IT-technika za serbske institucije
Do rjadu sto wustajerjow na lětušich wikach Nawi přichoda w Budyskej powołanskej akademiji (BA) słušeše posłužbowe předewzaće Infotech, załožene před 25 lětami w Zhorjelcu. Wone słuša do kruha nawjedowacych předewzaćow po cyłej Sakskej a Braniborskej w branši.
Budyšin (CS/SN). Sebastian Michel z Budyšina, kiž je předewzaće na tudyšich wikach zastupował, bě sam na Budyskej BA studował. Předewzaće Infotech je partner za praksu za tele kubłanišćo, a to mjeztym 15 lět. Dobre zwiski wudźeržuje Infotech tež ze serbskimi institucijemi. „Instalujemy soft- a hardware kaž tohorunja internetne zwiski za Ludowe nakładnistwo Domowina a za Załožbu za serbski lud“, wón rozłoži. W pismach su serbske znamješka drje předinstalowane, ale wone so do mejlowych adresow zatwarić njehodźa. To pak za wšitke pisma z wosebitymi znamješkami płaći. Na stejnišću Infotech je so 17lětny Tim Große rozhladował. Šuler Wojerowskeho Leóna Foucaultoweho gymnazija chce po maturje w IT-branši dale wuknyć.
Mnohe šansy w regionje
Wukubłanske městna na wšitkich hospodarskich polach
Šulerjo, kotřiž po 9., 10., 12. abo 13. lětniku šulu z wuswědčenjom wuchodźa, maja w Hornjej Łužicy mnohe šansy na powołanske wukubłanje. Na to pokazachu wukubłanske a studijne wiki Nawi přichoda zańdźenu sobotu w Budyskej powołanskej akademiji (BA). Tam zastupjene běchu předewzaća z najwšelakorišich branšow, mjez nimi wulke zawody kaž Bombardier. Patrick Sauer, kiž je tam něhdy sam wučomnik był, pytaše za stejnišći w Budyšinje a Zhorjelcu młodych ludźi. W sprjewinym měsće prašeja so předewšěm za mechatronikarjemi, kotřiž maja zawodne wukubłanje přez Industrijnu a wikowansku komoru w Drježdźanach. W Zhorjelcu trjebaja twarcow jězdźidłow a fachowcow za metalowu techniku. Ći maja wukubłanje direktnje na městnje, a to na tamnišej powołanskej šuli. „Chcemy, zo młodźi ludźo w regionje wostanu“, rjekny Patrick Sauer. Powěsć, zo njeje Němska železnica wozy, kotrež su w Budyšinje a Zhorjelcu twarili wotewzała, jeho hněwa. Wšako bě kritiku zbudźił zmylk software, za kotryž Budyscy a Zhorjelscy twarcy ničo njemóža.
Za hraće póćmje dobra zhromadnosć trěbna
Budyšin (SN/MiR). Do dźiwadła hić a hrajerjow na jewišću wobkedźbować je mnohim, tež dźěćom a młodostnym, samozrozumliwa naležnosć. Što pak, hdyž na jewišću žanych akterow njewidźiš, ale jeničce rekwizity? To je dźiwadło z ultrawioletnej swěcu (Schwarzlichttheater). Tajke dožiwichu wutoru šulerjo Budyskeho Philippa Melanchthonoweho gymnazija, Ewangelskeje zakładneje šule Huska a Budyskeje spěchowanskeje Lipoweje šule, jědnaće wučerjow a dalši hosćo na jewišću Kamjentneho domu. Pjeć wuknjacych 5. a 7. lětnika Melanchthonoweho gymnazija bě we wobłuku cyłodnjowskeho poskitka wšelake sceny nazwučowało.
„Sym so spočatk šulskeho lěta na gymnaziju prašała, hač móhła tam ze šulerjemi dźiwadło hrać. Pjećo, třo hólcy a dwě holcy, nětko sobu činja. A tak tydźensce jónu probujemy“, rozłožuje nawodnica poskitka Kristina Schormann, „šulerjo su pak tež paslili a eksperimentowali. Wšako měješe jich inscenacija powabna być.“ Tak su woni błyšćate kulki so čumpać a pisane pismiki po jewišću rejwać dali. W Budyskim Kamjentnym domje je Schormann dobreho partnera namakała.
Něhdźe 1 600 dźěći ptači kwas dožiwiło
Za digitalizaciju kubłanišćow
Wojerecy/Drježdźany (SN/at). Wosom Wojerowskich šulow móže so na spěchowanske srědki wjeselić, kotrež móža za digitalne wuhotowanje swojeho kubłanišća wužiwać. Kaž sakske kultusowe ministerstwo zdźěli, přepoda statny sekretar Herbert Wolff symboliski šek 1,5 milionow eurow z digitalneho pakta wyšemu měšćanosće Stefanej Skorje (CDU) zajutřišim we Wojerecach.
Ministerstwu předleži nastupajo digitalny wutwar tuchwilu 30 próstwow šulskich nošerjow we wobjimje 20,8 milionow eurow. 18 próstwow ze sumu 8,4 milionow eurow su hižo přizwolili. Próstwy nastupaja dotal 49 šulow. Hač do lěta 2024 přewostaja Zwjazk 225 milionow eurow a po połojcy swobodny stat a šulscy nošerjo 25 milionow eurow za digitalne wuhotowanje.
Potom móža zakładne šule Při Worjole „Handrij Zejler“, „Při parku“, „Při Halštrowje“, 4. zakładna šula „Lipowa šula“, wyšej šuli „Na kromje města“ a „Při planetariju“ kaž tež Lessingowy a Léona Foucaultowy gymnazij započeć swój koncept wo medijowym kubłanju a medijowy wuwićowy plan zeskutkownjeć.
Do studija na akademiji počuchać
Sakske powołanske akademije reaguja ze swojimi poskitkami jara fleksibelnje na potrjebu hospodarstwa. Tak su wone atraktiwne młodym ludźom kaž tež předewzaćam samym.
Drježdźany/Budyšin (SN/MiR). Budyska powołanska akademija wabi nětko nowych studentow. Wot 17. do 21. februara móžeš tam do studija takrjec počuchać. Naprawa to, kotraž bě hižo loni dobry wothłós žnjała. Młodostni móža sej w tym času labory na campusu spřistupnić. Zdobom maja składnosć zwěsćić, kotry studijny směr móhł zakład jich powołanskeje karjery być. Tak móža so wobhonić wo hospodarskim inženjerstwje, wo elektrotechnice, medicinskej technice, hospodarskej informatice a wo managemenće zawodnych resursow resp. public managemenće. Akademija skići informaciske a wuwučowanske zarjadowanja kaž tež pospyty a zwučowanja. Pod móža so zajimcy přizjewić.
Wulki zajim za Nawi přichoda knježił
Budyšin (CS/SN). Wobšěrny přehlad wo wukubłanju a studiju w regionje skićeše sobotu Nawi přichoda na Budyskej studijnej akademiji. Nimo akademije předstajichu tam tež Powołanskošulske centrumy Budyšin, Kamjenc a Radeberg. Mjez sto wustajerjemi běchu zastupjerjo rjemjesła, strowotnistwa, socialnistwa, wikowanja, gastronomije a wěstoty kaž tež z industrije a ratarstwa.
Serbsko-němski swět
Tiket ma přińć
Drježdźany (SN). W nowym šulskim lěće 2020/2021 chcedźa w Sakskej kubłanski tiket zawjesć. Tak znajmjeńša je stare sakske knježerstwo do wólbow přizjewiło. Koalicija pak so rozsudow dla dliji, byrnjež sej frakcija Lěwicy w krajnym sejmje srjedu žadała spěšnje postupować. Frakcije CDU, Zelenych a SPD pak přećiwo próstwje hłosowachu.
Rěčnik Lěwicy za mobilitu Marco Böhme rozjasni: „Njejsmy jeničcy, kotřiž sej po cyłej Sakskej jednotny, přez cyłe lěto płaćiwy a w kóštach přihódny tiket za šulerjow žadaja. W lěće 2014 běštej CDU a SPD w koaliciskim zrěčenju přilubiłoj, za to namjet hač do kónca lěta 2015 předpołožić. To pak so stało njeje. Njepomha tež ničo, zo bu krótko do wólbow krajneho sejma šulerski tiket za wólny čas zawjedźeny, kotryž hakle wot 14 hodź. płaći.“
