Praha (ČŽ/K). Hač do 3 000 dźěławych ze Serbiskeje chce Čěska přichodnje wob lěto přiwzać. Na wuchodojužny balkanski kraj je knježerstwo rozšěriło wosebity program, z kotrymž ma so čujomnemu njedostatkej kwalifikowanych mocow wotpomhać, štož róst ho­spodarstwa tuchwilu najbóle haći. Po­dobne rjadowanje za wudźělenje dźěłoweje dowolnosće wukrajnikam ma Čěska dotal hižo z Ukrainu­, Filipinami a Mongolskej.

Čěske wonkowne ministerstwo k tomu zdźěla, zo zarjaduja w serbiskej stolicy Běłohrodźe wosebity běrow, kotryž změje wobdźěłać próstwy Južnych Serbow wo dźěłowe městno. Na čěskim wulkopósłanstwje předleži dotal něhdźe 700 tajkich požadanjow. Politikarjo maja za to, zo je to skutkowna naprawa nastupajo zaměrnu migraciju, kotruž Čěska wot lěta 2013 praktikuje. W februaru 2018 je knježerstwo kwotu dowolnosćow zwy­šiło. Z Ukrainy akceptuja nětko lětnje 20 000 požadanjow, z Filipinow a Mongolskeje 1 000. Ministerka za dźěło Jaroslava Němcová wudawa, zo w Čěskej 374 000 wukrajnikow dźěła. 94 000 z nich njejsu staćenjo krajow Europskeje unije.

Kijew (ČŽ/K). Ukrainska opozicionelna politikarka a něhdyša ministerska pre­zidentka Julija Timošenko je tele dny wozjewiła, zo wotmysli klětu w měrcu k prezidentskim wólbam za zastojnstwo hłowy stata kandidować. To zdźěleja čěske nowiny z ukrainskeje stolicy Kijewa. Znatej weterance ukrainskeje politiki ­wadźi předewšěm korupcija, kotraž wšudźežkuli a skoro w kóždym nastupanju w kraju šuska. Z njedawnych woprašowanjow ludnosće wuchadźa, zo ma Julija ­Timošenko bjeze wšeho dobre wuhlady, při wólbach prezidenta wuspěšnje wobstać. Tuchwilu by wona 13,3 procenty hłosow wolerjow nažnjała. Za nětčišeho prezidenta Petra Porošenka by so jeničce hišće 7,6 procentow wuprajiło. Z 8,4 procentami ma to proruski politikar Jurij Bojko wjace přiwiska.

Polacy po poražce koparskeje narodneje wubranki w Ruskej šokowani

Waršawa. Poražka pólskeje narodneje wubranki přećiwo Senegalej na koparskich swětowych mišterstwach w Ruskej je Polakow dospołnje šokowała. Hač do dźensnišeho medije susodneho kraja „katastrofu“, „blamažu“ a „kompromitaciju“ analyzuja a přepytuja.

Něhdźe 18 milionow ludźi dyrbješe plajtu mustwa před telewizorami sobu dožiwić. Dźesaćitysacy běchu so nimo toho na fanowych milach a w stadionach kraja zhromadźili, chcyjo hru a dobyće Pólskeje live dožiwić. Dźeń po tym wuńdźe Gazeta Wyborcza z titulowym fotom, kotrež pokazowaše poraženych a bjezradnych přiwisnikow kopańcy na fanowej mili we Waršawje.

Praha (ČŽ/K). Čěske piwo je na swěće tak požadane, zo z jeho produkciju lědma dočinja. Zo by potrjebu lěpje kryć móhła, zwyši znata Plzeňska piwarnja Prazdroj kapacitu wo cyłu třećinu. Do noweje technologije, hłownje kotołow a tankow, inwestuje předewzaće něhdźe 280 milionow krónow (ca. 11 mio. eurow). Prazdrojej budźe tak móžno wob lěto nawarić 3,5 milionow hektolitrow předewšěm ležaka Pilsner Urquell. „Tale marka je naša chorhoj, a naprašowanje za njej spochi přiběra“ rjekny generalny direktor Prazdroja Grant Liversage. Wón dodawa, zo Pilsner Urquell do cyłeho swěta dźe, zo pak wotbytk na aziskich wikach najbóle rosće. Z Pilsner Urquell je předewzaće w Južnej Koreji jara wuspěšne, a wot najnowšeho tež w Japanskej. Najwjetši potencial wšak je po słowach Liversageho w Chinje.

Česko-Budějovicska piwarnja Budvar je loni nastupajo wuwoz nowy rekord docpěła – do 76 krajow swěta eksportowaše wona 900 000 hektolitrow piwa. Dohromady nawarjenych 1,517 milionow hektolitrow su přiwšěm štyri procenty mjenje hač lěta 2016. W hosćencach a korčmach su loni mjenje piwa točili.