Doba požadanja podlěšena
Drježdźany (SN/at). Sakscy šulscy nošerjo, kotřiž swoju próstwu we wobłuku šulskeho digitalneho pakta hišće zapodali njejsu, móža wodychnyć. Koronapandemije dla bu doba zapodaća wo tři měsacy podlěšena. Hač do 30. septembra 2020 změja nětko chwile swoje požadanje Sakskej natwarjenej bance zapodać, kaž kultusowe ministerstwo dźensa informuje. Zdobom wone na to skedźbnja, zo potom wšitke njewužiwane budgety šulskich nošerjow znowa rozdźěla.
Za wutwar šulskeje digitalneje infrastruktury přewostaja we wobłuku směrnicy „Digitalna šula“ w Sakskej 250 milionow eurow. Dotal je 248 próstwow z wobjimom 136,97 milionow eurow dóšło. Z nich su hižo 203 próstwy přizwolene, štož wučinja 83 mio. eurow. W swobodnym staće je 566 šulskich nošerjow.
Prěnjorjadnje spěchuja nastupajo šulsku gitalnu infrastrukturu kładźenje kablow, šulske serwery a WLAN-syć. Runje tak je podpěra móžna za nakup interaktiwnych taflow, laptopow, notebookow a tabletowych kompjuterow. Sakska bě prěni zwjazkowy kraj, w kotrymž su spěchowanje z digitalneho pakta zahajili.
Wirtuelna bursa za wukubłancow
Prawidłownje wuhotuje wokrjes Zhorjelc wukubłanske wiki „Insidertreff“. Poskitk měri so předewšěm na młodostnych a móže jim puće do powołanja runać. Lětsa w Lubiju planowane zarjadowanje wupadnje, město toho je nětko pod hesłom „Online-Insider“ ryzy wirtuelnje přewjeduja.
Zhorjelc (AK/SN). Dokelž njeje pandemije dla wokomiknje móžno potencielnych wukubłancow po zwučenym wašnju informować, je „wirtuelny poskitk tuchwilu ćim wažniši“, podšmórnje Saskia Heublein z wuwićoweje towaršnosće Delnja Šleska-Hornja Łužica (ENO). „Online-Insider“ je po jeje słowach „centralna platforma Zhorjelskeho wokrjesa za powołansku orientaciju. Zajimcy maja tam tak mjenowanu last-minute-bursu z hišće swobodnymi městnami za wukubłanske lěto 2020. W septembrje wuhotujemy wirtuelne wukubłanske wiki, zo bychmy wupadnjene zarjadowanje w Lubiju narunali.“
Knižnu premjeru dźensa nachwatali
Chcedźa wjacerěčnosć spěchować
Zhorjelc (SN/BŠe). Kak hodźi so wjacerěčnosć we wšědnym pěstowarskim wotběhu podpěrać, je tema saksko-čěskeho fachoweho dnja, kotryž budźe 7. oktobra we wobłuku Čěsko-němskich kulturnych dnjow w Drježdźanach. Jasne wšak je, zo ličba dźěći w saksko-čěskim pomjeznym rumje přiběra. Tež ličba maćernorěčnych kubłarkow, kotrež w susodnym kraju dźěłaja, rosće. To měli tuž efektiwnje wužiwać, zo móhli dźěćom hižo zahe rěč a kulturu susoda spřistupnić. Situacija kubłanišćow w pomjeznym regionje je wosebitosć, kotraž šansy we sebi chowa.
Hudźbna zdobom žiwjenska šula
Budyšin (SN/bn). Dźeń wotewrjenych duri ma najwšelakorišim institucijam předewšěm zmóžnić, zajimcow wo swojich poskitkach informować. Tež Budyska wokrjesna hudźbna šula bě tajke zarjadowanja prawidłownje wuhotowała. Lětsa pak njeby so kubłanišćo postajenjow pandemije dla w zwučenym ramiku prezentować móhło. Tohodla zdźěłachu dospołnje nowy koncept a su swoje wrota zajimcam minjeny pjatk na ryzy digitalne wašnje wotewrěli.
Za zjawnostne dźěło hudźneje šule zamołwita Margitta Luttner wjedźeše wirtuelnje po jednotliwych wotrjadach a rozłoži wobdźělnikam cyłotnje zapołoženy pedagogiski poskitk. „Z tak mjenowanym zažnym kubłanjom měrimy so na dźěći wot dweju lět, štož twori wuchadźišćo za pozdźiše kroki wot indiwidualneje abo skupinskeje wučby na instrumentach, reje abo wědy wo hudźbje. Nimo toho šulerjam poskićamy so w rozdźělnych ansamblach, kaž na přikład w dujerskich kwartetach, chórowych cyłkach abo z našej bigband tež před publikumom wuspytać.“
Prěnje kročele po puću do přichoda
Na Wysokej šuli sakskeje policije w Rózborku a Budyšinje su wobšěrne twarske dźěła za lěpše studijne wuměnjenja zahajili. Tu pak wo wjele wjace wobnowjeja.
Z wobjedom zastarane
Projektowe dźěło wobmjezowane
Choćebuz (SN). Statny šulski zarjad Choćebuz je minjenu póndźelu dźěl projektowych sobudźěłaćerjow Dźěłanišća za serbske kubłanske wuwiće (ABC) wotćahnył, zo bychu woni na Delnjoserbskim gymnaziju mjez druhim skupinsku wučbu w němčinje a jendźelšćinje zawěsćili. Wo tym je načolnica ABC dr. Christiana Piniekowa wčera medije informowała.
Byrnjež tomu kubłanske ministerstwo w Podstupimje hač do kónca šulskeho lěta přihłosowało, „njebě krok ani přihotowany a wothłosowany z wobdźělenymi“, dr. Piniekowa porokuje. Tež po braniborskim šulskim zakonju předpisane přepruwowanje naležnosće wona paruje.
ABC spjelnja nadregionalne nadawki, kaž wučbne a wuwučowanske srědki wuwiwać a wudawać. Z wotćehnjenjom personala njemóža tam 40 procentow projektoweho dźěła dale wjesć. Tak bu natwar online-platformy njejapce přetorhnjeny, na kotrejž maja wučerjam serbšćiny a bilingualneje wučby digitalne wučbne materialije k dispoziciji być. Model, projekty z přidatnymi wučerjemi ze šulow wobdźěłać, je so jako suboptimalny wopokazał, kaž ABC informuje.
Šuli serbskorěčnu taflu přepodali
Spomóžny rozsud za serbske šulstwo
Sakske kultusowe ministerstwo je wčera w Drježdźanach rozsudźiło a štyri rjadownje za přichodny 5. lětnik na serbskimaj šulomaj přizwoliło.
Drježdźany (SN/JaW). Ralbičanska kaž tež Worklečanska wyša šula změjetej w přichodnym šulskim lěće dwě rjadowni w 5. lětniku. To je wčera připołdnju sakski kultusowy minister Christian Piwarz (CDU) serbskim žurnalistam w kultusowym ministerstwje wozjewił. „Smy dźensa ze zastupjerjemi Serbow situaciju rozjimali a rozsudźili, na woběmaj šulomaj dwě rjadowni wutworić“, rjekny Christian Piwarz. „To stawa so w zajimje staršich, šulerjow kaž tež dalewuwiwanja a šěrjenja serbskeje rěče. Wšako wjace rjadownjow k tomu přinošuje, zo so to tež zešlachći. Dźensniši rozsud je tuž za wšěch spomóžny“.
