Podstupim (dpa/SN). Braniborski krajny sejm je politikarja SPD Dietmara Woidkeho znowa za ministersko prezidenta kraja wuzwolił. 63lětny, kiž steji na čole po wšej Němskej prěnjeje koalicije SPD a BSW, dósta w druhim wólbnym přeběhu absolutnu wjetšinu hłosow.

Krajny přesyda SPD Woidke trjebaše druhe wólbne koło, štož w braniborskim krajnym sejmje dotal hišće njemějachu. W prěnim kole njeje Woidke trěbnu wjetšinu 45 hłosow dóstał. Za njeho hłosowaše jenož 43 zapósłancow. W druhim přeběhu měješe wón 50 hłosow.

Woidke je wot lěta 2013 ministerski prezident Braniborskeje. Jeho SPD chce přichodnych pjeć lět zhromadnje ze Zwjazkom Sahry Wagenknecht knježić. Nowa koalicija ma w krajnym sejmje 46 hłosow, štož njeje runjewon komfortabelne. Woidke bě kóždežkuli zhromadne dźěło z druhej najsylnišej politiskej mocu AfD wuzamknył.

Koaliciske jednanja wjerćachu so stajnje zaso wo prašenje skónčenja wójny w Ukrainje a wo nastajenje nowych raketow USA w Němskej. BSW žadaše sej w tym prašenju jasne stejišćo.

Serbski sejm je dalšu etapu po puću do druhich wólbow zdokonjał: Je wjele wjac kandidatow hač mandatow – runja wólbam serbskeje rady w Braniborskej, kotrež su sejmarjam metodisce z přikładom. ­Derje tež je, zo běchu jenož cyłki za nastajenje kandidatow legitimowane, kotrež maja serbskosć w swojich wustawkach. Wjac hač třećinu wšěch kandidatow pak je jedne towarstwo nominowało: Łužiska Alianca. Bjez nich bychu w Delnjej Łužicy jenož 9 wot 12 mandatow wobsadźić móhli. W Hornjej Łužicy by bjez Łužiskeje Aliancy 16 kandidatow za 12 mandatow k dispoziciji stało. A to je tež derje tak, wšako njeje na přikład reichsbürger a kandidat „Swobodnych Saksow“ personal, kotryž sej za demokratiske serbske zastupnistwo přeješ. Kak ze Serbskim sejmom dale dźe, wotwisuje tež wot toho, kelko Serbow so tón raz na wólbach wobdźěli. To pak maja ći w horšći, kotřiž dotal praja: „Poprawom dobra ideja, ale ...“ Rosće abo woteběra tute „ale“? Marcel Brauman

Mjeztym hižo 30. Drježdźanski wosuškowy swjedźeń je minjeny kónc tydźenja zaso syły wopytowarjow do sakskeje krajneje stolicy wabił. Wosebity wjeršk bě přećah ­po centrumje města z hoberskim wosuškom w srjedźišću. Tón bě lětsa 1 929 k­ilo­gramow ćežki, 280 centimetrow dołhi, 140 centimetrow šěroki a 89 centimetrow ­wysoki. Pjekarjo wjacorych zawodow běchu jón zhromadnje napjekli. Přećah ze 400 aktiwnymi a 20 wobrazami dožiwi něhdźe 60 000 přihladowarjow. Tež 30 wosuškowych holcow jako symbol Drježdźanskeho wosuška so wobdźěli. Po přećahu su před Kulturnym palastom 3 300 kuskow wosuška předali. Foto: Jürgen Männel

Lipsk (dpa/SN). Hodowny čas je mnohim ludźom čas wjesołeje zhromadnosće – někotrym pak tež wosebje struchłeje samotnosće. Štóž je hody w tutej nuzy, móže so w Drježdźanach a Lipsku na wjacore kontaktne adresy wobroćić. Tež internetnje poskićuja móžnosće zetkawanja mjez ludźimi. Tak je Lipšćanska dwórnišćowa misija za čas hodownych swjatych dnjow wšědnje wot 9 hač do 13 hodź. přistupna. Tak přeprošuja tam k přebywanju z čajom a poprjancami. Poskitk měri so wosebje na bjezdomnych sobuwobydlerjow.

W Drježdźanach zarjaduje Johannstadtski kwartěr jutře, 12. decembra, ­zetkanje potrjechenych, zo bychu styki nawjazali. Tute nahromadźene kontakty móhli hody za zetkawanja wužić. Dale budu wjacore cyrkwje patoržicu swoje durje za potrěbnych wotewrěć.