Tež Ukrainjenjo wo azyl proša

štwórtk, 18. awgusta 2016 spisane wot:
Praha (ČŽ/K). W prěnich sydom měsacach je lětsa 872 wukrajnikow w Čěskej wo azyl prosyło. Z rozprawy, kotruž wozjewi přisłušny wotrjad čěskeho nutřkowneho ministerstwa, wuchadźa, zo dobru štwórćinu požadarjow wo azyl wučinjeja ukrainscy staćenjo, kaž je tomu tež hižo w zašłych lětach było. Nic mjenje hač 289 z nich chcyše w Čěskej nowu domiznu nadeńć. Druhi najwjetši dźěl ze 133 požadarjemi tworja Irakčenjo. Cyle njenadźicy je so lětsa 64 chinskich staćanow na čěske zarjady z próstwu wobroćiło, dać jim politiski azyl. Dźenik Hospodářské noviny bě rozprawjał, zo jedna so při tym wo skupinu křesćanow, kotřiž běchu so w domiznje swojeje wěry dla přesćěhowani čuli. W tym padźe wšak dósta so Praske knježerstwo chětro do wuskosćow – hladajo na wuchwalowane přewšo spomóžne poćahi ze Chinu njeby sej wone z njej w žadyn padźe rozkidać chcyło. Něhdźe 50 požadarjow wo azyl pochadźeše z Kuby a Syriskeje, něšto wjac hač 30 z Vietnama a Armenskeje. Loni bě w Čěskej 1 525 wu­krajnikow próstwu wo azyl stajiło. 217 ludźom dowolichu nachwilny přebytk w kraju.

Pistolu na hród pašowałoj

srjeda, 17. awgusta 2016 spisane wot:

Praha (dpa/SN). Razne wěstotne njedostatki wotkryli su žurnalisća na Praskim hrodźe, sydle čěskeho prezidenta Miloša Zemana. Reporteromaj nowiny MF dnes so poradźi, skradźu płunowu pistolu a nožej přez kontrolu při zachodźe hrodoweho areala pašować. Pistolu běštaj pod pasom cholowow schowałoj. Nožej ležeštej do papjery zawitej w aktowej tobole, kaž nowina w swojim internetnym wudaću rozprawja. „Dwaj metraj dale steješe wojak. Nichtó ničo njepytny. Snano bě jim to tež wšojedne“, reporteraj pisataj.

Rěčnik prezidenta je wotkrywansku akciju mjeztym wótrje kritizował. „Hdyž žurnalisća rólu teroristow hraja a spytaja brónje na hród přinjesć, potom je to njezamołwite“, měni Jiří Ovčáček na Twitteru. Tydźenja zahajene kontrole maja po jeho słowach wěstoće wopytowarjow słužić. Prezident Zeman bě stajnje zaso z islamokritiskimi wuprajenjemi napadnył. Fachowcy za wěstotne naležnosće kritizuja, zo so nětko dołhe rynki ludźi před kontrolnišćemi tworja. Tež na nich móhli so terorisća měrić.

Merkel wopyta Čěsku

wutora, 16. awgusta 2016 spisane wot:
Praha (ČŽ/K). Němska kanclerka Angela Merkel (CDU) wopyta hišće w awgusće susodnu Čěsku. Tole zdźěleja čěske medije, po­wołujo so na spušćomne diplomatiske žórła. Jako termin jeje wizity mjenuja 25. žnjenc. Wopyt načolneje němskeje politikarki je po wudawanju powěsćernje ČTK hižo dlěje planowany. Za čas wopyta kanclerki w Praze je zetkanje z čěskim prezidentom Milošom Zemanom předwidźane. Rozjimać chcetaj wonaj mjez druhim njepřewinjenu migracisku krizu, wo kotrejž wšak kóždy z njeju chětro rozdźělne pozicije zastupuje. Na programje je tohorunja zetkanje z ministerskim prezidentom Bohuslavom Sobotku, z kotrymž wotmysli wysoki hósć nimo naležnosće ćěkancow wobjednać aktualne bilateralne­ prašenja. Naposledk bě kanclerka Merkel nalěto 2012 w čěskej stolicy přebywała, jednajo z tehdyšim premierom Petrom Nečasom kaž tež z prezidentom Václavom Klausom. Te­hdy wona zwurazni, zo dopomina so rady na Prahu, dokelž bě tam w 1980tych lětach trójce na studijnym přebytku była.

Šwarny přibytk awtow

póndźela, 15. awgusta 2016 spisane wot:

Praha (ČŽ/K). Wobstatk awtow w prěnim połlěće 2016 je w Čěskej zrostł wo 116 000 jednotkow, z čimž wučinja wón tuchwilu 5,275 milionow wozydłow. Najrozšěrjeńši typ je Škodowka, kotrychž je 1,191 milionow we wobchadźe, sćěhuje Volkswagen z 438 337 registracijemi, na třećim Ford z 399 030 jězdźidłami. Tole wuchadźa ze statistiki, kotraž k tomu přeradźa, zo wobsedźa Češa 697 Ferrarijow, 5 450 Porschow, 123 Lamborghinijow, 167 Rolls-Roycesow, 16 Maybachow a 15 Bugattijow.

Překwapjace je, zo ma swojich „přiwisnikow“ hišće 21 630 Trabantow a 13 116 Wartburgow z produkcije NDR. Tele přinošuja wšak w njemałej měrje k tomu, zo wučinja přerězna staroba awtow 14,9 lět. Z 10,5 milionow wobydlerjow wobsedźi teoretisce kóždy druhi awto. Nastupajo starobu je situacija hišće wo wjele hórša pola motorskich, wučinjaca nic mjenje hač 33 lět. Najwjace jězdźi hišće čěskich Javow, mjenujcy 455 598 mašinow, sćěhuja ČZetki z 82 857 a Hondy z 73 070 mašinami.

„Naša olympiska hańba“

pjatk, 12. awgusta 2016 spisane wot:

Pólska dyrbi so z dopingom sportowca na olympiskich hrach rozestajeć

Waršawa. Po chětro wobšěrnym rozprawnistwje medijow wo systematiskim dopingu w ruskich rjadach dyrbja Polacy tele dny na wědomje brać, zo tež jich sportowcy „swjeći“ njejsu. Minjenu wutoru běchu zběharjej wahow Tomaszej Zielińskemu na olympiskich hrach w brazilskim Rio de Janeiru doping dopokazali. Na to su jeho z mustwa a tak tež z olympiskeje wsy, hdźež sportowcy zhromadnje bydla, wustorčili a domoj pósłali. Zieliński bě zakazany dopingowy srědk nandrolon brał. „Naša olympiska hańba“, piše sportowy komentator Mirosław Żukowski w Rzeczpospoliće. Tohorunja wohańbjeny je předsyda zwjazka pólskich zběharjow wahow Szymon Kołecki připowědźił, zo zastojnstwo złoži.

Šef zběharjow wahow wotstupi

štwórtk, 11. awgusta 2016 spisane wot:
Waršawa (dpa/SN). Po pozitiwnych dopingowych probach dweju atletow je předsyda zwjazka pólskich zběharjow Szymon Kołecki swój wotstup připowědźił. Wón chcył zastojnstwo 16. awgusta złožić, wozjewi pólska powěsćernja PAP. „Je mi žel. Hańbuju so za to, štož je so stało. Móžu so jeno zamołwić“, jeho powěsćernja cituje. Do toho běchu pólskeho zběharja, europskeho mištra Tomasza Zielińskeho, dopinga dla z olympiskeho mustwa wuzamknyli. Pola 26lětneho, kotremuž přicpěwachu w klasy hač do 94 kilogramow olympisku medalju, běchu anabolny steroid nandrolon zwěsćili. To zdźěli pólski olympiski komitej. W swojim stejišću přeradźi Kołecki hišće dalši dopingowy pad: Zběhar Krzysztof Szramiak bě tohorunja dopingowy srědk brał. Wón pak njebu za olympiske mustwo nastajeny.

Paducham awtow pomhali

srjeda, 10. awgusta 2016 spisane wot:
Mladá Boleslav (dpa/SN). W Čěskej su sobudźěłaćerjo statnych institucijow po wšej Europje skutkowacym paducham awtow pomhali. Sobudźěłaćer zapisowarnje jězdźidłow w Mladej Boleslavje je pomhał, kradnjene luksusowe wozy přizjewić. Jězdźidła typa Range Rover, Audi a BMW běchu paduši z Němskeje, Aw­striskeje a Słowakskeje přiwjezli, kaž čěska policija informuje. Dwanaće awtam w cyłkownej hódnoće 740 000 eurow su po tymle puću nowe dokumenty a tak zdobom nowu identitu wobstarali. „Pikantne je, zo bě sej wobskorženy zastojnik sam jedyn z legalizowanych přezpólnych awtow tunjo kupił“, zdźěla rěčnik policije. W padźe zasudźenja hrozy mužej a dwěmaj pomocnikomaj jastwo hač do šěsć lět. W podobnym padźe přepytuje kriminalna policija w Karlovych Varach přećiwo sobudźěłaćerjej měšćanskeho zarjadnistwa w Kraslicach na zapadźe kraja. Wumjetuja jemu, zo je wjace hač 30 awtow přizjewił, bjez toho zo by jich pochad a starobu pruwował. Dźěl jězdźidłow bu w druhich krajach Europskeje unije pokradnjeny.

Nawal turistow

srjeda, 10. awgusta 2016 spisane wot:
Zagreb (ChŽ/K). Chorwatska dožiwja lětsa tajki nawal wukrajnych wopytowarjow kaž lědma hdy. Minister za pućowanje Anton Kliman wočakuje lětsa „rekord nastupajo­ ličbu turistow“ a w tym zwisku dochody wjac hač wosom miliardow eurow, rozprawjeja chorwatske medije. Kraj podłu Adrije profituje předewšěm z toho, zo so njemało Srjedźoeuropjanow dowola w sewjernej Africe abo Turkowskej wzda, bojo so tam terorowych nadpadow. Nahladnje rozrostła je ličba turistow z Němskeje a Awstriskeje, ze Słowjenskeje, z Čěskeje a Pólskeje. Najwoblubowaniše wočerstwjenišća su Istriska, dalmaciske město Trogit, Split a Dubrovnik. Tež stolica je dźeń a přiwabliwiša. W prěnich pjeć měsacach­ 2016 je Zagreb hižo něhdźe 337 000 turistow pohosćił, štož je porno samsnemu časej loni přirost wo cyłych šěsć procentow. Z wjetšim nawalom turistow běchu bjeztoho ličili, a tak natwarichu resp. zrekonstruowachu sčasom 40 nowych hotelow a wutworichu cyły rjad campingownišćow. Turizm je jedyn z najwunošnišich sektorow chorwatskeho hospodarstwa, dokelž přinošuje 15 procentow k bruttosocialnemu produktej.

Ćěkanc w čěskim jastwje

wutora, 09. awgusta 2016 spisane wot:
Praha (dpa/SN). Jedna z organizacijow, kotrež ćěkancam pomhaja, je postupowanje čěskich instancow napřećo migrantam raznje kritizowała. Zamołwići su próstwu muža ze Sri Lanki wo azyl pječa dospołnje ignorowali, šwika Praska njeknježerstwowa organizacija OPU. „W Čěskej njeje so nichtó z jeho žiwjenjoběhom a z próstwu wo azyl zaběrał, kotruž bě po přizemjenju na Praskim lětanišću­ přednjesł“, rjekny prawiznica OPU Eva Holá čěskim nowinarjam. Muž hinduistiskeho wěrywuznaća je přez swoje dožiwjenja we wobydlerskej wójne trawmatizowany. Sudnistwo je Sri-Lankačana k wosom měsacam jastwa zasudźiło, dokelž měješe falšowane papjery při sebi. Muž chłostanje tuchwilu wotsedźi. „By-li wón woprawdźe přesćěhany był, by při cłownej kontroli swoju woprawdźitu identitu přeradźił“, rěka we wopodstanjenju sudnistwa. Organizacija za podpěru ćěkancow chcyła mužej nětko pomhać, tola hišće próstwu wo azyl stajić. W Sri Lance howrješe w lětach 1983 do 2009 wobydlerska wójna. Tehdy je něhdźe 100 000 ludźi zahinyło.

Na kole k bamžej

póndźela, 08. awgusta 2016 spisane wot:

Bratislava (SŽ/K). Skupina 28 koleso­warjow-putnikow je tuchwilu po puću ze stolicy Słowakskeje do Roma. „Njesu bamžej poselstwo“, mjenuje dźenik SME zaměr jich wuprawy. Startowali su na přibližnje 1 300 kilometrow dołhu jězbu z Bratislavskeho hrodu, a swjate město wotmysla docpěć njedźelu 14. awgusta. Awdiencu pola bamža Franciskusa změja putnicy-kolesowarjo najskerje 17. awgusta. Jich poselstwo nastupa po spomnjenej nowinje Swjate lěto smilnosće a wopřijima tohorunja přeprošenje bamža do Słowakskeje.

Wobdźělnicy wuprawy w starobje 18 do 50 lět su wšitcy čłonojo křesćanskeho sportoweho hibanja Słowakski worjoł. Na předewzaće su so wotpowědnje přihotowali, a kóždy z nich je sej do toho 1 300 do 1 500 kilometrow natrenował. Nětkole absolwuja wšědnje něhdźe 130 kilometrow. Přewodźeni su wot dweju techniskeju wozow a jednoho telewizijneho. Minister za šulstwo Peter Plavčan bě kolesowacych putnikow rozžohnował ze słowami: „Wažu sej waše pućowanje. Wone přinošuje k přećelstwu a dorozumjenju mjez ludami.“

Serbska debata

nowostki LND