Narodna zhromadźizna Delnjeje Łužicy so schadźowała
2. februara 1990 je so Serbska narodna zhromadźizna Delnjeje Łužicy w Choćebuskej Serbskej rozšěrjenej wyšej šuli „Marjana Domaškojc“ (SRWŠ) prěni raz schadźowała, a to ze zastupnikami narodneje zhromadźizny z Budyšina. Nimale 50 Serbow bě so zhromadźiło, zo bychu wo kročelach za zaručenje přichoda serbstwa po politiskim přewróće a wo zhromadnych zaměrach narodneju zhromadźiznow wobeju Łužicow wuradźowali. We wjace hač třihodźinskej diskusiji běchu sej wšitcy přezjedni, zo maja so Serbja – wšojedne, hdźe bydla, kotry swětonahlad a kotru politisku poziciju maja – zhromadnje za swój lud, za zachowanje a dalše wuwiće serbskeje rěče a kultury zasadźić.
Wo Łužicy
Do delnjoserbšćiny so zalubowała
Jako bě dwaceći lět stara, wobdźěli so Jill-Francis Ketlicojc prěni raz na literarnym wubědźowanju LND a Załožby za serbski lud, tehdy bjez wuznamjenjenja. Lětsa je sej z basnjomaj a krótkopowědančkomaj dwójce třeće myto zawěsćiła. Wosom lět je mjeztym zašło, a w nich njeje absolwentka Delnjoserbskeho gymnazija w Choćebuzu jenož tójšto wuknyła, ale je tež swój puć do swěta serbskich pisacych namakała. W Serbskej pratyji, w Rozhledźe, Płomjenju a w Stogu je wozjewjała, a wot decembra je rodźena Žylowčanka redaktorka Noweho Casnika. W Lipsku je wona sorabistiku studowała, je pólšćinu wuknyła a dwaj semestraj na Poznańskej uniwersiće była, rěčne kursy walizišćiny a iršćiny pola prof. Edwarda Wornarja wopytała. „Mjeńšinowe rěče mje fascinuja, a w keltiskich rěčach wosebje gramatika.“ Masterski studij komparatistiki a pólskich studijow je na Halleskej uniwersiće zakónčiła.
3. filmowa zyma
Berlin (SN/CoR). Do mjezynarodneho filmoweho festiwala Berlinale wotměje so 15. februara wječor 3. serbska filmowa zyma w Berlinje. Zarjadowar je znowa tamniše kino Krokodil z podpěru Domowinskeje župy Delnja Łužica.
W Bukecach tež cyle młodźi byli
Dwójce maksimum dypkow na hudźbnym wurisanju
Wojerecy (SiR/SN). Regionalne wubědźowanje „Młodźina hudźi“ je zakónčene. Z dohromady 123 wobdźělnikow w cyłkownje sydom kategorijach je 67 prěnje městno wobsadźiło, kwalifikowacych so za sakske krajne wurisanje kónc měrca w Zwickauwje. Maksimalnje móžnych 25 dypkow zdobyštaj sej smyčkowe duwo Annika Jannasch a Nicole Schwaar z Wopakeje resp. Noweho Jiwowa (Neueibau) kaž tež spěwar Fabian Schulze z Wojerec. Bratromaj Valentinej a Adrianej Simon z Pančic-Kukowa přizna jury 24 dypkow za klawěrnej soli.
Wubědźowanje organizowace towarstwo Młodźina hudźi je minjenu sobotu tradicionalny mytowanski koncert w awli Wojerowskeho Lessingoweho gymnazija wuhotowało. „Lěpšeho městna za to njebychmy nańć móhli“, wuzběhny předsyda towarstwa Dietmar Wolf. Wšako „ambicioněrowany, talentowany hudźbny dorost kubłanišćo z jeho specielnym muziskim profilowym poskitkom jara lubuje. Talent samy přiwšěm njedosaha – trěbne su předewšěm pilnosć, disciplina a wutrajnosć.“
Pytaja spěwarki a spěwarjow za hudźbne lěćo
Budyšin (CS/SN). „Krajiny“ rěka hesło lětušeho Łužiskeho hudźbneho lěća. Kulturny běrow města Budyšina wuhotuje 1994 załoženy bienalny koncertny rjad mjeztym 14. raz, a to wot 14. do 30. awgusta. Wot lěta 2016 je kruty wobstatk zarjadowanja chórowa akademija, a jeje zaměr je wutworić projektny cyłk, kotryž w lěću naročny koncert na měnjacych so jewišćach prezentuje. Lětsa bu za to Hrodźišćanska cyrkej wuzwolena, mjez druhim, dokelž bě tam serbski farar Jan Kilian skutkował. Nimo toho je Hrodźišćo wuznamne stare słowjanske sydlišćo a cyrkej markantny dypk.
Porjedźenka
Wuspěšna prapremjera wurjadneho přećela Serbow
Budyšin (SN/bn). Wupředata žurla Němsko-Serbskeho ludoweho dźiwadła bě idealna kulisa lětušeho sinfoniskeho koncerta Serbskeho ludoweho ansambla wčera w Budyšinje. Ramik programa tworještej twórbje komponista Ludwiga van Beethovena składnostnje jeho 250. narodnin. Z uwertiru jewišćoweje hudźby „Egmont op. 84“ kaž tež z dospołnje zahratej 2. sinfoniju D-dur op. 36 so z hóstnymi instrumentalistami ze Zieloneje Góry zesylnjenemu orchestrej pod nawodom intendantki SLA Judith Kubicec poradźi, publikum zahorić a wichorojty aplaws žnjeć.
