjez hosćimi běchu mnozy kolegojo a koleginy, tež spěwarce Dasha a Ilona Csáková. Z nimaj zainterpretowa Gott někotre duety. Hłownje pak je zanošował hity, kaž „Trezor“ abo „Lady Carneval“. Publikum je spěwne poskitki „Praskeho sołobika“ přewšo zahorjeny witał. W běhu koncerta jemu hosćo někotre razy stejo přikleskowachu a na kóncu dołho z owacijemi sławichu. „Knjez Gott bě we dobrej formje, na žurli knježeštej wuběrna atmosfera a energija“, rjekny powěsćerni ČTK rěčnica spěwarja Aneta Stolcová. „Malostranskou besedu je sej wón za swój prěni koncert tohodla wuzwolił, dokelž sam na zarjadowanja a wustupy sem rady chodźi. Jeho přeće pak je tež było, zo by tónle wječor był z ćichim nawrótom na jewišćo, bjez wulkeho medialneho humbuka“, wona dale praji.