Policija (25.11.19)
Rozestajenje na „plaće“
Budyšin. 28lětny wukrajnik bě po šwarnym konsumje alkohola (2,46 promilow) sobotu nawječor na Budyskich Žitnych wikach 13lětnej holcy narěčał. Muž chcyše, zo so z nim do jeho bydlenja podatej. Po tym zo wonej to raznje wotpokazaštej, ćahaše wopity za jeju drastu. Tole wobkedźbujo so 27lětny wobydler, tohorunja alkoholizowany, do wukrajnika da a jeho chětro namócnje na zemju storhny. Holcy móžeštej so tak wuwinyć. Zawinowarja rozestajenja na „plaće“ dyrbjachu do chorownje dowjezć.
Njedźelny zakaz kontrolowali
Budyšin. Na awtodróze A 4 mjez Zhorjelcom a Drježdźanami je Budyska policija wčera w nocy dodźerženje zakaza njedźelneho jězdźenja nakładnych awtow z cyłkownej wahu wjace hač 7,5 tonow přepruwowała. W kontrolnym centrumje zwěsćichu šěsć přeńdźenjow.
Bus do awta zajěł
Minakał. Na statnej dróze S 106 mjez Łomskom a Minakałom njeje wodźer busa pjatk připołdnju předjězbu Mitsubishija wobkedźbował a zajědźe do njeho. Minakałska wohnjowa wobora městno njezboža zawěsći. Zranił so nichtó njeje.
Jeničce při přilubjenju Domowiny wostało
Mjeztym hižo dźesać lět zaruča Šunowčanka Erika Maywaldowa dźěćom a młodostnym z Konjec a Šunowa kreatiwnu zaběru. Spočatnje bě to stajnje na adwentnym zarjadowanju w towarstwowym domje, hdźež móžachu dźěći z wot njeje wobstaranym materialom paslić dariki a hodownu pychu.
Konjecy (aha/SN). Mjeztym so wona hižo wjacore lěta tež wo to stara, zo runočasnje, hdyž młodźina w Šunowje meju mjeta, mejemjetanje tež w Konjecach dostojnje woswjeća. Z dalšimi přewza zamołwitosć, zo su při tym dźěći w pyšnych narodnych drastach, lětsa bě jich samo 14 porow. Zo maja čłonojo Domowinskeje skupiny na swojej adwentničce rjany program, nazwučuje z pomocu dalšich z dźěćimi dźiwadłowu hru. Lětsa je předwidźane, wšě dźěći, kotrež zamóža instrument hrać, do wotměnjaweho hudźbneho programa zapřijeć. Za wšo to a druhe dźěła je wužiwała swoje priwatne rumnosće.
Z kina a dźiwadła zaso domoj
Wobchadne předewzaća wot 15. decembra na lěpšu mobilitu nastajene
Budyšin (SN/mwe). Z nowym železniskim jězbnym planom mjez Drježdźanami a Zhorjelcom, mjez Drježdźanami a Žitawu kaž tež do Libereca startuje wuchodosakska syć 15. decembra do lěpšeje mobility. Runočasnje su čary z Drježdźan do Kinsporka a Kamjenca wot toho potrjechene. Paralelnje k železnicy budu w Budyskim wokrjesu štyri linije PlusBusa po puću. Na naprašowanje Serbskich Nowin Hornjołužisko-Delnjošleski wobchadny zaměrowy zwjazk (ZVON) zdźěli, zo potrjechi to tež PlusBusowu liniju 102 z Budyšina do Kamjenca. To rěka, zo je bus mjez 4.30 hodź. a 23.15 hodź. kóždu hodźinu po puću. Na kóncu tydźenja pojědu busy tuž 19 króć z Budyšina do Prěčec a Pančic-Kukowa přez Hlinowc do Lessingoweho města a zaso wróćo. „To je šěsć jězbnych porow wjace, hač po starym jězbnym planje. Wjace hač by trěbne było, zo mjenujemy bus ‚PlusBus‘“, Sandra Trebesius z nowinarskeho běrowa ZVON zdźěli. „Nimo toho pojědu kóždu sobotu dwaj jězbnej poraj wjace hač dotal a njedźelu je bus tež štyri razow do kóždeho směra po puću.“
Nowe předsydstwo
Kamjenc. Na swojim njedawnym wurjadnym posedźenju je Kamjenske towarstwo „Měšćanska dźěłarnja-wobydlerska łuka“ nowe předsydstwo wuzwoliło. Předsydka je Simone Kirschke. Zaměr 25 čłonow wopřijaceho towarstwa je, „Kamjenčanow hromadu a Kamjenc doprědka wjesć.“ Lětsa bě cyłk wjace hač 90 zarjadowanjow organizował. K tomu słušeja koncerty, čitanja, politiske diskusijne zarjadowanja, paslenske popołdnja kaž tež prózdninska zaběra za dźěći.
Ćahi jako modele
Połčnica. We Wuchodosakskej wuměłstwowej hali Połčnica budu wot 29. nowembra do 1. decembra modele železnicow a wšitko, štož k tomu słuša, widźeć. Połčničanscy přećeljo modelowych železnicow předstaja 12 čarow, mjez nimi Tharandtsku rampu. Dwanaće kilometrow dołhi wotrězk mjez Tharandtskim dwórnišćom a Klingenbergom-Colmnitzom we woprawdźitosći hižo 157 lět eksistuje a je přeco hišće najnahliši postup normalneje železniskeje čary w Němskej. Přistupna je wustajeńca pjatk, 29. nowembra, wot 15 do 19 hodź., nazajtra wot 10 do 19 hodź. a njedźelu, 1. decembra, wot 10 do 18 hodź.
Kuliški škitać
Hišće do hód chcedźa wupisać
Kašecy (SN/JaW). Spěchowanske srědki k zwottorhanju stareho hosćenca w Pančicach-Kukowje je tamniša gmejna w połnej wysokosći přizwolene dóstała. Wo tym informowaše wjesnjanosta Markus Kreuz gmejnskich radźićelow na minjenym posedźenju gremija w Kaščanskim wjacezaměrowym domje.
Christina Smolina (prědku naprawo), Tereza Wokowa (njeje na foće) a ...
Wuhotuje serbske wukładne wokna
We wěrje nańdźe wona posylnjenje za wšědny dźeń. „Moja mać je nas po katolskej wěrje kubłała. Staršej přińdźeštaj jako ćěkancaj po Druhej swětowej wójnje do Hornjeje Łužicy: mać ze Šleskeje, nan z Pruskeje. Běchmy doma šěsć dźěći“, powěda Evelin Graf wo swojim dźěćatstwje. Mjezsobnu socialnosć je wona hižo zahe w swójbje nazhoniła.
W ródnym měsće Wojerecach angažuje so 70lětna mjeztym w štwórtej legislaturnej periodźe jako předsydka přirady zbrašenych. Wot lěta 2014 přisłuša wona tež Wojerowskej přiradźe za serbske naležnosće a je mjeztym jeje předsydka. Wot lětušeho zdobom w seniorskej přiradźe a w dźěłowej skupinje za wobydlerski etat sobu skutkuje.
Wopismo dóstali
Drježdźany (SN/BŠe). Cyłkownje 275 rjemjeslniskich mištrow – 33 žonow a 242 muži – je předwčerawšim w Drježdźanach swoje wopismo dóstało. Pod hesłom „Mištrojo 2019 – wo zakładnych kamjenjach, měznikach, drohokamjenjach“ su jich w přitomnosći mnohich wuznamnych hosći z politiki, towaršnosće a rjemjeslnistwa wosebje počesćili.
Prezident Drježdźanskeje rjemjeslniskeje komory Jörg Dittrich je na mišterskim swjedźenju w Drježdźanskim wikowym wustajenišću składnosć wužił, do přichoda zhladować. „Přeradźu wam, čehodla je přichod pozitiwny. Přicpěju wam, jón wuhotować“, wón před něhdźe 2 600 přitomnymi wuzběhny. Kaž su dopokazali, wšak wšitke wužadanja zmištruja. Jörg Dittrich skedźbni tohorunja na to, zo měło so rjemjeslnistwo dale wuwić, za čož pak su wotpowědne wobłukowe wuměnjenja trěbne. Tak měło so na přikład hódnoćenje mištrow w jich zawodach bóle wotbłyšćować. Nimo toho měło atraktiwniše być so zesamostatnić a w tym nastupanju běrokratiske zadźěwki dale a bóle wotstronić.
Wot lěta 2016 dóstawaja nowi mištrojo, kotřiž w Sakskej bydla, bonus 1 000 eurow. Lětsa z toho 240 ludźi profituje.
Krótkopowěsće (25.11.19)
402 twórbje zapodatej
Lipsk. Za Myto Lipšćanskich knižnych wikow 2020 je 134 nakładnistwow 402 twórbje zapodało. Jury z předsydu Jensom Biskyjom chce z nich pjeć kandidatow za kategorije beletristika, wěcowna literatura a přełožk hač do 11. februara 2020 nominować. Tónraz je so dwójce telko awtorow za wěcownu literaturu požadało. Lipšćanske knižne wiki wotměja so klětu wot 12. do 15. měrca.
Protest haj, njeskutki ně
Choćebuz. Choćebuski wyši měšćanosta Holger Kelch (CDU) přizamkny so hromadźe z direktorku Picnjanskeho zarjada Elviru Höltzner a dalšimi namołwje zawodneje rady Janšojskeje milinarnje k protestnemu kóncej tydźenja. Namołwjało bě zwjazkarstwo „Ende Gelände“. Měrniwy protest je legitimny, njesmě pak k žanym njeskutkam dóńć.
Wjace turistow zličili
Budyšin. Turizm w Hornjej Łužicy dale přiběra. Kaž Marketingowa towaršnosć Hornja Łužica-Delnja Šleska zdźěli, je ličba turistiskich přichadow lětsa po dźewjeć měsacach porno lońšemu wo 6,4 procenty na 600 984 rozrostła. Přenocowanja přiběrachu wo 4,7 procentow na 1 588 617. Přerězny přebytk leži z 2,6 dnjemi snadnje nad sakskim přerězkom.
Pomnik za padłych sporjedźa
Trjebin (AK/SN). Pomnik za w Druhej swětowej wójnje padłych sowjetskich wojakow w Trjebinje chcedźa we wsy wudospołnić a sporjedźeć. K tomu wuzna so njedawno Trjebinska gmejnska rada na swojej zhromadźiznje. Jednohłósnje je gremij přepodaće dweju nadawkow za to wobzamknył. Stej to wudospołnjenje napisa pomnika kaž tež jeho sporjedźenje.
Firma Karl a Christin Petitjean z Derbna (Döbern), kotraž zhotowja narowne kamjenje, chce napis wudospołnić. Kóšty wučinjeja něhdźe 380 eurow. Twarska firma Svena Barona z Trjebina pomnik za něhdźe 9 200 eurow sporjedźi a ma předewšěm wotpuknjenja wotstronić.
