Krótkopowěsće (06.03.20)
53. Zeszyty Łużyckie wušli
Waršawa. W Instituće za zapadnu a južnu slawistiku Waršawskeje uniwersity su 53. Zeszyty Łużyckie z ćežišćom „Małe rěče pytaja za identitu“ wušli. Mjez druhim pisaja tam Nicole Dołowy-Rybińska a Cordula Ratajczakowa wo rěčnej praksy na Serbskim gymnaziju, Dietrich Šołta wo knize „Świtanie“ Haliny Barań a Zdzisław Kłos wo biografiji Benedikta Dyrlicha „Doma we wućekach 1“.
Kretschmer podpěruje ratarjow
Drježdźany. Sakski ministerski prezident Michael Kretschmer (CDU) wostaja wotewrjene, hač Sakska w Zwjazkowej radźe nowelěrowanju hnojenskich postajenjow přihłosuje. „Widźu to jara, jara kritisce“, rjekny wón stam ratarjow, kotřiž su wčera w Drježdźanach demonstrowali. Kretschmer chce tomu zadźěwać, zo „činja na škodu přistojnych ratarjow politiku, kotraž prawa njeje“.
Tež Hilse wotpokazany
Policija (05.03.20)
Trik z wnučkom njefungował
Kamjenc. Hnydom třo rentnarjo w Kamjencu a wokolinje dóstachu předwčerawšim spodźiwne telefonaty wot pozdatnych wnučkow. W prěnim padźe žadaše sej njeznaty 25 000 eurow a přizjewi, zo chce popołdnju na kofej přińć a sej pjenjezy wotewzać. W druhim padźe dósta 82lětna podobny telefonat. Tež tu so wobšudnik ke kofejej přizjewi a wudawaše, zo trjeba pjenjezy. Přišoł pak nichtó njeje. A skónčnje přizjewi so njeznaty pola 90lětneje žony a žadaše sej 20 000 eurow. Na zbožo wšitcy třo rentnarjo pospyt wobšudnistwa spóznachu a słuchatko połožichu. Wšitke pady je kriminalna policija přewzała a namołwja staršich ludźi, dale skedźbni być.
Płaćizny njejsu přemóžace
Nowosličanske hońtwjerske drustwo hłownu zhromadźiznu přewjedło
Nowoslicy (aha/SN). Wjetšina 55 zapisanych čłonow Nowosličanskeho hońtwjerskeho drustwa je so na wutornej hłownej zhromadźiznje w tamnišim towarstwowym domje wobdźěliła. Kaž předsyda drustwa Pětr Wawry rozprawješe, přewostajeja woni wotnajerjam cyłkownu płoninu 354 hektarow. Přewažnje su to pola a łuki kaž tež 116 hektarow lěsa. Čłonka předsydstwa drustwa Gesine Kutterowa je w swojej rozprawje wo financach tež lońše wupłaćenja wotnajerjam wuhódnoćiła. To wšak žada sej dokładne dźěło, hdyž dyrbja 587 zahonow a parcelow rozdźělneje wulkosće wobkedźbować, zo bychu kóždeho mějićela objektiwnje wupłaćili.
Archiw přistupny
Policajske awto wobškodźene
Pytaja za swědkami njeskutka
Wojuja dale
Ralbicy (SN/JaW). Serbske šulske towarstwo (SŠT) wočakuje jasne žadanje gmejnskeje rady Ralbicy-Róžant, wutworić dwě rjadowni w 5. lětniku. To zdźěli našemu wječornikej předsydka SŠT Ludmila Budarjowa na naprašowanje. Wona liči „ze stron politikarjow a statnych zamołwitych z jasnym rozsudom za dwě rjadowni, hewak wostanu wšitke zjawne akcije jenož hołe słowa“. Kaž SN zhonichu, zetka so gmejnska rada Ralbicy-Róžant dźensa k wurjadnemu klawsurnemu posedźenju w naležnosći.
Krótkopowěsće (05.03.20)
Přizjewjenski čas podlěšeny
Drježdźany. Zajimowane towarstwa móža so dale za lětuši Dźeń Saksow přizjewić. Online zapodate namjety za „najwjetši wobydlerski a domizniski swjedźeń w swobodnym staće“, wotměwacy so wot 4. do. 6. septembra, přijimuja hišće hač do 31. měrca, kaž statna kenclija wčera na nowinarskej konferency w Sakskim krajnym sejmje informowaše.
Dobre demografiske wuwiće
Chrósćicy. Negatiwne demografiske prognozy njejsu so za serbske wsy dopjelnili. To praji Katharina Jurkowa, regionalna rěčnica za Kamjensku župu „Michał Hórnik“, wčera w Chrósćicach. Problem njeje hižo, zo maja přemało maćernorěčnych serbskich dźěći, ličba skerje přiběra. Wužadanje nětko je, dosć rumnosćow w dźěćacych dnjowych zarjadnišćach a šulach kaž tež dosć kubłarjow a wučerjow namakać.
Hwězda nad Błótami
Hotowarniče so zetkaja
Chrósćicy. Župa „Michał Hórnik“ přeproša na zetkanje hotowarničow katolskeje narodneje drasty, kotrež je jutře, štwórtk, w 19 hodź. w Chróšćanskim gmejnskim a kulturnym centrumje na Hórnikowej 34. Zawodny přednošk pod hesłom „Kaž we swěće moda je“ poda Andrea Pawlikowa z Budyskeho Serbskeho muzeja. Přizamknje so diskusija.
Skupinarjo přeprošeni
Pančicy-Kukow. Domowinska skupina Pančicy-Kukow přeproša swojich čłonow a dalšich zajimcow na přichodne zarjadowanje jutře, 5. měrca, w 19 hodź. w awli Šule Ćišinskeho. Tam přednošuje Pětr Rab z Kukowa ze swětłowobrazami wo swojich dožiwjenjach w srjedźnej Rumunskej. Wšitcy su wutrobnje witani.
Znowa wosebita přehladka
Policija (04.03.20)
Z awtom do ponyja zrazyła
Kulow. Njewšědne njezbožo sta so póndźelu popołdnju na Mučowskej dróze w Kulowje. Tam bě žona z Toyotu z Wojerowskeje dróhi do směra na Mučow po puću. Nadobo stupi cyle njewšědny zawinowar njezbožow na jězdnju – pony. Šoferka wosoboweho awta njezamó hižo borzdźić a zrazy do njeho. Wona so na zbožo njezrani. Tež pony, kotrehož bě sej skótny lěkar dokładnje wobhladał, wosta po zdaću njezranjeny. Přiwšěm wučinja wěcna škoda něhdźe 3 000 eurow.
