PŘIČINY WOBCHADNYCH NJEZBOŽOW, na kotrychž su Škodowki wobdźělene, přepytuje sekcija ‚wobchadna wěstota‘ Mladoboleslavskeje awtotwornje Škoda. W dźesach lětach wobstaća su jeje fachowcy 1 048 wobchadnych njezbožow přepytowali a zwěsćili, zo je 90 procentow z nich „faktor čłowjek“ zawinił. Wo wšitkich padach wjedźe předewzaće dokładnu statistiku. Z njeje wuchadźa, zo bywa najčasćiši zjaw njezbožow zražka z druhim wozydłom, štož je so 380 razow stało. Druhi najčasćiši zjaw z 278 padami je koliděrowanje z wosobami. Sćěhuje prasnjenje awta do murje, štoma abo něčeho druheho twjerdeho. Najrědše z runje dźewjeć padami su njezboža z kolesowarjemi. 747 razow dóńdźe k frontalnym zražkam.

Najčasćišo je k njezbožam dochadźało přewulkeje spěšnosće abo njewobkedźbowanja předjězby dla. Pjatk je „najstrašniši“ dźeń tydźenja – loni bě so z cyłkownje 17 453 wobchadnych nje­zbožow wjetši dźěl stał pjatk. Tón dźeń nawróćeja so mnozy mužojo z městow, w kotrychž wob tydźeń dźěłaja, k swojim swójbam, abo podawaja so swójby z městow na kónctydźenski přebytk w dači.

Planowane pozběhnjenje pólskeho kardinala zbudźa nowu diskusiju

Waršawa. W Pólskej je nowa debata wo antisemitizmje w towaršnosći a wosebje w cyrkwi wudyriła. Diskusiju nastorčił bě chcyjo nochcyjo bamž Franciskus. Wón bě 21. meje dekret wo „rjekowskich skutkach“ kardinala Augusta Hlonda (1881–1948) wozjewił a zahaji tak proces zbóžnoprajenja duchowneho, kiž bě wěsty čas samo nawoda pólskich biskopow. Pólska biskopska konferenca bě wo zbóžnoprajenje kardinala prosyła a dokumenty wo njesebičnym skutkowanju Hlonda na dobro kraja zapodała.

Jenož dwaj dnjej po wozjewjenju bamžowskeho dekreta je Ameriski židowski kongres z rabbijom Davidom Rosenom na čole oficialny protestny list we Vatikanje zapodał. W dokumenće židowski kongres na to skedźbnja, zo bě August Hlond swój čas wuznawacy antisemit. Tak bě pólski kardinal wěriwych 1936 w pastyrskim lisće namołwjał, židowske wobchody bojkotować. Nimo toho wón twjerdźeše, zo Židźa pornografiju rozšěrjeja a špatny wliw na pólsku młodźinu wukonjeja. List běchu tehdy we wšitkich wosadach wozjewili.

Praha (ČŽ/K). Čěske hospodarstwo je w prěnim kwartalu 2018 wo 4,4 procenty přibyło a tak pomałšo rostło hač loni w štwórtym kwartalu, jako bě wone po wšej Europskej uniji rekordnych 5,5 procentow přiwzało. To zdźěla Čěski statistiski zarjad. „Tele wuwiće pokazuje na to, zo je čěska ekonomija kónc 2017 na wjeršku swojeho hospodarskeho cyklusa stała a zo budźe róst wotnětka w pomałšim tempje přibywać“, hódnoći situaciju analytikar Raiffeisenoweje banki Jakub Červenka. Za lětsa wěšći wón přirost domjaceho socialneho produkta we wobjimje 3,5 procentow. Najebać pomałši róst ekonomije je so přerězna mzda w lětušim prěnim kwartalu wo nic mjenje hač 8,6 procentow zwyšiła a wučinješe k 31. měrcej 30 265 krónow. Inflacisku ratu wotćahnywši so přerězna mzda realnje wo 6,6 procentow zestopnjowa. Dźakowano spomóžnemu wuwiću čěskeho hospodarstwa a z tym zwisowaceho ćišća na mzdy njedostatka dźěłowych mocow dla je přerězna mzda wot lěta 2014 pospochi stupała. Fakt pak je, zo štyri pjećiny dźěławych přerěznu mzdu njedocpěwaja.

Praha (ČŽ/K). Kaž bě čěski prezident Miloš Zeman připowědźił, je wón předsydu ANO Andreja Babiša druhi raz za premiera powołał, njewočaknywši wuslědk nutřkostronskeho referenduma ČSSD. Lisćinu ministrow noweho kabineta wotmysli Babiš hakle potom přednjesć, hdyž je wěste, zo wjetšina socialdemokratiskeho čłonstwa wobdźělenje ČSSD na knježestwje schwali. Wuhlady na pozitiwny rezultat wothłosowanja su pječa dobre. Nowinarjam předsyda ANO po swojim powołanju rjekny, zo móhło k pomjenowanju noweho kabineta 26. junija dóńć a k wotumej wo dowěrje w sejmje 11. julija. Tónkróć ma Babiš skerje šansu na dowěru delnjeje komory. Wšako su tež hłosy zapósłancow ČSSD wěste kaž tohorunja komunistiskich zapósłancow, po tym zo je wón tele dny žadanju KSČM za zdawkowanjom restitucijow cyrkwi w dalokej měrje wotpowědował. Poroki, zo so komunisća takle znowa na móc dóstanu, wuwróća Babiš z pokazom na to, zo staj tež Václav Havel a Václav Klaus swój čas z podpěru KSČM knježiłoj.