Praha (ČŽ/K/SN). Powołanskich wohnjowych wobornikow susodneje Čěskeje su w lětušim „horcym“ měsacu juliju wołali, zo bychu dohromady 2 388 wohenjow hašeli. Wšědnje su přerěznje tuž 77 razow zasahnyć dyrbjeli. To je nahladnje wjac, hač wučinja wjelelětny přerězk, wupokazowacy 49 zasadźenjow wob dźeń.

Porno lońšemu julijej z 2 688 wohenjemi su wobornicy lětsa w žnjencu přiwšěm trochu mjenje „za dźěło“ měli. Informacije po­dała je čěskim medijam rěčnica Wohnjowoborneho korpsa Nicole Studená. Ekstremneje suchoty dla su hašerjo předewšěm z wohenjemi w přirodźe činić měli, na přikład na žitnišćach a w lěsach – tajkich bě 1 117. „Nastali su wohenje zwjetša njekedźbliwosće ludźi, hłownje lochkomyslneho wobchadźenja z wotewrjenym wohenjom dla“, Stude­ná k tomu přispomnja. „Ale tež kurjerjo bě­chu­ chcyjo nochcyjo zapalerjo.“ Lětuše julijske wohenje pak su sej bohužel tež dźesać smjertnych woporow žadali. Ćešich a mjeńšich zranjenjow poćerpje 92 ludźi. Měsac žnjenc pak njeje ani tón z najwjace alarmami był. Přetrjechił je jón hišće jutrownik z 3 064 zasadźenjemi wohnjowych woborow, wšědnje přerěznje tuž 103.

Praha (ČŽ/K/SN). Policiji dowěrja w susodnej Čěskej 72 procentow wobydlerjow. To wuchadźa z naprašowanja, kotrež je zwěsćowarnja zjawneho měnjenja STEM w juliju přewjedła. Zdobom je to najwjetša nahladnosć „škitarjow zakonja“ za minjene 22 lět. 1997 bě so jenož 25 proc. ludźi na policiju spušćało. Wójsku dowěrja samo 75 proc., měšćanskej policiji 59 proc.

Wot lońšeho julijskeho naprašowanja je dowěra k wěstotnym institucijam čěskeho stata nahladnje zrostła – to wučinješe wona 66 procentow.

Wojerskej organizaciji NATO dowěrja 60 procentow woprašanych, štož je porno lońšemu přirost wo tři dypki. Nastupajo měru dowěry k policiji, wójsku a měšćanskej policiji njewobsteja mjez muskimi a žónskimi respondentami žane wulke rozdźěle, ani po starobje ani po zdźěłanosći, kaž awtorojo studije zwěsćeja.

WŠUDŹEBYŁ we woprawdźitym zmysle słowa je wěsty Miroslav Šnejdar z morawskeje Ostravy bjeze wšeho. Z čistym swědomjom móže wón rjec, zo je wo­py­tał wšitke kraje swěta. Je tež we wšitkich milionowych městach na wšěch kontinentach pobył. Za tónle zaměr dyrbješe pjeć razow do dalokeje Chiny pućować. Dwanaće lět swojeho žiwjenja bě wón na 366 wukrajnych pućowanjach. Bjezmała by so jako swětowy rekordnik do sław­neje Guinnessoweje knihi rekordow dóstał, ale w Londonje su wustajeć měli, zo ni­ma wón z Antarktiki wobkrućenja wšitkich statow, kotrež su na njej ze stacijemi zastupjene. Rekord za wopyty wšitkich krajow swěta připisachu za to Američanej, byrnjež tomu wizita Sewjerneje Koreje falowała.

Praha (ČŽ/K/SN). Kónc junija je w Čěskej kwota bjezdźěłnosće 2,6 procentow wučinjała a tuž runje tak wysoka była kaž w meji. Ze 195 723 dźěło pytacymi wo­sobami je jich najmjenje wot lěta 1997. Njewobsadźenych dźěłowych městnow bě 30. junija w předewzaćach kraja cyłkownje 342 510. To wozjewja Čěski dźě­łowy zarjad. Najmjenje bjezdźěłnych mě­ješe kaž hižo w róžowniku Pardu­bic­ski wobwod, mjenujcy jeničce 1,7 procentow. W južnočěskim wobwodźe zniži so kwota z mejskich 1,8 proc. tohorunja na 1,7 proc. Stolica Praha ma wobstajnje 1,9 proc. bjezdźěłnych. Poměrnje najwyša ze 4,2 procentomaj je kwota přeco hišće w Morawsko-šleskim wobwodźe, Ústíski ma jich ze 4,0 procentami jenož wo něšto mało mjenje, mjeztym zo registruje južnomorawski wobwod 3,2 procentaj.

Agentura Centrum za zwěsćowanje zjawneho měnjenja je nastupajo bjezdźěłnosć w juniju wosebite naprašowanje přewjedła. Wulka wjetšina respondentow při tym zwurazni, zo jeje kwota hižo wulce njespadnje. Tři pjećiny Čechow maja za to, zo wjetšina bjezdźěłnych wo dźěło scyła njerodźi.