W přećelskej hrě wuspěšni

póndźela, 21. měrca 2016 spisane wot:

SJ Njebjelčicy

– Nadrózna Hrabowka 4:1 (1:1)

Zestawa domjacych: Hahn (Matješk) – Kral, Deleńk, Pawlik, Haška, Cyž (Hommel), Šołta (Hanuza), Lejnart, Hrjehor (Mjechela), Ričel (Kubaš), Hoelzel

Wobě koparskej zastupnistwje běštej tónraz bjez dypkoweje hry a stej so tuž na testowu partiju w Njebjelčicach dojednałoj. Ze šěsnaće hrajerjow tamnišeje SJ bě kóždy zasadźeny. To bě wažne skrućić harmoniju w cyłku. Po dołhej přestawce a někotrych treningowych jednotkach přidruži so tež zaso wažny nazhonity kopar Tobias Kubaš.

Wot wšeho spočatka domjacy hru postajachu a nadźěłachu sej někotre móžnosće. Tak běštej dwaj wólnej kopaj z wuhladneje pozicije, kaž tež rjany nadběh přez Hoelzela–Lejnarta–Cyža bjez wuspěcha. Na tamnej stronje pak poradźi so hosćom po konteru 0:1 (28.). Něšto pozdźišo trjechi Leopold Hoelzel z praweje strony jenož wonkownu syć hóstnych wrotow a w 42. min. Florian Ričel za Njebjelčicy wuruna.

W štwórćfinalu wo wokrjesny koparski pokal hraje 16. abo 17. apryla prěnje koparske mustwo ST Marijineje hwězdy přećiwo prěnjemu mustwu SJ Chrósćicy. Wčera bu koło najlěpšich wosom cyłkow wulosowane. Wobraz, na kotrymž widźimy klóšterskich přiwisnikow, nasta krótko po wočinjenju Chróšćanskeho losa. Koparjo z Pančic změja domjacu lěpšinu. Foto: Jörg Stephan

Z bojom sej dypk wubědźili

póndźela, 21. měrca 2016 spisane wot:

Sokoł Ralbicy/Hórki II

– HZ Łaz/Běły Chołmc 2:2 (0:2)

Zestawa domjacych: Cyž – Materna, M. Matka (21. T. Matka), Zynda, Čornak, Kobalc, Bogusz, Lulak, Bejmak, Kral (90. Měškank), J. Matka

Njedźelu po wobjedźe nastupi w Ralbicach sylny koparski kontrahent z Łaza/Běłeho Chołmca. Pola rezerwy Sokoła běštaj z Lulakom a Bejmakom hnydom dwaj hrajerjej z prěnjeho mustwa zasadźenaj a k tomu tež hišće hewak jako sudnik agěrowacy Matijas Kral. Njebě tuž wotwidźeć, kak hromadźe harmoněruja. Prěni połčas njebě tež wjele lubjacy. Faworit z Łaza/Běłeho Chołmca hru dominowaše a nawjedowaše po dwojich wrotach hižo srjedź prěnjeho połčasa 2:0. Domjacy fanojo sej zawěsće přejachu, zo njebudźe poražka přewysoka.

Jasnje dobyli

póndźela, 21. měrca 2016 spisane wot:

SJ Njebjelčicy

– SV Großdrebnitz 3:0 (1:0)

Zestawa domjacych: Hahn – Kral, Deleńk, Pawlik, Hommel, Cyž, Hanuza, Lejnart (24. Čornak), Hrjehor, Ričel (65. Haška), Hoelzel (69. Šołta)

Tale koparska partija wotmě so wčera, njedźelu, na domjacym trawniku, při njepřijomnym wichorojtym wjedrje. Njebjelčenjo běchu wotydźenja hrajnišćo derje spřihotowali. Wrotar Hahn zdźerža znowa swoju klětku čistu a ofensiwa domjacych docpě tónraz tři wažne wrota. Prěnju wjetšu móžnosć Ričela wotwobara hóstny wrotar k róžkej (13.). Krótko po tym pak wudani­ so Ričelowe dobre zasadźenje w nadběhu, jako posłuži Hoelzela, kotryž trjechi z niskej třělwu do dołheho kuta 1:0 (17.). Hommel je wrota hosći po rjanym nadběhu snadnje misnył. Na to wahaše partija bjez wjelelubjacych akcijow hač do přestawki tam a sem.

22. Mužakowski hrodowy parkowy běh so wotměł

póndźela, 21. měrca 2016 spisane wot:

Lětuši 22. Mužakowski hrodowy parkowy běh, prěnje hódnoćenske wurisanje lětušeje rjadneje lisćiny Wopačanski cup běharjow, je 425 sportowcow do města wjercha Pücklera přiwabił. Mjez nimi běše tež zaso horstka serbskich atletow. Na distancach 0,8 km, 2,5 km, 5 km a 10 km wubědźowachu so aktiwni wot třilětneho hač k 87lětnemu.

Na 10 km dobyštaj Robert Kubisch a Lilli Reichwald z Budyšina. Najwuspěšniši serbski starter běše 25lětny Jakub Čórlich z Němcow. Wón wobsadźi cyłkownje 7. městno a w swojej starobnej klasy samo třeće. Na 5 km dobyštaj Leon Sperling a Sandra Beck z Rózborka. Jurij Nuk bě třeći w sk 80.

Wšitcy startowacy su sej z Mužakowskim hrodowym parkowym běhom prěnje dypki za rjadne lisćiny 2016 nahromadźili. Jurij Nuk

Trenar z dypkom spokojom

póndźela, 21. měrca 2016 spisane wot:

FC Schönberg

– FSV Budissa Budyšin 2:2 (0:2)

Zestawa hosći: Jakubov – Kolan, Patka, Pfanne, Kral, Hoßmang, Hansch (79. Heppner), Hausdorf, Rosendo, Salewski, Walther (61. Reher)

Bě to prěnja hra po rozžohnowanju Budissy z Tomašom Henčlom. Wón bě z njej chětro wuspěšny a je ju z wobwodneje ligi hač do regionalneje ligi wjedł. Přechodny trenar Reimund Linkert pósła na kopanišćo nimale samsnych jědnaćoch, kotřiž běchu partiju z 0:2 přećiwo Jenje přěhrali. 251 přihladowarjow bě přišło, mjez nimi běchu štyrjo z Budyšina. Wjeselo bě wulke, jako postara so Hansch wo nawjedowanje 0:1 (23.). 0:2 (37.) poradźi so Salewskemu a wšitcy sej myslachu, zo maja hosći hižo tři dypki.

W kopańcy pak znajemy dwaj połčasaj. Prěnje přećiwniske wrota sudnik dla nimohry njepřipózna, ćišć na wrota Jakubova pak přiběraše. Schönberg trjechi 1:2 (69.) a štyri mjeńšiny po tym wuruna. Na zbožo móžeše Budissa znajmjeńša hišće dypk wuchować. Trenar Linkert pak bě z nim spokojom. Clemens Werner

Skónčnje zaso raz tři dypki

póndźela, 21. měrca 2016 spisane wot:

FSV Budissa Budyšin

– BFC Dynamo 3:2 (2:1)

Zestawa domjacych: J. Jakubov – Kolan, Patka, Pfanne (52. Fröhlich), Kral, Hausdorf, Hoßmang, Rosendo, Reher, Walther (88. A. Jakubov), Salewski (92. Heppner)

Kajka bě to super hra před jenož 550 přihladowarjemi? Budissa Budyšin, kotraž bě lětsa hišće bjez dobyća, je BFC Dynamo­ z Berlina, třećeho regionalneje koparskeje­ ligi, přewinyła. Tón bě z hrajersce sylnym mustwom ze sprjewine­ho města do sprjewineho města přijěł a chcyše­ wězo z třomi dypkami zaso domoj jěć. Domjacy pak wot wšeho spo­čatka jara bojownisce wustupowachu a docpěchu přez Rosenda w 21. min. 1:0. Tež po nawjedowanju woni njepopušćichu a třělichu tež hišće 2:0 (34.). Róžk Walthera bě Salewski přetworił. Nětko wukonjachu hosćo wjace ćišća a skrótšichu hišće w prěnim połčasu na 2:1 (37.).

BFC Dynamo wróći so z kabiny wysoko motiwowany a hižo w 49. min. wuruna. Hosćićeljo pak so njepodachu a po 65 mjeńšinach znowa nawjedowachu. 3:2 za nich bě Rosendo třělił. Po wja­corych móžnosćach na woběmaj stro­nomaj wosta při dobyću domjacych.

Po jutrach pojědu koparjo Budissy k Viktoriji Berlin. Clemens Werner

Porjedźenka

póndźela, 21. měrca 2016 spisane wot:

Zmylkaj w rozprawje wo „hłownej

Do rozprawy wo hłownej zhromadźiznje SJ Chrósćicy, kotruž smy wozjewili, staj so zmylkaj zašmjatałoj. Tak rěka nowy zastupowacy předsyda Chrystof Mikławšk a do rozšěrjeneho předsydstwa buštaj Chrystof Zahrodnik a Tomaš Dučman wolenaj. Nimo toho ma sportowe towarstwo tučasnje 160 čłonow. SN

Widźał, słyšał, napisał (21.03.16)

póndźela, 21. měrca 2016 spisane wot:

Awtor dźensa

André Strelow

Přiwisnicy kopańcy dožiwjeja tučasnje horcu fazu z rozsudami na mjezynarodnej a zwjazkowej runinje. Najprjedy su so Mnichowčenjo w kralowskej lize hakle w poslednjej mjeńšinje do podlěšenja wuchowali. Thomas Müller z hłójčkowanym bulom bě jim blamažu zalutował. Wjeselo běše wězo jara wulke. W přidatnym hrajnym času Bayerojo hišće dwójce do čorneho trjechichu a su so tak doskónčnje za přichodne koło kwalifikowali. Tam čaka poměrnje lochki nadawk. Benfica Lissabon je a budźe jenož mjezystacija po puću do połfinala. Wšitko druhe by jara wulke přesłapjenje było. Koparjo z Wolfsburga, kotřiž su so přećiwo KAA Gentej přesadźili, dóstachu porjadny kaliber přilosowany. Real Madrid, najwuspěšniši klub we wubědźowanju, budźe najprjedy z hosćom w Němskej. Nadawk je nimale njerozrisajomny. Přiwšěm je to za Heckingowe mustwo najwjetši towarstwowy wuspěch.

Sport (18.03.16)

pjatk, 18. měrca 2016 spisane wot:

Přihotuja so na hru lěta

W Kamjencu zetkaja so koparjo Jednoty Kamjenc a FSV Zwickauwa sobotu, 26. měrca, k połfinalu wo sakski pokal. Hišće ženje njejsu hrajerjo z Lessingoweho města koło najlěpšich štyrjoch mustwow Sakskeje docpěli. Přihotuja so hižo pilnje na „hru lěta“. Wot 12.30 hodź. změja w stadionje wosebity program. Dźěći hač do 14 lět smědźa darmotnje do stadiona. Zastup za dorosćenych płaći dźewjeć eurow, potuńšeny sydom. Lětne kartki za tutu hru žanu płaćiwosć nimaja.

38. MTB w Humbodtowym haju

Njedźelu, 3. apryla, zarjaduje kolesowarske towarstwo RSV Budyšin w Budyšinje w Humboldtowym haju wubědźowanje z mountainbikami (MTB). Započatk je w 9.30 hodź.

Koparske dypkowe hry

19.03. 15:00 Kamjenc – Wocl Riesa

19.03. 15:00 Łuty – Kulow

19.03. 15:00 Kinspork – Rakecy

19.03. 15:00 Kubšicy – Radwor

20.03. 10:30 Hory II – Ralbicy/Hórki II

20.03. 13:30 Budissa – BFC Dynamo

20.03. 15:00 Chrósćicy – Ramnow

20.03. 15:00 Njebjelčicy – Großdrebnitz

20.03. 15:00 Marijina hwězda – Sepicy

Volleyballowe dypkowe hry

19.03. 14:00 VfB Zhorjelc – Worklecy

19.03. 14:00 Pančicy, žony – Zhorjelc

19.03. 16:00 Pančicy, žony – Kundraćicy

19.03. 10:00 Worklecy II we Wojerecach

20.03. 10:00 hrajny dźeń žonow w Budyšinje

W Budyšinje unihokej hrać

nawěšk

nowostki LND