Wučer a hač do lěta 1937 předsyda Domowiny Pawoł Nedo je so kónc meje 1945 do łužiskeje domizny wróćił. Spočatk junija přewza wón w Budyšinje zaso čestnohamtske zastojnstwo předsydy třěšneho zwjazka Serbow. Nacije běchu jeho z Łužicy wuhnali a w nowembru 1939 w Uckermarce zajeli.

Pozdźišo bydleše Nedo w Groß Rietzu w braniborskej Marce, hdźež bě domjacy wučer a dohladowar na knježim dworje braniborskeje zemjanskeje swójby. W Groß Rietzu fararješe tehdy tež Jurij Malink, kotrehož běchu nacije z Łaza wuhnali. W nowembru 1944 jeho fašisća znowa wulkopřerady dla zajachu.

27. apryla 1945 su sowjetscy wojacy 4. gardoweje tankoweje armeje Podstupim a tam zajatych, mjez nimi Pawoła Neda, wuswobodźili. „27. apryl su wot toho časa moje druhe narodniny“, Pawoł Nedo pozdźišo praji. Wón poda so najprjedy domoj k žonje Marce a synej w Groß Rietzu a wottam kónc meje 1945 z kolesom do Łužicy.

Kompjuterowu hru „Krabat a potajnstwo serbskeho krala“, kotraž je wot lě­ta­ 2018 online přistupna, su sej zajimcy po wšěm swěće wjace hač 10 000 króć přez portale Apple, Google a Micro­soft składowali.

Budyšin (SN). Dyrdomdejska serbska hra, kotraž ma tež němsku a jendźelsku wersiju, ma kupcow samo w USA, Brazilskej, Israelu, Južnej Africe, na Filipinach a we Vietnamje, kaž Załožba za serbski lud zdźěla.

„Smy swój zaměr docpěli a samo mjezynarodny zajim za serbsku rěč, kulturu a za našu Łužicu z jeje wobkuzłacym swětom mytow zbudźili. To widźimy na down­loadach a wužiwarjach kom­pjuteroweje hry po wšěm swěće kaž tež na kopicy pozitiwnych wothłosow“, podšmórnje Jörg Hübner, nawoda skupiny RAPAKI, kotraž je hru wuwiła.