Hnydom na spočatku aprylskeho Rozhlada praša so Měrćin Wjenk za planom B za pad, njeměło-li wšo prócowanje wo wučerski dorost trěbne wuspěchi žnjeć.
Za spěchowanje dorosta na kulturnym polu w Delnjej Łužicy zasadźa so Frank Kosyk. Hudźbnje jara aktiwneho přełožowarja zeznajeće w interviewje. Zhoniće wo nowym towarstwje, kotrež je sej předewzało kulturne skupiny podpěrać a je hižo nowy młodźinski chór załožiło.
Pojednani stej w aprylu stawizniskeho razu. Holcy w Slepjanskim regionje podachu so w jutrownej nocy k statokam, zo bychu ludźom pod woknom jutrowne poselstwo zanjesli. Rano zakónčichu jutrowne spěwanje při spěwarskich ławkach, kotrež běchu za žiwjenje we wsach Slepjanskeje wosady nimoměry wažne. Ruth Mroskec so wonym spěwarskim ławkam wěnuje.
Struchły podawk wotprawjenja w Njeswačanskim lěsu za čas nacionalsocializma před 75 lětami bě wuchadźišćo za powědančko „Row w serbskej holi“ Marje Kubašec. Trudla Malinkowa je za stawizniskim pozadkom a wosobami slědźiła, kotrež běchu do podawizny zaplećene.
Budyšin (SN/CoR). Štóž je so wčera na premjerje knihi „Pjeć lětstotkow – Serbja a reformacija“ w farskim domje wosady swjateho Michała Budyšin wobdźělił, měješe zbožo. 500 lět ewangelskeho serbskeho žiwjenja w běhu połdra hodźiny na tajke přijomne a wotměnjawe wašnje rozkładowane dóstać, to bě dožiwjenje. Wužadanje za wudawaćela, serbskeho superintendenta Jana Malinka, a za přitomnych awtorow Trudlu a dr. Lubinu Malinkowu, dr. Jensa Buliša, dr. Edmunda Pjecha a Měrćina Wirtha njebě cyle jednore. Wšako mějachu dohromady 19, na wšelakore aspekty wusměrjacych so wědomostnych přinoškow na dypk přinjesć. A to so jim z podpěru zajimawych ilustracijow, fotow a wobrazow, jara derje zešlachći. Zo je sej wčera po předstajenju nowostki kóždy pjaty z dohromady 50 hosći knihu kupił, měješe skerje mało ze žortnej namołwu Malinka činić, zo „wobdźělenje njewuwjazuje z čitanja“, ale z přeswědčiwej kwalitu publikacije.
Budyšin (CS/SN). Za swoju wulkosć ma Budyšin njewšědnje bohate hudźbne žiwjenje, a to hižo přez lětstotki. Z tejle wosebitosću móže sprjewine město wuběrnje za sebje wabić. Tak chcedźa tu wotnětka tež turistam a dalšim zajimcam, kotřiž stolicu Serbow wopytaja, spřistupnić. Po pjećlětnej přihotowanskej fazy su wčera w Budyšinje zjawnosći hudźbnu šćežku přepodali.
Sobu jedne z najwjetšich jutrownych wikow Hornjeje Łužicy wotměwaja so kóžde lěto we Wojerowskej Łužiskej hali. Tam bě sobotu a wčera widźeć, zo zajim za serbske jutrowne jejka po wšěm zdaću přiběra.
Wojerecy (JoS/SN). Štóž je so kónc tydźenja na 23. jutrownych wikach we Wojerecach rozhladował, móžeše zwěsćić, zo so młodźi ludźo přiběrajcy za debjenje jutrownych jejkow zajimuja. „Wjele motiwow swójby přez generacije dale dawaja“, rjekny kulturny měšćanosta Thomas Delling w swojej zahajenskej narěči.
Po štyrjoch dnjach wčera zakónčene Lipšćanske knižne wiki su z 285 000 znowa wjace wopytowarjow přiwabili. Loni bě jich 260 000. Na terenje wikow zličichu lětsa 208 000 hosći, zbytk je literarny swjedźeń „Lipsk čita“ přinošował.
Lipsk (SN/CoR). Tež bilanca Ludoweho nakładnistwa Domowina je pozitiwna. „Ludźo su so zajimowali, a smy tež knihi předawali. Wosebje požadane běchu nowostka wo reformaciji a zwjazkaj z historiskimi fotografijemi kaž tež znowa wuhotowany 5. nakład knihi ‚Kurze Geschichte der Sorben‘“, rozprawja wotrjadnica rozšěrjenja LND Manja Bujnowska.
Na předstajenju knihi „Sorben im Blick der Staatssicherheit“ dr. Tima Meškanka pjatk witaše zajimcow Tobias Hollitzer z Lipšćanskeho wobydlerskeho komiteja. W rozmołwje z awtorom je sakski krajny społnomócnjeny za podłožki stasi bywšeje NDR Lutz Rathenow wosebitu situaciju Serbow mjez statnym spěchowanjom na jednej a sylnym wobkedźbowanjom wšitkich kulturnych aktiwitow na tamnej stronje wobswětlić spytał.