Spominaja na spisowaćelku
Budyšin. Štwórtk, 28. měrca, su zajimcy w 19.30 hodź. do Budyskeje Smolerjec kniharnje na literarny program „Přez horiny a doliny“ na česć stotych narodnin serbskeje spisowaćelki Hańže Bjeńšoweje (27.03.1919 – 15.03.1999) přeprošeni. Z jeje twórbow čitaja čłonojo towarstwa Přećeljo Smolerjec kniharnje. Skedźbnić chcedźa zarjadowarjo tež na knihu „Nitka Witka a druhe stworjenčka“, wudatu wot syna Handrija Bjeńša.
Rozprawjataj wo pućowanju
Wojerecy. Přichodne zetkanje seniorow Křesćansko-socialneho kubłanskeho skutka je jutře, srjedu, w 10 hodź. na Wojerowskej dźěćacej a młodźinskej farmje. Tam rozprawjataj Fischerec mandźelskaj wo swojim pućowanju na tak mjenowanu jutrownu kupu. Wona leži něhdźe 3 700 kilometrow před Chile w Pacifiskim oceanje a je dospołnje izolowana. Prawobydlerjo wuwichu tam swójsku kulturu a rěč. Přednošowarjej rysujetaj wulkotny a dawno zabyty swět.
Bjesada z dobrej bilancu
Po tym zo běchu so Jasčenjo spočatk měrca k póstniskej zabawje w kulturnym domje zetkali, běchu woni tele dny na sobustawsku zhromadźiznu wjesneho towarstwa prošeni. Předsyda Guido Zahrodnik móžeše před 35 přitomnymi pozitiwnu bilancu dźěławosće w lěće 2018 sćahnyć. Derje wopytanej běštej mjez druhim swětłowobrazowy přednošk loni w měrcu kaž tež adwentnička w decembru. Wjeršk lěta 2018 pak bě wjesny swjedźeń, kotryž wotmě so wot 8. do 10. junija. Jara dobre bě tež dźěłowe zasadźenje na sportnišću a wokoło kulturneho domu do swjedźenja.
W financnej rozprawje pokładnik towarstwa Tomaš Nowak přitomnym rozprawješe, zo su Jasčenjo solidnje z pjenjezami wobchadźeli a zo maja tuž plus na konće.
Tež za lěto 2019 sej wjesnjenjo wjacore zarjadowanja zaplanowachu, a předsydstwo Bjesady nadźija so bohateho wopyta na nich. Přichodne zetkanje budźe njedźelu, 14. apryla. Tón dźeń wočakuja w kulturnym domje rozhłosownika Bena Bělka, kiž chce Jasčanam a dalšim zajimcam z pomocu wobrazow wo swojich jězbach po swěće rozprawjeć. Ludwig Zahrodnik
Wosebitu trěbnosć dopokazać
Za nowe twarske ležownosće měli dobru argumentaciju zdźěłać
Pančicy-Kukow (SN/MWj). Hižo dlěši čas zaběra so zarjadniski zwjazk Při Klóšterskej wodźe z dalšej změnu plana wužiwanja ležownosćow. Změnić dyrbi so plan mjez druhim tohodla, dokelž chce na přikład gmejna Pančicy-Kukow mjez tankownju a Srjedźnym pućom płoninu zapisać dać, na kotrejž móhli nowe jednoswójbne domy nastać. Tak jednore, kaž so to na prěni pohlad być zda, pak to njeje. To zhonichu zastupjerjo pjeć sobustawskich gmejnow zarjadniskeho zwjazka na swojim zašłym posedźenju wot krajinoweho planowarja Ernsta Pansy. Wón rozłoži, zo stej regionalny planowanski zwjazk a krajna direkcija napominałoj hišće raz wo tym rozmyslować, kak měli so nowotwarske ležownosće přichodnje wuwiwać. Po słowach Pansy budu nowe twarske płoniny jenož potom dowolene, hdyž wone swójskemu wuwiću jednotliwych wsow słuža. Při tym dyrbi dopokazane być, zo su tajke nowe płoniny trěbne. A bjez dopokaza njehodźi so tež žana změna plana wužiwanja ležownosćow dowolić, rjekny krajinowy planowar.
Bórze zahaja nowu sezonu
Při Bjerwałdskim jězoru jako najwjetšim Sakskeje zahaja přichodnu póndźelu lětušu wodosportowu sezonu. Lubowarjo tajkich aktiwitow na to hižo dawno čakaja.
Hamor (AK/SN). Wodosportowu sezonu 2019 při Bjerwałdskim jězoru tuchwilu z połnej paru přihotuja. To podšmórny Hamorski wjesnjanosta Achim Junker (CDU) na zašłym posedźenju tamnišeje gmejnskeje rady. „Přichodne dny a tydźenje naša infrastrukturna skupina wšitke připrawy za turizm přihotuje. To nastupa jednotliwe wotrězki přibrjohow, syć kolesowanskich šćežkow, zjawne płuwace pontony, zjawne nuzniki a turistiski informaciski centrum“, Junker rozłoži. Póndźelu, 1. apryla, nowu wodosportowu sezonu oficialnje zahaja.
Hamorec hat wosrjedź Chrjebje je wudźerjam dobre městno, hdźež ...
Rana njewuhojena
Mosty twarić abo hrjebje pohłubšić
Prěni přirjadnik Udo Wićaz (CDU) zamołwja zaso zarjad za wukrajnikow w Budyskim krajnoradnym zarjedźe. To je wokrjesny sejmik wčera wječor wobzamknył. Bě pak rjad radźićelow, kotřiž mějachu tónle namjet krajneho rady Michaela Hariga (CDU) za wopačny.
Budyšin (SN/at). Astrid Riechmann ze zwjazkarstwa „Budyšin je pisany“ je hižo w hodźinje wobydlerskich naprašowanjow na łoskoćiwy dypk dnjoweho porjada wčerawšeho posedźenja Budyskeho wokrjesneho sejmika skedźbniła. Wona prašeše so Uda Wićaza: „Z kotrymi konkretnymi naprawami chceće Wy dowěru čestnohamtsce skutkowacych znowa docpěć?“ Na namjet krajneho rady Michaela Hariga měješe so zarjad za wukrajnikow zaso wobchodniskemu wobłukej prěnjeho přirjadnika přirjadować. Harig bě tónle zarjad 21. awgusta 2017 komisarisce do swojeho wobłuka přewzał, wšako bě Wićaz jako amtěrowacy krajny rada po kontaktach z bywšim wokrjesnym předsydu NPD Marcom Wruckom na Facebooku w naležnosći ćěkancow dla raznu kritiku jich čestnohamtskich podpěraćelow, ale předewšem tež frakcijow Lěwicy a SPD/Zelenych žnjał.
Krótkopowěsće (26.03.19)
Rozsudna železniska wóska
Choćebuz. Po słowach jednaćela towaršnosće Łužiski hospodarski region Torstena Borka je „čara Budyšin–Wojerecy za strukturnu změnu rozsudna wóska, kotraž móže a dyrbi tež Hornju Łužicu spěšnje Berlinej zbližić“. Kombinowane ze železniskej čaru Choćebuz–Schönefeld docpěja Łužičenjo nowu dimensiju spěšnosće a dynamiki, rjekny Bork wčera na wopyće w Schönefeldźe.
Šulski zarjad přestrukturowany
Budyšin. Georg Richter šulski zarjad w Budyskim krajnoradnym zarjedźe po komisariskej fazy nětko oficialnje nawjeduje. Wo tym je prěni přirjadnik krajneho rady Udo Wićaz (CDU) wčera wokrjesny sejmik informował. Přestrukturowany šulski zarjad ma wěcnej wobłukaj šulske zarjadnistwo kaž tež šulske wuwiće a kubłanje, do kotrehož słušatej planowanje šulskeje syće a digitalizacija na šulach.
Nowy nakład „Mištra Krabata“
Wuchowarjo rěče so zetkaja
Budyšin. Přichodne zarjadowanje Budyskeho kluba wuchowarjow rěče wotměje so jutře, wutoru, we 18 hodź. w Budyskim hosćencu „Sprjewina pensija“. Tam čita Budyska awtorka Christiane Schlenzig ze swojeho romana „Wenn jede Stunde zählt“. Zastup je darmotny, zajimcy su wutrobnje witani.
Předstaja twarski projekt
Jenkecy/Bošecy. Přichodne tři lěta chce Budyski wokrjes w Jenkecach wokrjesnu dróhu K 7238 po cyłkownej dołhosći 1,2 kilometrow wobšěrnje ponowić. 15. apryla započnu dźěłać. K tomu wotměje so zajutřišim, srjedu, w 19 hodź. wobydlerska zhromadźizna w jědźerni Bošečanskeje zakładneje šule. Tam chcedźa časowy plan jednotliwych wotrězkow a twarsku firmu bliže předstajić.
Zhladuja wróćo a doprědka
Policija (25.03.19)
Bydlenske durje zapalił
Kamjenc. Wohnjowu woboru, wuchowansku słužbu a policiju wołachu zawčerawšim popołdnju na Schillowu w Kamjencu. Tam bě 28lětny muž we wjacebydlenskim domje durje bydlenja zapalił. Pozadk běchu najskerje priwatne rozestajenja. W bydlenju běchu w tym času 31lětna žona ze swojimaj dźěsćomaj w starobje jednoho a dźesać lět kaž tež hosćej. Skućićel a žona so znaještaj. Wobornicy płomjenja zhašachu. Wšitke pjeć wosobow z bydlenja dowjezechu do chorownje. Skućićel bě policiji znaty. Jeho dosahnychu pozdźišo pola znateho w měsće a jeho nachwilnje zajachu. Kriminalna policija přepytuje pad nětko jako pospyt morjenja.
