Elektriski płót w Čěskej hotowy
Zlín (dpa/SN). Čěska je kilometry dołhi elektriski płót natwariła, zo by dalšemu rozpřestrěću afriskeje swinjaceje mrětwy mjez dźiwimi swinjemi zadźěwała. Płót je wot wčerawšeho w słužbje, rozprawja powěsćowy portal Novinky.cz. powołujo so na informacije za natwar zamołwiteje firmy. Za natwar płotu trjebachu runje dwaj dnjej. Po prěnich wuspěšnych pospytach su milinu doskónčnje zapinyli a płót formelnje regionalnemu zarjadnistwu w Zlínje přepodali.
Na němskej stronje su wuwiće jara dokładnje wobkedźbowali. Zwjazkowy minister za ratarstwo Christian Schmidt (CSU) bě wospjet před rozšěrjenjom mrětwy do Němskeje warnował. Z teje přičiny mějachu zamołwići w Němskej a Čěskej wuski kontakt, zo móhli w nuzowym padźe sčasom kmane naprawy zwoprawdźić. Přiwšěm nima Zlínski region zhromadnu mjezu z Němskej, ale leži na wuchodźe Čěskeje njedaloko słowakskeje mjezy.
Wodu hromadźa
Biskop: Operacija ze sekeru
Pólska steji dale pod wliwom masowych protestow přećiwo reformam
Waršawa. Njedawne masowe protesty wobydlerjow přećiwo planowanej sudniskej reformje narodnokonserwatiwneho knježerstwa Pólskeje su přeco hišće horca tema w medijach. Z wulkimi fotami dźesaćitysacow demonstrantow nowiny nazornje reflektuja, kajki hoberski zaćišć su ludźo ze swojimi protestami zawostajili. Demonstracije wotměchu so w 130 wulkich a mjeńšich městach.
Z kolesom do Fatimy
PUTNIKOWAĆ na kolesu – tutu tradiciju haji hižo lěta Uherskobrodske sportowe towarstwo Orel (Worjoł). Wot zańdźeneje póndźele je 120 kolesowarjow po puću z Uherskeho Broda do dalokeje Fatimy w Portugalskej. Tam swjeći znate hnadowne město jubilej 100. róčnicy zjewjenja Knjenje Marije. Wjetšina wobdźělnikow kolesowarskeje wuprawy pochadźa ze Zlínskeho wobwoda, rjad z nich pak tež z druhich dźělow Čěskeje a někotři samo ze słowakskeho Prešova. Najstaršemu putnikej-kolesowarjej je 78 lět, najmłódšemu hakle dwanaće.
Prěni wotrězk putnikowanja absolwowachu w busach hač do španiskeje wsy Vega de Valcarce, kotraž leži při Jakubowym puću. Wottam wjedźe poprawny procesion nětkole woprawdźe na kolesu we wosom etapach do přibližnje 700 kilometrow zdaleneje Fatimy. Wšědnje zmištruja putnicy něhdźe 70 do 100 kilometrow. „Jědźemy po kolesowarskich šćežkach, asfaltowanych dróhach a šotrowych pućach“, zdźěla hłowny organi- zator tohole wosebiteho putnikowanja Petr Gabriel. Ducy załoža tež do hnadowneho města Santiago de Compostela. Přenocuja w ćěłozwučowarnjach šulow a dalšich halach.
Wjace pasažěrow
Praha (ČŽ/K/SN). Při njepřestajnym rósće hospodarstwa w Čěskej republice nječini Praske lětanišćo „Václav Havel“ žane wuwzaće. W prěnim połlěće 2017 je wone nic mjenje hač 5,76 milionow pućowacych registrowało a tak 23 procentow wjace hač loni w samsnym času. Tole wozjewja nowina Mladá fronta dnes.
Na cyłe lěto wočakuje Praske lětanišćo 15 milionow pasažěrow. Za čas lětnich a nazymskich prózdnin w druhim połlěće prawidłownje hišće wjace ludźi zapućuje, tež do wukraja. Kapacita mašinow je přerěznje z 80 procentami wućežena, štož je wulka ličba, praji přisłušny zastupnik lětanišća Václav Řehor. 90 procentow wšěch pasažěrow je na europskich čarach po puću było. Mjez Prahu a Afriku pućowaše 81 procentow wjac hač před lětom, mjez Prahu a Dalokim wuchodom 21 procentow wjac.
Najčasćišo wopytowany stat po ličbje pasažěrow bě Wulka Britaniska, z najwoblubowanišim zapućowanišćom pak sta so Moskwa, kotraž je w tym nastupanju Paris přesćahnyła. Ličba pasažěrow mjez Prahu a Ruskej je jenož w lětušim prěnim połlěće wo 39 procentow přibyła.
Ryzy bratrowstwo
Tusk jako swědk skazany
Wołtar w nowym błyšću
Peter Čačko rozprawja z Bratislavy za Serbske Nowiny
Prawidłowna połlětna rozprawa Organizacije za wěstotu a zhromadne dźěło w Europje (OECD) wobsahuje wězo tež wotrězk wo tuchwilnym hospodarskim połoženju Słowakskeje, a tón je móhłrjec słódko-kisała lektura. Na jednej stronje so w njej swěru wobkruća, z čimž naši knježacy politikarjo njepřestajnje wikuja, mjenujcy zo naš kraj na zakładźe wote- wrjeneho hospodarstwa we wobłuku wotewrjenych wikow Europskeje unije spěšnje rosće, njemějo k tomu rěčehódneje zadołženosće.
Zdobom pak OECD kritisce hódnoći, zo so spomóžne wuwiće ekonomije přemało za to wužiwa, kraj přisłušnje přihotować na móžne ćeše časy. Při tym so přiznawa, zo ma Słowakska brěmjo dźědźinstwa ze štyrjoch lětdźesatkow planoweho hospodarstwa w socializmje přewinyć. Na někotrych wažnych polach wšak so to ani z najwjetšimi napinanjemi za štwórć lětstotka njedocpěje. Naš kraj njemóže dźě so na žane wašnje z Němskej přirunować, někotre druhe postkomunistiske staty, kaž na přikład Słowjenska abo Estiska, su přiwšěm hladajcy dale přišli.
Medije: Pólska policija čušli
Politikarjow opozicije a wobydlerskich aktiwistow wobkedźbowała
Waršawa (dpa/SN). Pólska policija je po informacijach medijow za čas protestow přećiwo dwělomnej justicnej reformje narodnokonserwatiwneho knježerstwa politikarjow opozicije a aktiwistow wobkedźbowała. Nowina Gazeta Wyborcza wozjewi wčera protokol policajskeho škričkoweho kanala, kotryž bě wot anonymneho informanta dóstała. „Knjez Petru je runje z hosćenca na hasy Wiejska 13 přišoł. Nětko so prašam, hač mamy jeho dale wobkedźować“, tam mjez druhim rěka. Zapósłanc pólskeho sejma Ryszard Petru je jedyn z nawodow opozicije přećiwo knježerstwu strony Prawo a sprawnosć (PiS). Nahrawanje pochadźa z 21. julija, jako debatowaše senat wo zakonju, z kotrymž měješe so najwyše sudnistwo kraja znowa rjadować.
Wobkedźbowała je policija po tutej rozprawje tež Wojciecha Kinasiewicza a Tadeusza Jakrzewskeho wot wobydlerskeho hibanja Obywatele RP. Čušlenje traje hižo wjacore měsacy, wonaj nowinarjam rjeknyštaj.
Wěstotne mocy wulce nahladne
POLICIJA w Čěskej smě so zawěrno wjeselić – dobreho mjena mjez ludźimi dla. Wuchadźa dźě z wotpowědneho woprašowanja zwěsćowarnje měnjenjow STEM, zo 65 procentow wobydlerjow policiji dowěrja. Tak wulki njebě podźěl w minjenych 25 lětach hišće nihdy. Lěta 2002, jako je so STEM w tejle naležnosći prěni raz wobhonjała, wučinješe kwota 46 procentow. Najniša bě wona 1997 z jeničce 27 procentami „Daty ze zažnych 90tych lět přeradźeja, zo njeje za policiju po změnje režima 1989 lochko było ludźi wo swojej dowěryhódnosći přeswědčić“, prawiznicy agentury hódnoća. Po jich analyzy je minjeny čas dowěra do policije wosebje mjez ludźimi, staršimi hač 60 lět, a wobydlerjemi z nišim kubłanjom chětro přibyła. Wot poslednjeho zwěsćowanja je nahladnosć policije cyłkownje wo štyri procenty zrostła. „Smě so za to měć, zo tuchwilny staw policije zjawnosć tež tohodla pozitiwnje hódnoći, dokelž njeje mjez njej wuraznych aferow. A najskerje wotbłyšćuje so w tym žedźba za zwyšenej prezencu wěstotnych słužbow dźiwajo na migracisku krizu“ prawiznicy STEM komentuja. Na justicu so porno tomu křiwje hlada.
