Zaso live hudźić
Wojerecy (SN/MiR). Wubědźowanje „Młodźina hudźi 2022“ přiwabja kóžde lěto wjele dźěći a młodostnych, kotřiž swoje hudźbne dokonjanosće dopokazuja. Jednaćelka towarstwa „Młodźina hudźi“ Sakska/Łužica z.t., kotrež ma swoje sydło we Wojerecach, Christiane Vogel zdźěli, zo wotměje so z wolóženjom koronanaprawow trochu zapozdźene zhromadne sakske regionalne a krajne wubědźowanje, a to prezentnje. Poprawom mějachu lětuše regionalne wurisanja hižo w januaru w Sakskej być. Z regiona Sakska/Łužica je dotal 130 wobdźělnikow přizjewjenych. Hudźić budu dźěći a młodostni na pjeć městnosćach stajnje jenož we wuzwolenych kategorijach z wobdźělnikami, kotřiž hewak tež na instrumenće hudźić wuknu. Wot 26. do 27. měrca a wot 1. do 3. apryla přewjedu wurisanje w kategorijach duo klawěr a drjewjany instrument w starobnej skupinje III, cybadłowy kaž tež harfowy ansambl. Za to přijědu na wšě 140 dźěći a młodostnych z cyłeje Sakskeje do Wojerowskeje Łužiskeje hale.
Koncert dobyćerjow regiona Sakska/Łužica, na kotryž budźe tež publikum witany, budźe 21. meje 2022 w awli Lessingoweho gymnazija Wojerecy.
Kniha z dobrym potencialom
Wo powołanjach zhonili
Na wukubłanskim tydźenju „Pohladaj nutř“, kotryž so tuchwilu wotměwa, wobdźěla so mjez druhim tež Chróšćanski Dom swj. Ludmile. Póndźelu staj so tam dwaj zajimcaj wo hladanskich powołanjach informowałoj. Předwčerawšim bě dalši młodostny w hladarni a wuspyta wosebity nastroj z mjenom Sara, z kotrymž zamóža sobudźěłaćerjo pomocy potrěbnym při stawanju pomhać. Na wuchodźowanju z wobydlerku w chorobnym stole a nawodnicu hladanskeje słužby Silwanu Bjaršowej zhoni Daniel wo wobsahu wukubłanja w Chróšćanskej starowni.
Foto: Silwana Bjaršowa
Nětko móža digitalne poskitki bóle wužiwać
Chrósćicy (SN/MiR). Gmejna Chrósćicy je nastroje k wužiwanju digitalnych medijow kupiła. Te pak njejsu za komunalnu potrjebu předwidźane, ale za dźěći w pěstowarni a horće. Wjesnjanosta Marko Kliman (CDU) je mjez druhim wjacore laptopy a telewizor wčera popołdnju sam do dnjoweho přebywanišća „Chróšćan kołć“ na wozyčku składowane přiwjezł. Před durjemi pěstowarnje su předšulske dźěći pokazali, zo so hižo dosć derje z načasnej techniku wuznawaja, a su so za njewočakowany dar podźakowali. „Mam za wažne, zo hižo dźěći z digitalnej techniku wobchadźeć nawuknu. Wšako je wona mjeztym standardny wuknjenski a dźěłowy srědk za wšitke generacije“, Marko Kliman zwurazni. „W tym zwisku je trjeba hižo najmłódšim wuwědomić, zo je digitalny swět hladajo na fakenewsy a realne powěsće komplikowany.“ Nałožili su za nakup něhdźe 4 500 eurow ze srědkow, kotrež Sakska gmejnam w serbskim sydlenskim rumje jako pawšalu za spěchowanje serbšćiny přewostaja.
Swět je digitalny!
Historiska jězba k Handrijej Zejlerjej do lěta 1814
Wojerecy (AK/SN). We wulkim nasćěnowym časniku w stwě rjadownje 4A na Wojerowskej zakładnej šulu Při Worjole chowa so potajnstwo. Pokazowak skoči wo wjace hač 200 lět wróćo, a šulerjo su nadobo w lěće 1814. A mjez nimi je młody Handrij Zejler, pozdźiši znaty serbski farar, basnik, redaktor, ratar a šulski inspektor we Łazu.
Šulerjo chcedźa na lětušim 21. swětowym dnju dźiwadła, 28. měrca, w Budyšinje hru z dźěćatstwa Handrija Zejlerja pokazać a tak k Lětu Zejlerja a Kocora přinošować. Rjadowniska wučerka Silwija Wjeńcyna, podawaca serbšćinu, matematiku, wěcnu wučbu a němčinu, so na dwurěčny kruch pod hesłom „Zejler w šuli – oder wer ist Zejler?“ angažementa swojich šulerjow dla wjeseli. „Najprjedy smy w skupinkach wuradźowali“, powěda šulerka Alin Karola Kasten, „smy teksty němsce napisali, naša wučerka je słowa zeserbšćiła.“ Silwija Wjeńcyna je pomhała kostimy a rekwizity namakać. W běhu dźěła nastachu interpretacije basnjow a spěwow. Samo powědarja maja.
W myslach do Francoskeje pućować móhli
Budyšin (SN/MiR). Do Francoskeje pućować – to je són někotrehožkuli šulerja a někotreježkuli šulerki 7. lětnika Budyskeho Serbskeho gymnazija, kiž wuknu francošćinu pola Zuzany Rjedźineje a Anje Weitzmannoweje. Wčera móžachu gymnaziasća kraj při Atlantiku na wosebite wašnje zeznać. Z pomocu prezentacije w formje animacije dožiwichu woni wosebitosće krajiny a rěče sławneho naroda Francozow. Tež za fachowej wučerce běše překwapjenka, kak čile je Ludivine Aubras, studentka germanistiki, na mnohe wašnje z Němskej zwjazany kraj předstajiła. Akcija wuchadźa z programa FranceMobil. Lektorka, kotraž pochadźa z kupy Réunion, je Budyskim šulerjam francošćinu z połnej paru, aktualnej hudźbu a tójšto wubědźowanjemi lóštnje posrědkowała.
Nawodźa maja zasadnu zamołwitosć
Nětko ma so situacija w dźěćacych dnjowych přebywanišćach kaž tež na šulach wolóžić. To je wučitać z noweho rjadowanja Sakskeje wo škitnych naprawach koronu nastupajo.
Budyšin/Drježdźany (SN/MiR). Wot 7. hač do 19. měrca ma w šulach a dźěćacych dnjowych přebywanišćach nowe rjadowanje koronu nastupajo płaćić. To je sakske knježerstwo tónle tydźeń wobzamknyło. „Šulske nawodnistwa su same zamołwite wotběhi w swojim zarjadnišću rjadować a wobsahowe prašenja rozrisać“, zdźěli na naprašowanje SN rěčnik krajneho zarjada za šulu a kubłanje (LaSuB) Roman Schulz. „K tomu słušeja tež wotpowědne aktualne postajenja wokoło korony.“ LaSuB pak po potrjebje poradźuje. „Za organizowanje testow su šule zhromadnje z LaSuB zamołwite“, Schulz doda.
Za lěpšu rěč
Wulki zajim na poskitku Budyskeje powołanskeje akademije
Budyšin (SN/bn). Druhi tydźeń zymskich prózdnin bě tež lětsa Budyskej powołanskej akademiji (BA) składnosć, swoje poskitki šulerkam a šulerjam resp. wučomnicam a wučomnikam we wobłuku proboweho studija prezentować. Wobdźělnicy mějachu składnosć so z jednotliwymi fachowymi směrami zeznajomić, čitanja wopytać, so z docentami kaž tež ze studentami rozmołwjeć a so w laborach kubłanišća wědomostnej praksy wěnować. Zaměr „tydźenja počuchanja“ – tak probowemu studijej tež rěkaja – je, „ewentualnje hišće njerozsudźenym šulskim wotchadnikam móžne puće do powołanja a wukubłancam opcije dalšeje kwalifikacije pokazać“.
