Zasadźeja so za čiste hrajkanišća w bydlenskej štwórći
Budyšin (CS/SN). W Budyskej měšćanskej štwórći Strowotna studnja su dźěłowu skupinu hrajkanišća wutworili, kotrejž tuchwilu sydom čłonow přisłuša. Wjetši dźěl z nich ma dźěći. Tohodla je jim wutrobna naležnosć, zo móža holcy a hólcy na čistych hrajkanišćach přebywać. Minjenu njedźelu namołwjachu woni tuž k akciji, zo bychu najprjedy raz na wulkim dyrdomdejskim hrajkanišću na Einsteinowej njerjad rumowali. Čłonam dźěłoweje skupiny so hišće raz telko wobydlerjow přidruži. Do wotpadkowych titow zběrachu hłownje zbytki cigaretow a črjopy. Aktiwistam je njezrozumliwe, zo ludźo runje na hrajkanišćach swój njerjad ležo wostajeja. Za to dźě je dosć papjernikow. Čłonojo dźěłoweje skupiny běchu tykanc napjekli a za horcy lětni dźeń chłódne napoje přihotowali, za dźěći wosebity hrajkanski kašćik.
Nade wšěm so zmij znošuje
Na fasadźe statoka nastawa njewšědna wuměłska twórba
Chrósćicy (SN/MWj). Jěducy tele dny ze Zejic do Chrósćic móžeš takrjec live wobkedźbować, kak njewšědna wuměłska twórba nastawa. Na 80 kwadratnych metrow wulkej fasadźe Kralec statoka moluje Šćěpan Hanuš wobraz pod hesłom „Serbske potajnosće“. Z tymle projektom je so Sakski krajny kuratorij wjesny rum na wubědźowanju „Ideje za wjesne kónčiny“ sakskeho ministerstwa za wobswět a ratarstwo wobdźělił.
Policija (31.07.19)
Při montaži sat-připrawy znjezbožił
Jitk. 70lětny muž je póndźelu popołdnju w Jitku při montaži satelitoweje připrawy znjezbožił. Róšty běchu domskemu přistajene, njeběchu pak kruće zakótwjene. Tak so rentnar z róštami powróći a padny štyri metry do hłubiny. Ćežko zranjeneho dyrbjachu jeho pomocnicy z helikopterom do chorownje transportować.
Jasne lěpšiny za Lessingowe město
Za Kamjensku halowu kupjel je rozrosanje wotwidźomne, kotrež je poprawom kóždy wočakował. Tohodla něchtóžkuli njerozumi, čehodla su wo tym scyła diskutowali.
Kamjenc (UM/SN). W rozestajenju wo přichodne městno haloweje kupjele w zapadnym dźělu Budyskeho wokrjesa je wotwidźeć, zo rozsudźa so za město Kamjenc, a to lědma někoho překwapja. Znajmjeńša posudk wo městnosći, kotryž zawčerawšim wokrjesnemu wuběrkej předstajichu, faworizuje, zo so Lessingowe město za tajke zarjadnišćo najlěpje hodźi.
Studija bě trěbna, dokelž je so na poslednim posedźenju wokrjesneho sejmika w hišće aktualnej wólbnej dobje diskusija wo móžnych alternatiwach jewiła. Nastorčili běchu ju předewšěm radźićeljo z Radebergskeje kónčiny. Woni měnja, zo dźě je Kamjenc hłowne zarjadniske sydło krajnoradneho zarjada. Radeberg ma jenož wotnožku wokrjesneje hudźbneje šule. Čehodla potajkim nic znajmjeńša pruwować, hač njeby tam tež halowa kupjel móžna była. Nětko předležacy posudk firmy ICL Ingenieur Consult pak to jasnje wotpokazuje.
Wšědnje něhdźe 70 wochłódźenje pytacych zličeja při ...
W serbskim kućiku so informować (4)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim lětnim serialu Serbskich Nowin wam projekty předstajamy.
W Serbach mamy kulturne žiwjenje z mnohimi poskitkami, kotrež Serbow wobohaćeja. To wě sej tež Dobroščan Marko Dźisławk česćić. „Wo wjele hižo wotmětych zarjadowanjach pak čitach hakle w nowinach“, wón rozprawja. Hižo dlěje je wón tuž wo hinašich móžnosćach rozmyslował, informacije mjez ludźimi šěrić. A tak je kusk po kusku ideju digitalneje app wuwiwał. Smartphone ma zwjetša kóždy při sebi, a tak móže na njekomplikowane wašnje za aktualnymi terminami pytać. Hladajo na wužiwanje appow, kaž tu Towaršneho spěwnika, je so „kapsny kompjuter“ jako jara dobry wopokazał. Ideju app digitalneje protyki je nan štyrjoch dźěći mjez druhim tež hižo załožbowej radźe předstajił, jako za nju kandidowaše. „Z jednorymi srědkami móžemy wjele, wosebje tež młodych ludźi docpěć“, je sej Dźisławk wěsty. Mjeztym ma tež mjeno za app, kotraž měła „serbski kućik“ rěkać.
Krótkopowěsće (31.07.19)
Wjelki znowa aktiwne
Šunow. Wjelki su wčera stadło wowcow pola Šunowa nadpadnyli a 20 z nich morili. To rozprawjeja wjacore regionalne medije. Dalše 20 skoćatow bu zranjene a tójšto ze 150 wowcow wopřijaceho stadła je z pastwy ćeknyło. Mjeztym pak móžeše je wobsedźer zaso popadnyć. Hač bě jedyn wjelk sam abo cyła črjóda stadło nadpadnyła, njeje jasne.
Něhdźe połsta bjezdźěłnych wjac
Budyšin. We wobłuku Budyskeje dźěłoweje agentury je nětko snadnje wjac ludźi bjez dźěła hač w juniju. Wo tym informowaše dźensa dopołdnja medijowa rěčnica zarjada Berit Kasten. Z cyłkownje 16 923 bjezdźěłnymi je jich w juliju 53 wjac. Aktualna kwota bjezdźěłnosće wučinja šěsć procentow. Za lochce wjetšu bjezdźěłnosć mjenuje agentura „sezonalne přičiny“ a zo přizjewja so wjele młodostnych po zakónčenju šule abo wukubłanja bjezdźěłnych.
Za strowotu hromadźe dźěłać
Policija (30.07.19)
Dróhi a pincy pod wodu stali
Worklecy. Njewjedra a sylnych zliwkow dla wołachu wčera wječor na wjacorych městnach wohnjowych wobornikow wo pomoc. Po informacijach Wojerowskeje centralneje dispatchernje bu we Worklecach ratarski statok zapławjeny. W Biskopicach, Porchowje a w gmejnje Ralbicy-Róžant dyrbjachu wobornicy wodu z pincow klumpać. W Kulowskej lěsnej kupjeli dyrbješe młodźinska redakcija Radija Satkula tamnišu staciju bičwolejbuloweho turněra dočasnje skónčić. Na někotrych městnach naměrichu wjace hač 50 litrow dešća na kwadratny meter.
Kontejner zapalili
Mały Wjelkow. Po wšěm zdaću wjele časa a mało rozuma mějachu njeznaći, kotřiž su minjenu njedźelu připołdnju na Wulkodubrawskej dróze w Małym Wjelkowje kontejner za trjebanu drastu a tři wotpadkowe sudobja za staru papjeru zapalili. Wohnjowi wobornicy woheń zhašachu. Škoda wučinja 2 000 eurow.
Awto rozdrapane
Njepřećahnu pjenjez dla
Za lěto móhli prěni zajimcy w Nowym Miłorazu twarić započeć
Slepo (AK/SN). Nowy Miłoraz sewjernje Slepoho su nětko wotkrywać započeli. „Zakład za to stej brunicowy plan z lěta 2014 a přesydlenske zrěčenje z měrca 2019. Hač do awgusta 2020 budu ležownosće medijam přizamknjene, tak zo móža zajimcy potom twarić. Hač do kónca lěta 2024 ma přesydlenje wotzamknjene być“, podšmórny Thomas Penk wot LEAG minjeny pjatk w Slepom.
Ze symboliskim prěnim zarywom su wotkryće noweje štwórće zahajili. Martin Klausch wot LEAG, Miłoraski wjesny předstejićer Enrico Kliemann a Slepjanski wjesnjanosta Reinhard Bork (CDU) su buk sadźili. Do zemje połožichu sudobjo z nowinami z dnja podpisanja přesydlenskeho zrěčenja a chroniku Miłoraskich podawkow wot lěta 2006.
Raz archeologa być
Kamjenc. Přichodny prózdninski poskitk za dźěći wotměje so w Kamjenskim Muzeju zapadneje Łužicy štwórtk, 1. awgusta. Tam chcedźa wobdźělnikam rozłožić, kak archeologojo dźěłaja a kak je zemja před něšto tysac lětami wupadała. Při tym póńdźe wo wurywanske dźěła runje tak kaž wo wědomostne wobdźěłanje namakankow. Zarjadowanje wotměje so wot 14 do 15.30 hodź. Wobdźělenje płaći tři eura na wosobu. Zajimcy njech přizjewja so pod telefonowym čisłom 0 35 78 / 78 83 10.
W młynje pokazaja filmy
Čorny Chołmc. Po wjacorych lětach přestawki zwaža so w Čornochołmčanskim Krabatowym młynje lětsa prěni raz na filmowe nocy. Te wuhotuja zhromadnje z organizatorami Drježdźanskich filmowych nocow při Łobju. W Čornym Chołmcu pokazaja wot zajutřišeho hač do 1. septembra dohromady 17 filmow. Prěni budźe štwórtk wot 21 hodź. film „Gundermann“ wo znatym spěwytwórcu Gerhardźe Gundermannje. Nazajtra w samsnym času předstaja pask „Aladdin“.
Zanjesu twórby Bacha
