W foyeru Slepjanskeje zakładneje šule „Dr. Marja Grólmusec“ je ...
W foyeru Slepjanskeje zakładneje šule „Dr. Marja Grólmusec“ je Rownjanski wuměłc a wučer wyšeje šule Jörg Tausch (nal.) nasćěnowy wobraz z portretom spjećowarki wuhotował. Wčera su jón w přitomnosći nawodow zakładneje šule Petry Rübesamoweje a wyšeje šule Jana Hrjehorja (napr.) kaž tež wjesnjanosty Jörga Fundy (CDU, druhi wotprawa) oficialnje přepodali. Foto: Patrick Stützer
Nuzowe zastaranje zaručene
Minjeny tydźeń wobzamknjeny přiwótřeny zakoń wo škiće před infekcijemi – tak mjenowane zwjazkowe nuzowe spinadło – je wot soboty płaćiwy. Wuskutki ma wón tohorunja na wšědne žiwjenje a kubłanišća w Hornjej Łužicy.
Drježdźany (SN/JaW). Wot dźensnišeho płaća tež w Budyskim a Zhorjelskim wokrjesu nowe zasady w pěstowarnjach a šulskich kubłanišćach. Přiwótřeny zakoń wo škiće před infekcijemi sej žada, zo wostanu šule a pěstowarnje tež tu zawrjene. Wšako dyrbja we wšitkich zwjazkowych krajach po nowym zakonju šulske a předšulske zarjadnišća začinjene wostać, „překroči-li incidenca tři dny za sobu hódnotu 165“, rěka w zakonju. „Tuž je wot dźensnišeho wotewrjenje abo zawrjenje kubłanišćow w jednotliwych wokrjesach a bjezwokrjesnych městach po krutych incidencnych hódnotach zakonsce jasnje rjadowane“, potwjerdźa sakske kultusowe ministerstwo w nowinskej zdźělence.
Šulerjo 4. lětnika Chróšćanskeje zakładneje šule „Jurij ...
Z plakatami při zachodźe a na płoće Worklečanskeje šule ...
Z plakatami při zachodźe a na płoće Worklečanskeje šule skedźbnjeja tule starši na tuchwilnu ćežku situaciju nastupajo wobmjezowanja korony dla. Na serbskich a němskich plakatach wuprajeja so woni přećiwo tomu, zo dźěći w šuli na koronu testuja a zo maja wone nahubnik wužiwać. Tež dźěći su na plakatach swoje začuća zwuraznili. Mjez druhim bě čitać „Sym sama“ abo „Dorosćeny dźiwa na skutki, dźěćo na lubosć“. Wot póndźele maja šule wysokeje incidency dla zaso zawrjene być. Foto: Feliks Haza
Plan wo zmištrowanju deficitow předleži
Drježdźany (SN/JaW). „Žana hišće tak dobra distancna wučba prezencnu njenaruna“, měni sakski kultusowy minister Christian Piwarz (CDU), a je tuž plan předpołožił, z pomocu kotrehož chcedźa „dźěry wědy a kompetencow wuknjacych zapłatać“. Wo tym pisa ministerstwo w nowinskej informaciji. „Wospjetne zawěranja kubłanišćow šulerki a šulerjow jenož psychisce njepoćežuja, ale wjedu zdobom k njedostatkam wědy a kompetency. Za to drje dźěći zamołwite njejsu, wone pak su ći bići pandemije“, Piwarz wuswětla.
Kaž ze zdźělenki a wozjewjenja ministerstwa wuchadźa, złožuje so plan na tři zakłady. Prěni tajki je wuknjenske deficity zwěsćić, dalši je ćežišća sadźeć a třeći je swobodne rumy we wuwučowanskich planach tworić a tak móžnosće skićić zakomdźene nachwatać. „Plan smy ze šulskimi direktorami a wučerskimi zwjazkami kaž tež z krajnej staršiskej a šulerskej přiradu rozjimali“, zdźěli nowinski rěčnik kultusoweho ministerstwa Dirk Reelfs.
Hudźbne šule zaso z wučbu na městnje
Budyšin/Wojerecy (SN/bn). Wokrjesna hudźbna šula Budyšin je wučbu na městnje za jednotliwcow znowa zahajiła. Wot wčerawšeho móža dźěći a młodostni wjetšinu regularneho poskitka – wuwzatej stej skupinska wučba a předšulske hudźbnopedagogiske kubłanje – w sprjewinym měsće kaž tež w Kamjenskej wotnožce kubłanišća zaso wužiwać. To pak pod wuměnjenjom, zo krute předpisy hygieny dodźerža. Tak dyrbja šulerjo w starobje wot sydom lět do hodźiny pisomne wobkrućenje negatiwneho koronatesta, nic staršeho hač 24 hodźin, předpołožić. Nimo dokumenta, kajkiž wotpowědne centrumy a lěkarnje bjezpłatnje wudawaja, akceptuje šula tež wot staršich wupjelnjeny a podpisany formular, kiž hodźi so z internetoweje strony www.kreismuskischule-bautzen.de/aktuelles dele sćahnyć. Su-li wuknjacy hižo po za powšitkownokubłace šule płaćiwych kriterijach testowani, dosaha w tym zwisku wustajene wopismo.
Čuješe so za nós wodźena
Miłoćicy (SN/JaW). Křesćansko-socialny kubłanski skutk (CSB) je w minjenych pjeć lětach 90 kubłarkow a kubłarjow přistajił. Z nich bě 23 Serbow. To zdźěli rěčnik CSB Maik Brězan na naprašowanje. Narěčany na wjacore změny personala w běhu krótkeho časa wón zwurazni, zo we wjetšinje zarjadnišćow CSB personal hižo mnohe lěta dźěła. „Minjene lěta smy wjacore wjednicy na wuměnk rozžohnowali a městna znowa wobsadźili.“
Tuchwilu maja w 15 zarjadnišćach CSB dosć kubłarkow a kubłarjow. Personalne změny pak mějachu předewšěm w Njebjelčicach, kaž SN z wjacorych žórłow zhonichu. Wjeršk je, zo derje wukubłana młoda serbska kubłarka hižo w Njebjelčanskej pěstowarni „Jan Skala – Barbojte kamuški“ njedźěła, štož mjez staršimi wulke zadźiwanje a zdźěla hněw zbudźi. Zo wjac za CSB njedźěła, je nam kubłarka wobkrućiła. CSB so škita datow a wosobow dla njewupraji. Tež wo tym, čehodla su derje wukubłanu serbsku pěstowarku hić dali, CSB mjelči.
Fairni wostać!
Ličby šulerjow za serbske šule su nětko jasne
Budyšin (SN/MiR). Ze 4 401 zakładnych šulerjow w Budyskim a Zhorjelskim wokrjesu, kotřiž tuchwilu hišće 4. lětnik wopytuja, je dóstało lětsa 2 157 – štož wučinja 49 procentow – kubłanske doporučenje za gymnazij. 2 227 hólcow a holcow – štož je 50,6 procentow – móže wot noweho šulskeho lěta wopytać wyšu šulu. Loni bě 41,4 procenty dóstało kubłanske doporučenje za gymnazij a 58,2 procentaj te za wyšu šulu. Z tym zhladuje Budyska wotnožka Sakskeho krajneho zarjada za šule a kubłanje (LaSuB) na stupacu ličbu dźěći, kotřiž móža wot 5. lětnika wopytać gymnazij. Kelko procentow wučinja to na jednotliwu šulu, w kotrejž wuknu zakładni šulerjo serbsku rěč, njemóže zarjad na naprašowanje SN wotmołwić.
Wuchowarjo serbšćiny pilnje naprojekće dźěłaja
Slepjanska šula loni hłowne myto sakskeho idejoweho wubědźowanja fondsa „Čiń sobu!“ dobyła
Runje před lětom bě šulski nawoda Slepjanskeje wyšeje šule „Dr. Marja Grólmusec“ Jan Hrjehor zhromadny šulerski a wučerski projekt za sakske idejowe wubědźowanje fondsa „Čiń sobu!“ zapodał, a to w kategoriji Łužiski rewěr. Tam požadachu so šulerjo a wučerjo z projektowym titulom „Nalěpił a čitał – słyšał a nawuknył / Serbšćinu wuknyć ze zwukowymi nalěpkami“. Loni w juniju dósta nawoda kubłanišća wot sakskeho ministerskeho prezidenta Michaela Kretschmera dobyćerske wopismo přepodate, kotrež wisa nětko při zachodźe do šule. Projekt ze zwukowymi nalěpkami bě hłowne myto dobył. Wo aktualnym stawje zwoprawdźenja projektoweje ideje dźensa rozprawjamy.
