Dźěćom dźiwadło hrali

wutora, 20. decembera 2016 spisane wot:

Ylvi, małka holca z Flake, bu rubjena. Wikingojo hnydom wědźachu, štó za tym tči: „hrozny Sven“. Wón je najwjetši njepřećel wikingow. Jemu hodźi so wšitko přicpěwać. Halvar da přikaz, płachty čołma nastajeć a so z połnej paru do spěcha dać, prjedy hač so holčce Ylvi něšto stanje.­ Wiki, najmłódši wobydler z Flake a syn nawjedowarja wikingow, kradnje so na wulki čołm najebać zakaz nana, zo by sobu pomhał swoju najlěpšu přećelku wuswobodźić.

Hač su wikingojo swojich přećiwnikow hišće w prawym času přemóhli, móžeše minjeny tydźeń nimale 300 pěstowarskich a hortowych dźěći z Budyskeho wokrjesa dožiwić. Tole zmóžni jim 21 šulerjow a šulerkow rjadownje S15v Budyskeje Serbskeje fachoweje šule za socialnu pedagogiku, kotřiž/kotrež so na statnje připóznateho kubłarja/připóznatu kubłarku wukubłuja. Woni su tuchwilu w druhim wukubłanskim lěće.

Před wjesnej kapałku so zetkali

wutora, 13. decembera 2016 spisane wot:

Je z tradiciju, zo so w Jaworje do hód k horcemu winku a praženym kołbaskam při wjesnej kapałce zetkamy. Młodźi ženjeni ze wsy běchu minjenu sobotu mjeztym třeći raz tele zarjado­wanje organizowali. Tež rumpodich bě so sem zaběžał a 30 mjeńšich dźěći z darikom zawjeselił. Za to wone mócnje spěwachu a basnje přednošowachu.

Wječor při jara přijomnym wjedrje bě nalada na Jaworskej nawsy wulkotna, a wjele rjanych spěwow do ćmy klinčeše. Wutrobny dźak wšitkim organizatoram tohole zetkanja a rumpodichej, kiž njeje jeno dźěćom, ale tež dorosćenym wulku porciju adwentneho měra a přezjednosće do wutrobow pósłał.

Weronika Bulankowa

Wuměnkarjow zawjeselili

póndźela, 12. decembera 2016 spisane wot:

Na přeprošenje wjesnjanosty gmejny Chrósćicy Marka Klimana (CDU) zetkachu so tele dny wuměnkarjo k zhromadnej adwentničce w sydarni Chróšćanskeje wjacezaměroweje hale „Jednota“. Tam dožiwichu hosćo wobšěrny kulturny program šulerjow zakładneje šule „Jurij Chěžka“. Z wušiknosću a połni elana dopokazachu wuknjacy swoje kmanosće w spěwach, basnjach kaž tež w spěwnych a hudźbnych scenach. Jako wjeršk předstaji 4. lětnik bajku wo „zbožownym Janku“. Wučerkam a šulerjam słuša dźak za derje poradźeny kulturny poskitk.

Po programje dachu sej wuměnkarjo kofej, wosušk a dalše přikuski słodźeć, kotrež běštaj Chróšćanski pjekar Florian Zahrodnik a firma EVSE sponserowałoj. Přizamkny so čiła rozmołwa. Kaž bě z njeje wusłyšeć, sej seniorojo jara chwala, zo su zaso jónu po jara dołhim času tež na staršu generaciju myslili. Šulerjo wužiwachu składnosć, hosćom swoje paslenki poskićeć. Dobytk a pjenježne připóznaće gmejny nochcedźa za sebje wužiwać, ale darja woboje Towarstwu swj. Filomeny.

Swjaty Mikławš w pěstowarni był

štwórtk, 08. decembera 2016 spisane wot:

Na swjedźenju swjateho Mikławša wopyta farar Michał Nawka zawčerawšim Njebjelčansku pěstowarnju „Barbojte kamuški“, kotraž je w nošerstwje Miłočanskeho Křesćansko-socialneho kubłanskeho skutka. Wón powědaše dźěćom stawiznu wo swjatym Mikławšu. Tón bě w štwórtym lětstotku žiwy w regionje Lykiska w dźensnišej Turkowskej. Pozdźišo ćehnješe do města Myra. Dźensa je to Demre nad Srjedźnym morjom. Wón bě stajny pomocnik w nuzy, je domy za syroty a chudych twarić dał a pomhaše namórnikam, kotřiž njemóžachu swoje dźěło hižo wukonjeć.

Dźěći stawiznu wćipnje sćěhowachu, a napjatosć stupaše, jako so farar Nawka kaž swjaty Mikławš zdrasći a rozjasni, što na přikład mitra a pastyrski kij woznamjenjatej. Wězo měješe za dźěći tež překwapjenku přihotowanu. Wone so Njebjelčanskemu wosadnemu fararjej z pěsnjemi tohorunja w mjenje swojich kubłarkow dźakowachu. Maik Brězan

Na swoju tradicionalnu adwentničku běchu Němčanscy wuměnkarjo tele dny do Grofic galerije přeprošeni. Wjace hač 60 staršich ludźi je přeprošenje sćěhowało.

Zamołwita za dźěło ze seniorami Roswitha Šołćina wšitkich wutrobnje witaše. Zhromadnje spěwachu woni adwentne a hodowne pěsnje. Talerje ze słódnym wosuškom a kofej hižo wabjachu. Po tym postrowichu rentnarjow chowancy Němčanskeje pěstowarnje „Pumpot“. Ze serbskimi spěwami kaž „Swjaty Mikławš“ a wo rumpodichu kaž tež z dalšimi woni přitomnych zawjeselichu. Skupina předšulskich dźěći předstaji mały skeč. Z darom a wulkim přikleskom hosćo małych wuměłcow rozžohnowachu.

Dźěćom w Němcach z knihi čitała

wutora, 22. nowembera 2016 spisane wot:

Z Budyšina do Němcow je minjeny pjatk přijěła bywša pěstowarka Jadwiga Wejšina. W našej Witaj-pěstowarni „Pumpot“, kotraž je w nošerstwje Serbskeho šul­skeho towarstwa, dźěći wulkeje skupiny hosća njesćerpnje wočakowachu. Hižo do toho běchmy so wo předčitanskim dnju rozmołwjeli a so nadźijeli, zo nas z wowkow, dźědow abo přiwuznistwa něchtó wopyta. Tak bě wjeselo wulke, jako­ knjeni Wejšina z knihu w ruce do jstwy zastupi. Dźěći so z wulkim wočakowanjom w kruhu na stólcy zesydachu.

Kniha Jěwy-Marje Čornakec „Kak je wroblik Frido lětać nawuknył“ bě jim nowosć. Jara wutrajnje wone čitanje sćěhowachu a sćerpliwje słuchachu. W rozmołwje so tón abo tamny słowa jimaše, z čehož bě wusłyšeć, zo su holcy a hólcy wšitko zrozumili.

Zo je nas Jadwiga Wejšina na tymle dnju z rjanej serbskej knihu překwapiła, nas wosebje zwjesela. Přichodne dny chcemy dźěćom dale z knihi předčitać a sej z nimi wobrazy wobhladać.

Gabriela Hórnikowa

Na slědach swjateje Ludmile

pjatk, 18. nowembera 2016 spisane wot:

Na přeprošenje čěskeho towarstwa „Svatá Ludmila“ poda so minjenu póndźelu přibližnje 50 Serbowkow a Serbow na slědy swj. Ludmile do sewjeročěskeho wokrjesneho města Česká Lípa. Ju česćuja jako dobru wjerchowku a swjatu žónsku na stronje swojeho mandźelskeho Borživoja z rodu Přemysłow a zdobom jako wowku a kubłarku pozdźišeho wjercha Wjacława. Tak steješe wona jako wurjadna historiska wosobina na spočatku konstituowanja čěskeho naroda w 9. a 10. wěku. Dźěše tehdy wo zjednoćenje słowjanskich kmjenow. Přez lětstotki wobwliwowaše jeje skutkowanje sobu čěski stat a jeho duchowne wuwiće.

Nětko wotměwa so k wopominanju wuznamneje wjerchowki a maćerje pjeć dźěći 1 100. róčnica jeje namócneje smjerće. 15. septembra 921 wona na Tetinskim hrodźišću Tuntowa a Gommona jako martrarka za wěru a narod zemrě. Tuž njeměło so tež w dźensnišim času na nju pozabyć, a to byrnjež Čěska mjeztym do sobu najsekularizowanišich krajow słušała.

Na přeprošenje serbskeje zapósłanče Němskeho zwjazkoweho sejma Marje Michałkoweje (CDU) podachmy so njedawno na ekskursiju do stolicy. Nimo nas Smječkečanow bě tež hišće skupina z Budyšina pódla.

Rano we wosmich nastajichmy so z busom na puć. Přez Wojerecy jěducy docpěchmy krótko do připołdnja w Berlinje krajne­ zastupnistwo Sakskeje. W měšćanskim dźělu Neukölln zaměstnjena institucija reprezentuje swobodny stat na polu turizma, hospodarstwa, šulstwa a hišće wjele dalšich hałzow zjawneho žiwjenja.­

Po zhromadnym wobjedźe jědźechmy do ministerstwa za strowotu, hłowneho ressorta našeje hosćićelki. Tu rozjasni nam přistajena zmysł a zaměr kaž tež hłowne wosoby domu.

Dokelž bě přenocowanje planowane, mějachmy jako přichodne check-in do hotela w měšćanskim dźělu Berlin­Wedding. Dźeń zakónčichmy na łódźi. Jěducy­ po Sprjewi smy dožiwjenja dnja krok po kroku předźěłali.

Wjele wo susodnym kraju zhonili

pjatk, 28. oktobera 2016 spisane wot:

Mnozy šulerjo Kulowskeje wyšeje šule „Korla Awgust Kocor“ so zawčerawšim njemało dźiwachu, jako widźachu na šulskim dworje awto z napisom „Polenmobil“. Dale bě napis tež pólsce podaty. Na chódbje prěnjeho poschoda šule wisaše pólska chorhoj a běchu wšelake informaciske łopjena wupołožene. Pólski institut w Darmstadće přewjeduje cyłoněmski projekt. Hižo lěto jězdźa po jednotliwych zwjazkowych krajach Němskeje. Braniborski ministerski prezident Dietmar Woidke (SPD) tomule projektej kmótři.

W oktobru je mobil w Braniborskej a Sakskej po puću. Zaměr je mjez šulerjemi a wučerjemi zajim za pólsku rěč, stawizny, literaturu a žiwjenske wašnja budźić. Tomu su tež w Kulowje wotewrjeni, nic jenož dokelž maja partnerskej šuli w Pólskej a Čěskej. Šulska nawodnica prošeše tuž mobil do Kulowskeje šule. Zdobom informowaše pólsku partnersku šulu w Lubomierzu wo tym. Wottam přijědźechu ze šěsć šulerjemi do Kulowa.

Z wočomaj Polaka na event hladane

srjeda, 26. oktobera 2016 spisane wot:

Serbske Nowiny běchu wo swětowym zetkanju młodźiny w Krakowje kónc julija tohole lěta jako „wusahowacym dožiwjenju“ tež za něhdźe 70 serbskich młodostnych rozprawjeli. W Katolskim Po­sole pisachu někotři młodostni sami wo evenće, kotryž njeběše za nich zawěrno jeničce swjedźeń kaž někotryžkuli druhi, ale wuznamny a hłuboko sahacy po­dawk, w pomjatku zwostawacy. Budyskich katolskich seniorow pak njedawno zajimowaše, kak je pólski duchowny Grzegorz Malinowski, kiž skutkowaše do swojeho kapłanjenja w Budyšinje hižo jako farar dwě lěće we Worcynje, němskich młodostnych w swojej pólskej domiznje mjez wulkimi syłami młodeje křesćanskeje generacije ze 180 krajow dožiwił. Znaje dźě wón nětko dosć derje němsku mentalitu, kotraž so wot pólskeje chětro rozeznawa. „Za mnohich běše to jara dobra­ přiležnosć, Pólsku prawje derje zeznać­“, wón wuzběhny. Zawěsće so tež tak předsudki złahodźeja.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND