Brno (dpa/SN). Morawska krajna knihownja w Brnje je tójšto knihow z namrěwstwa znateho spisowaćela Milana Kundery dóstała. Zwjazki waža nimale tysac kilogramow a pjelnja něhdźe 50 metrow regala, rěčnica muzeja zdźěli. Někotre z knihow měješe Kundera stajnje na swojim pisanskim blidźe. Čěsko-francoski awtor romanow a esejista bě 11. julija po dołhej chorosći 94lětny w Parisu zemrěł. Mjez knihami je francoske wudaće powědki „Kuzłar“ Vladi­mira Nebkowa a dźenikowe wudaće 1963 zemrěteho surealista Jeana Cocteauwa. Nimo toho namakaja so na přikład twórby eksistencialista Jeana-Paula Sartreho a dramatikarja Eugena Ionesca, ale tež partitura 7. sinfonije Ludwiga van Beethovena. Hižo loni bě Morawska knihownja w Brnje něhdźe 4 000 knihow z Pariskeje priwatneje biblioteki Kundery dóstała, zwjetša přełožki jeho twórbow. Swójsku čitarnju, tak mjenowanu biblioteku Milana Kundery, běchu w aprylu wotewrěli. Kundera bě w Brnje wotrostł. Wot lěta 1975 bydleše wón ze swojej žonu w eksilu w Francoskej. Morawska knihownja ma něhdźe štyri miliony medijow.

Pólski nutřkowny minister Kamiński z kolegami baltiskich krajow rěčał

Waršawa. Wojowarjo ruskeje priwatneje armeje Wagner na teritoriju Běłoruskeje zamołwitych w Pólskej dale znjeměrnjeja. Njedawna smjerć jich nawody Jewgenija Prigožina strach hišće zesylnja. Hłowne prašenje je, što zóldnarjo bjez swojeho charismatiskeho rozkazowarja nětko činja. We wojowanjach na Ukrainje wukmanjeni a nazhonići bojownicy móhli so snano přećiwo Pólskej měrić. Pječa dóstawaja w Běłoruskej samo wupokazy z nowym mjenom, zo móža do wukraja hić, bjez toho zo bychu jich tam jako „wagnerowcow“ identifikowali.

Dalša přičina ćežow su migranća, kotrychž běłoruski mócnar Aleksander Lukašenko – w nadawku ruskeho prezidenta Wladimira Putina – cyle zaměrnje do Pólskeje a dale do zapadnych krajow sćele, zo by wšu Europsku uniju wosłabił.

Po dlěje hač lěto trajacej přestawce su falowace čisła po dwěmaj měsacomaj wuchadźaceho časopisa Česko-lužický věstník 2021 nětko wušli. Jedna so wo štyri čisła za měsacy meja do decembra we wob­jimje 40 stronow, štož je něhdźe trójce wjac stronow hač zwučeny wobjim časopisa. Kaž přeco poskićuje věstník zajimawe teksty, kotrež njejsu – byrnjež za­pozdźene – čitarjej na škodu.

Jurij Łušćanski spomina na wuznamneho čěskeho sorabista Jiříja Mudru (1921–2009), kotryž by 2021 swoje 100. narodniny woswjećił. Katja Bran­kačkec je napisała nekrolog za serbskeho slawista Hinca Schuster-Šewca (1927– 2021), Kinga Kijo dopomina na pólsku sorabistiku Ewu Siatkowsku (1930–2020). W chronice spominaja na serbskeho duchowneho Clemesa Hrjehorja (1953– 2021), superintendenta Siegfrieda Alberta (1937–2021) a na w Čěskej bydlaceju sotru a bratra Luisu a Bohumíra Härtelec. Wobšěrniši nekrolog za jeničkeho jendźelskeho sorabista Geralda Stona (1932–2021) je Milan Hrabal napisał.

Marek Krawc rozprawja wo aktualnje rozjimanych temach w Čěskej

Praha. Inflaciska rata je so w susodnym kraju hižo znižiła a twaršćizny so po­tuńšeja – to zbudźi lóšt, swoje bydlenje zmodernizować dać. Zwostanje pak tola jedna starosć – njeje mjenujcy dosć ­rjemjeslnikow. Štóž so lětsa hišće z mysličku nosy, swoje bydlenje wot fachowca porjeńšić dać, móže swoje plany prawdźe­podobnje hakle klětu zwoprawdźić. „Mój terminowy zapisnik je połny a hač do kónca lěta njemóžu dalše ­nadawki přiwzać“, informuje Libor Vlach, šef firmy VIP instalace. Jeho předewzaće zatwarjuje wodowody a płunowody ­kaž tež tepjenja do bydlenjow a jednoswójbnych domow. Ani za mjeńše po­rjedźenja jeho přistajeni swobodne terminy nimaja. „Kóždy dźeń nas ludźo, kiž trjebaja nuznje reparatury abo tajke ­słužby kaž wuměnu kartušy abo dušowanskeje kabiny, wo pomoc proša. Mamy naprašowanja z Prahi a z cyłeho ­srjedźo-čěskeho wobwoda. Ale bohužel njemóžemy pomhać“, zdźěli Vlach. Jeho firma njeje jenička, kiž je tuchwilu w tajkim połoženju.