Nop swjateje pokradnył
Marek Krawc rozprawja wo aktualnje rozjimanych temach w Čěskej
Praha. Tydźenja wutoru je paduch z cyrkwje w Jablonném v Podještědí blisko sakskeje mjezy drohotnu relikwiju pokradnył. Skućićel rozpači zamk witriny a wza nop swjateje Zdźisławy sobu. Zastojnicy policije wšak jeho na wideju dohladowanskeho systema derje spóznachu. Wutoru wječor krótko do napoł sedmich běchu padustwa dla telefonat dóstali.
Duchowny bě na spočatku Božeje mšě dyraj zasłyšał a krótko po tym ćěkaceho muža wuhladał. Dokelž wotměwachu so w měsće dalše zarjadowanja, bě mjenje ludźi hač hewak kemši přišło. Po wšěm zdaću bě skućićel z tym ličił, praji Praski arcybiskop Stanislav Přibyl. „W jednym z pódlanskich wołtarjow je z lěsycu škitany row swjateje Zdźisławy. Na wołtarju před lěsycu běše hač do wčerawšeho nop swjateje wustajeny“, wón znazorni.
Susodźa inwestuja miliardy za nowe brónje
Wójsko wostanje hłowna tema powěsćow zašłeho tydźenja w Pólskej
Waršawa (dpa/SN/MG). Rozsud USA, brigadu 4000 wojakow do Europy njepósłać, Pólsku njepotrjechi. Zamylace rozprawy wšelkich nowinow wo tym je pólske knježerstwo dementowało. „Ličba US-ameriskich wojakow w Pólskej mjeńša njebudźe“, zakitowanski minister Władysław Kosiniak-Kamysz we Waršawje rjekny. Po jeho wuprajenjach kraj samo zaměrnje na tym dźěła, ličbu wojakow zwyšić. Wice-premierminister Cezary Tomczyk je rozprawam tohorunja znapřećiwił: „To wěrno njeje. Tuta zdźělenka potrjechi Němsku. Wona Pólsku njepotrjechi“, wón na platformje X pisaše. Prezident USA Donald Trump planuje, dohromady 5000 wojakow ameriskeho wójska z Němskeje wotćahnyć. Rozprawy wšelkich medijow USA su nětko tomu přinošowali, zo hladajo na ličbu wojakow po wšej Europje wěsty njeměr knježi.
Namóc na kopanišću
Marek Krawc rozprawja wo aktualnje rozjimanych temach w Čěskej
Praha. Na derbyju mjez Praskimaj koparskimaj klubomaj Slavia a Sparta je sobotu wječor k bijeńcy dóšło. Stotki přiwisnikow Slavije ćěrjachu w domjacym stadionje Eden štyri mjeńšiny do kónca hry z pyrotechniku přez hrajnišćo na stronu fanow přećiwniskeho mustwa. Swětłowe rakety mjetajo nadpadnychu wjacorych fanow a tež hrajerjow, kaž na přikład Jakuba Surovčíka, wrotarja Sparty. Na to wopušćichu koparjo Sparty stadion, dokelž so hižo wěsći nječujachu. Šef předsydstwa Slavije Jaroslav Tvrdík wozjewi, zo hru hižo njedohraja.
Wojacy, kontrole a lěsny woheń
Tole ludźi w Pólskej tuchwilu zaběra
Waršawa (dpa/SN/MG). Po tym zo bě prezident USA Donald Trump připowědźił, zo chce 5 000 wojakow USA z Němskeje wróćo zwołać, je Pólska swoju zwólniwosć zwurazniła, wjace ameriskich wojakow přiwzać. „Mamy za to trěbnu infrastrukturu“, rjekny prezident Karol Nawrocki na wopyće pola pólskeho wójska w Litawskej. „Budu Trumpa wo to prosyć, wojakow dale w Europje stacioněrować.“ Do kotreho kraja Trump swojich wojakow přepołoži, pak wón sam rozsudźi. Při nastupnym wopyće Nawrockeho zašłu nazymu bě Trump prawicarsko-konserwatiwnemu prezidentej slubił, ličbu wojakow w Pólskej njepomjeńšić. Tuchwilu je w Pólskej nimale 10 000 wojakow USA stacioněrowanych, rjekny Nawrocki.
Babiš a Zelenskyj so zetkałoj
Marek Krawc rozprawja wo aktualnje rozjimanych temach w Čěskej
Praha. Čěski premier Andrej Babiš je so zašłu njedźelu z ukrainskim prezidentom Wolodymyrom Zelenskym zetkał. Składnosć k tomu měještaj politikarjej na kromje wjerškoweho zetkanja Europskeho politiskeho zjednoćenstwa w Jerjewanje. Rozmołwa traješe nimale hodźinu a Babiš po tym zwurazni, zo sej wobaj bórzomny kónc wójny přejetaj. Posledni raz bě Babiš Zelenskeho w lěće 2019, hišće do wudyrjenja wójny w Ukrainje, zetkał. Wulke prašenje při rozrisanju konflikta mjez Ruskej a Ukrainu je, štó móhł měrowe jednanja nawjedować. „Europska unija dyrbi z woběmaj stronomaj jednać. Nadźijamy so, zo so USA a Iran w zwisku z Hormuskim přeliwom dojednaja. Hdyž tam měr knježi, móže so Trump zaso na swoju wodźacu rólu jako wujednar mjez Ruskej a Ukrainu koncentrować“, je čěski premier přeswědčeny. Ruska mjenujcy wotpokazuje, zo wodźacy politikarjo Europy při rozrisanju konflikta aktiwnje sobu dźěłaja.
Poczobut zaso swobodny
Nimo pólskeho žurnalista smědźa so tež pólscy šoferojo wjeselić
Waršawa (dpa/SN/MG). Po pjeć lětach su srjedu w Běłoruskej prominentneho pólskeho žurnalista z jastwa pušćili. Tole zeskutkownichu we wobłuku wuměny jatych mjez woběmaj krajomaj. „Andrzej Poczobut je swobodny! Witaj do pólskeho domu, mój přećelo“, pisaše pólski premierminister Donald Tusk na platformje X. K tomu wón foto wo tym wozjewi, kak Poczobuta na hranicy witaja. Wuměnu jatych bě posrědkowar USA John Coale dojednał. 53lětny Poczobut je čłon pólskeje mjeńšiny w Běłoruskej. Mnohe lěta bě wón za pólski dźenik „Gazeta Wyborcza“ z kraja rozprawjał, w kotrymž Aleksander Lukašenko awtoritarnje knježi. W nalěću 2021 jeho zajachu a do jastwa tyknychu. W juliju 2023 jeho na wosom lět w chłostanskej koloniji zasudźichu, jeho wusudaj rěkaštej „naškaranje k hidźe“ a „namołwa k jednanjam přećiwo wěstoće stata“. Aktiwisća za čłowjeske prawa Poczobuta jako politiskeho jateho zastopnjowachu. Loni spožči jemu EU-parlament myto Sacharowa za duchownu swobodu.
Dźěći předołho před wobrazowku
Marek Krawc rozprawja wo aktualnje rozjimanych temach w Čěskej
Praha. Wjace hač połojca čěskich dźěći, kiž su młódše hač lěto, hlada prawidłownje filmy abo wideja. Konkretnje je to 55 procentow ćěšenkow, kiž maja wšědnje šmóratko, tabletowy kompjuter abo wobrazowku telewizora před wočomaj. Tole je wuslědk studije powšitkownje wužitneje organizacije Zvedni hlavu (Zběhń hłowu) a załožby O2.
Praha ma noweho arcybiskopa
„Europa je dušu měła, ma dušu a dyrbi ju tež dale měć. To njeje jenož socialny a ekonomiski projekt“, rjekny nowy Praski arcybiskop Stanislav Přibyl sobotu na swjatočnej Božej mši, na kotrejž bu do noweje funkcije zawjedźeny.
Praha (SN/LuNo). Wjac hač wosom stow prošenych hosći je so sobotu w Praskej tachantskej cyrkwi swj. Víta na Praskim hrodźe a po tym na swjedźenju w bliskich zahrodach arcybiskopstwa zešło, zo by swjatočnu intronizaciju 38. Praskeho arcybiskopa a 26. čěskeho primasa msgr. Stanislava Přibyla sćěhowało. Tež na Hradčanskim naměsće běše so syła wěriwych z cyłeje Čěskeje a blišeje wokoliny zhromadźiła. Wjedro běše rjane, wšitcy začuwachu jónkrótny wokomik a atmosferu połnu optimizma a nadźije.
Čěska połny podźěl njezwjedźe
Marek Krawc rozprawja wo aktualnje rozjimanych temach w Čěskej
Praha. Dwaj procentaj nutřkokrajneho bruttoprodukta maja čłonske staty Sewjeroatlantiskeho zakitowanskeho zwjazka NATO tuchwilu za swoje zakitowanje nałožować. Lětsa pak njemóže knježerstwo Andreja Babiša tutón nadawk spjelnić a jenož 1,7 procentow do wójska tyknje. Tutón rozsud su wosebje diplomaća USA kritizowali. Po zetkanju z Markom Rutte, generalnym sekretarom NATO, tydźenja štwórtk wuzběhny čěski premier Andrej Babiš, zo knježerstwo w Praze zakitowanje kraja jara chutnje bjerje. Nowinarjam wón rozjasni, zo jednotliwe kraje zakitowanskeho zwjazka swój podźěl w zwisku z nutřkokrajnym bruttoproduktom na rozdźělne wašnje wobličuja. Rutte po swojim wopyće připowědźi, zo chcedźa zakitowanske wudawki na wjerškowym zeńdźenju NATO w pražniku hišće raz tematizować.
„Bratraj z tesakom a při winje“
Pólska wot wólbneho dobyća Pétera Magyara w Madźarskej zahorjena
Waršawa. Přemóžace dobyće politikarja madźarskeje opozicije Pétera Magyara při wólbach parlamenta pólske medije přewšo wobšěrnje komentuja. Liberalne nowiny su sej wěste, zo je so „Madźarska nawróćiła“. To rěka, zo wotwobroća so nětko wot blokadoweje politiki dotalneho ministerskeho prezidenta Viktora Orbána přećiwo Europskej uniji w Brüsselu. Nowy premier Madźarskeje zaruča, zo politiku kraja změni a zdobom wuwiće Europskeje unije zaso pohonjuje.
Pólski ministerski prezident Donald Tusk je wólbnemu dobyćerjej w Budapesće euforisce gratulował. Tak chwali sej „wulke dobyće“ a „přemóžacy wuspěch“ Magyara na dobro madźarsko-pólskich poćahow a wšeje Europy. Žurnalisća tydźenika Polityka, wot wólbneho dobyćerja tohorunja zahorjeni, na to pokazuja, zo su Madźarojo „Orbána won ćisnyli“, zo pak je to hakle započatk. Přiwšěm je Magyar hižo připowědźił, zo chce někotre naprawy Orbána dale wjesć.
