Wulki zajim hosći nazhonili
Měr do fokusa stajić
Tež klětu budźe Nowa Hornjołužiska domjaca protyka
Budyšin (CS/SN). Po wuspěšnej premjerje Noweje Hornjołužiskeje domjaceje protyki za 2018 tež klětu tajka budźe. To staj wudawaćelej na předstajenju knihi minjeny štwórtk w Smolerjec kniharni připowědźiłoj. Tajki wuspěch njebyštaj wonaj wočakowałoj, rjeknyštaj dr. Lars-Arne Dannenberg a Jan Bergmann. Hižo dwě njedźeli po wuchadźenju bě prěni nakład wupředaty.
Wudać Hornjołužisku domjacu protyku po smjerći šefa nakładnistwa Lusatia dr. Franka Stübnera bě za wudawaćelow z nakładnistwa Via Regia dospołna nowosć. „Njejsmoj wědźałoj, što na naju čaka, štó su kupcy a štó dalepředawarjo“, wuzběhny Dannenberg. Wobaj staj nowinam wuchodneje Sakskeje jara dźakownaj, kotrež su pilnje za projekt wabili. Runje tak su awtorojo, kotřiž běchu za nakładnistwo Lusatia na domjacej protyce sobu dźěłali, sobu ćahnyli. To wobkrući tež wjelelětna awtorka Annelies Schulz z Hołbina, kotraž bě na zarjadowanju přitomna. Serbska awtorka Trudla Malinkowa bě tohorunja mjez wobdźělnikami derje wopytaneho wječorka.
Wylem Wěrik
Před tysac lětami Budyski měr podpisany
Dźensa před tysac lětami podpisaštaj němski kejžor Heinrich II. a pólski wulkowójwoda Bolesław Chrobry (zmužity) na Budyskim hrodźe měrowe zrěčenje, kotrež kóždy pólski šuler jako „Pokój Budiszyński“ ze stawiznow znaje. W Němskej je historiski podawk z 30. januara 1018 lědma znaty a njeje tež na sławnym stukowym wjerchu w awdiencnej žurli Budyskeho hrodu zwobraznjeny.
Budyski měr postaješe, zo měještej Łužica a Milčanski kraj dale pólske wićestwo wostać a zo běše Łobjo – z wuwzaćom Mišna – zapadna hranica pólskeho stata. Zo by so poměr mjez Němskej a pólskim knježićelom dale skrućił, dósta Bolesław I. dźowku Olgu němskeho monarcha za mandźelsku.
Jónkrótne kulturne kubło
Wojerowske wuměłstwowe towarstwo wuznawa so dale k serbskim korjenjam regiona a budźe tež přichodnje ze Serbami hromadźe dźěłać.
Wojerecy (AK/SN). Wuměłstwowe towarstwo we Wojerecach budźe dale dobre styki k serbskim wuměłcam wudźeržować a z nimi wusko hromadźe dźěłać. „Wot lěta 1970 wobstajnje kooperujemy. Serbska kultura steji za wobstajnosć, a žórło w regionje. Wona je jónkrótne kulturne kubło Łužicy“, podšmórny předsyda Martin Schmidt po sobotnej hłownej zhromadźiznje wuměłstwoweho towarstwa we Wojerecach.
Babyloniski šmjat na wuspěšnej premjerje młodźinskeho dźiwadła
„Kupa fantazije“, nowa inscenacija Młodźinskeho dźiwadła NSLDź, rozjimuje na třoch runinach rozdźěle a zhromadnosće wšelakich kulturow. Wčera dožiwi hra w Budyšinje swoju premjeru.
Budyšin (SN/bn). Młodźinske dźiwadło Němsko-Serbskeho ludoweho dźiwadła je wčera swoju nowu inscenaciju „Kupa fantazije“ prěni raz wuspěšnje předstajiło. Z dołho trajacym přikleskom mytowaše publikum na wupředatej wulkej žurli Budyskeho Dźiwadła na hrodźe wukon hrajerskeho dorosta Serbskeho gymnazija Budyšin. Młodostni běchu hru na zakładźe koncepta režisera a nawody skupiny Měrka Brankačka wuwili a zwoprawdźichu ju w cyłkownje sydom rěčach. Přidatnje zaplećechu pasaže romana „Kupa zabytych“ Jakuba Lorenca-Zalěskeho.
Bjez nich njeńdźe
Čitajće w nowym rozhledźe (26.01.18)
W februarskim Rozhledźe čaka tójšto zajimawych přinoškow na was. Zo bych was trochu wćipnych sčiniła, podam wam po zwučenym wašnju mały přehlad wo jeho temach:
Tydźenja su dobyćerjow Literarneho wubědźowanja LND a Załožby za serbski lud mytowali. Jedyn z pjeć jurorow, kotřiž přinoški posudźowachu, bě Pětr Thiemann. Wón pisa w zawodnym přinošku najnowšeho wudaća wo literarnym dorosće. Wjeselić móžeće so na mytowanej twórbje młodeju awtorow.
Literaturje wěnuje so tež naš interview. Diana Hickec je so Benedikta Dyrlicha za pozadkami antologije „Brücken im Zugwind“ prašała, kiž je lěta 2016 jako wudaće časopisa Bawülon wušła a kotraž wobsahuje teksty serbskich spisowaćel(k)ow a z nimi zwjazanych awtor(k)ow.
Z třećim dźělom zakónčimy přinošk Měrka Šołty wo Smolerjowym wudaću „Pěsničkow“. Nadrobnje wobswětla wón zestawu, rěč a žórła publikacije a skedźbnja tež na zasłužbu, kotruž mějachu druzy na jeje nastaću, předewšěm Leopold Haupt jako sekretar Hornjołužiskeje towaršnosće wědomosćow w Zhorjelcu.
Tójšto kedźbnosće sej wužadał
Chětro rozdźělne stejišća tudyšich ludźi Georgej Baselitzej napřećo
Wčera je znaty moler a grafikar Hans-Georg Kern – dźensa mjenuje so Georg Baselitz – 80. narodniny swjećił. Podawk to, na kotryž su na mnohich městnach swěta zhladowali, mjez druhim tež w ródnej wsy Baselitza Němskich Pazlicach. Zhromadnje ze stawizniskim towarstwom zorganizowa bywši decernent a krajny rada starowokrjesa Kamjenc, młódši bratr Georga Baselitza Günter Kern, minjenu njedźelu jónkrótnu wustajeńcu w Němskopazličanskej bywšej šuli, hdźež běchu Kernecy něhdy bydlili. Georg Kern je so tam 1938 narodźił.
