Radwor (SN/MiR). Na serbskich a serb­šćinu podawacych šulach wotwěra so přidatny personalny problem. Na ku­błanišćach njepobrachuja jenož wučerjo, mjeztym pytaja tež fachowcow na druhich runinach. W Radworju na přikład maja na zakładnej šuli „Dr. Marja ­Grólmusec“ městno šulsko-zarjadni­skeho asistenta/asistentki wupisane. Kaž nawodnica kubłanišća Angela ­Rynčowa informuje, chcedźa městno wot 1. septembra wobsadźić. „Jenož hišće hač do 15. junija je móžno so za nje požadać“, wona rozłožuje. „Wobsah dźěławosće je ze skutkowanjom nawod­nistwa a wučerskim teamom wusko zwjazany.“

Z horinami a dolinami so Rejzka Šěnowa wuznawa. A to nic jenož, dokelž rady pućuje. We wichorojtym času přewróta je aktiwnje w Serbskej narodnej zhromadźiznje sobu skutkowała, hdźež su wjele wo změnach w serbskim šulstwje diskutowali. W lěće 1992 přewza wona wjednistwo Serbskeho gymnazija Budyšin a je nowotarske kreatiwne puće kročiła. Wužadacy bě tehdy natwar kursoweho systema w sekundarnym schodźenku. Zesylnić prestiž serbskeje rěče bě jej přeco bytostna a wutrobna naležnosć. Wona docpě, zo so serbšćina němčinje runohódnje jako maturitny předmjet připó­znawa. Zdobom zwoprawdźi projekt cyłodnjowskeje šule. Zaměrnje staraše so wo serbski wučerski dorost. Za kulisami bě to spore njesprócniwe dźěło.

Slepo/Radwor (LE/SN). Šulerjo a wučerjo zakładneju a wyšeju šulow Radwor a Slepo přihotowachu so minjene mě­sa­cy na 125. narodniny serbskeje antifašistki dr. Marje Grólmusec (1896–1944). Wuwili běchu swoju ideju zhromadnje z čło­nami skupiny Serbska Murja, serbskimaj studentomaj Symanom Sćapanom a Pětrom Dźisławkom kaž tež ze Załož­bu za serbski lud. Wuknjacy zběrachu prašenja a wotmołwy za aplikaciju QuizSerb a zestajachu je do noweje kategorije „Marja Grólmusec“. 57 prašenjow a 228 wotmołwow wopřijaca kategorija je wot dźensnišeho 1. junija w interneće přistupna. Wona hodźi so na ličaku, šmóratku a tableće wužiwać. Paleta wobsahow, z kotrymiž su so šulerjo roze­stajeli, je chětro wobšěrna. Tak jewja so w njej na přikład swójbne pozadki a styki w Lipsku rodźeneje a w koncentraciskim lěhwje Ravensbrück zahinjeneje wučerki dr. Marje Grólmusec, jeje politiske a literarne skutkowanje abo bój přećiwo fašistiskemu systemej. Nimo wuknjacych wobeju kubłanišćow móža so nětko tež starši a dalši zajimcy na moderne wašnje z Marju Grólmusec zaběrać.

Na Radworskej Serbskej wyšej šuli „Dr. Marja Grólmusec“ su dźensa dopołdnja runje tak kaž na wšěch dalšich wyšich šulach Sakskeje pisomne pruwowanja w předmjeće jendźelšćina přewjedli. Za pruwowanje w Radworskej „Slaviji“ přizjewjenych bě 33 šule­rjow, kotřiž chcedźa zakónčić šulu z wotzamknjenjom za realnu šulu, dalši pjećo­ za hłownu. Nawodnica kubłanišća Hilža Štilerowa (srjedźa) a fachowa wučerka Lubina Grzybowa (nalěwo) běštej šulerjam poboku. Srjedu pruwuja wotchadnikow w němčinje a serbšćinje, 4. junija w matematice. Realni šulerjo maja 8. junija dale złožić­ pruwowanje w biologiji/fyzice, 9. junija w chemiji. Foto: SN/Hanka Šěnec