Waršawa (dpa/SN). Pólska, Čěska, Madźarska a Słowakska so dale spjećuja, so na rozdźělowanju ćěkancow we wobłuku planowanja Europskeje unije wobdźělić. Tole su knježerstwowi šefojo statow tak mjenowaneje Visegrádskeje štyrki na wčerawšim zetkanju ze swojimi kolegami z Benelux-krajow hišće raz potwjerdźili. Při tym dóńdźe k „wichorojtym diskusijam“, kaž słowakski ministerski prezident Robert Fico powěsćerni kraja TASR zdźěli. Hosćićelka zetkanja, pólska premierka Beata Szydło, mjenowaše zeńdźenje „historiski dialog“. Wobdźělnicy běchu sej po jeje słowach w tójšto prašenjach dospołnje přezjedni, z wuwzaćom kwotow ćěkancow. Jako přikład mjenowaše narodnokonserwatiwna premierka zhromadny škit wonkownych mjezow EU.
Komisija EU bě njedawno přećiwo Pólskej, Madźarskej a Čěskej jednanje ranjenja zrěčenjow dla zahajiła, dokelž so zhromadnemu dźěłu při rozdźělenju ćěkancow wobaraja. Na tamnym boku Słowakska zhromadnje z Madźarskej přećiwo EU skorži, dokelž bě Brüssel rozdźělowanje ćěkancow přećiwo woli mjeńšich krajow wobzamknył.
Běłohród (dpa/SN). Dotalna ministerka za zjawne zarjadnistwo, Ana Brnabić, budźe nowa ministerska prezidentka Serbiskeje. Statny prezident Aleksandar Vučić, dominantna wosobina balkanskeho stata, je 41lětnu wčera w Běłohrodźe do tutoho zastojnstwa powołał. Wona je z tym prěnja ministerska prezidentka Serbiskeje.
Po wustawje trěbne přihłosowanje parlamenta je ryzy formalna naležnosć, dokelž maja přiwisnicy Vučića wšo přesahowacu wjetšinu w ludowym zastupnistwje. Zastojnstwo bě wakantne, po tym zo bě so Vučić w aprylu ze statnym prezidentom stał. Medije w kraju wočakuja, zo wšitko postajowacy Vučić tež přichodnje dźěło knježerstwa sylnje wobwliwuje, byrnjež prezident w Serbiskej jenož reprezentatiwne nadawki měł. Dotal njeje jasne, hač Vučić jako statny prezident zastojnstwo předsydy z wotstawkom najwjetšeje knježerstwoweje strony SNS złoži, kaž sej to wustawa kraja žada.
Waršawa. Pólska wočakuje spočatk julija wysoki wopyt: prezidenta USA Donalda Trumpa. Běły dom we Washingtonje je spočatk tydźenja oficialnje wobkrućił, zo ma Trump wopyt Waršawy w swojim terminowym kalendrje zapisany. Ameriski prezident wobdźěli so 7. a 8. julija na zetkanju G20 w Hamburgu. Dźeń do toho witaja jeho we Waršawje.
Pólska je hladajo na wopyt najwyšeho reprezentanta USA přewšo horda, wšako je kraj prěni we wuchodnej Europje, do kotrehož nowy prezident přijědźe. W stolicy chce so Trump tež na konferency wobdźělić, kotruž bě Pólska organizowała: zetkanje nawodow dwanaće srjedźo- a wuchodoeuropskich krajow, tak mjenowany „wjeršk třoch morjow“. Zastupjene budu mjez druhim Letiska, Litawska a Estiska při Baltiskim runje tak kaž Bołharska a Rumunska při Čornym morju a Chorwatska při Adriji. Pólska widźi so při tym sama we wodźacej róli a wězo z tym liči, zo prezident Trump tole připóznaje a krajej jako swěrnemu zwjazkarjej USA rjap skrući a jón dale podpěra.
Waršawa. Najnowši teroristiski nadpad w Londonje je w Pólskej wobšěrnu debatu zbudźił. Při tym dźe wo prašenje, hač je tež Pólska wot tajkich atentatow wohrožena a kak měła so jim wobarać. Atmosfera w tymle prašenju je přiběrajcy hysteriska a agresiwna.
Tak bě pólska telewizija spočatk tydźenja wjacorych fachowcow na telewizijnu debatu přeprosyła. W srjedźišću steješe hesło, kotrež bě šef knježaceje narodnokonserwatiwneje strony Prawo a sprawnosć Jarosław Kaczyński nastajił, po kotrymž je „wójna z islamom“ dawno wudyriła. Fachowcy woneje debaty běchu sej přezjedni, zo měło so přewšo raznje přećiwo terorizma podhladnym postupować. Bjez wahanja měli jich zajeć a hnydom z kraja wupokazać.
Ministerska prezidentka Beata Szydło čuje so po Londonskim nadpadźe w swojej politice zesylnjena. „Derje, zo nimamy ćěkancow w kraju, tuž je strach nadpadow snadny“, wona žurnalistam rjekny. Szydło chcyła ze swojej dotalnej politiku pokročować a nochcyła žanych ćěkancow do kraja pušćić, wona připowědźi.
Doba, w kotrejž bu piwko, „knedlovepřo-zelo“, podruž, mzda, dawki a wšo a wšitko druhe z krónu płaćene, dźe hladajcy na kónc. Jutře drje hišće tak daloko njebudźe, ani zajutřišim, zo Čecham woblubowana swójska měna zańdźe, na wobzorje pak euro hižo kiwa.
Njedźiwajcy toho, zo wjetšina Čechow zawjedźenje zhromadneje měny EU (tuchwilu) hišće nochcyła, abo runje tohodla, nastajeja so „zajimowane kruhi“ wočiwidnje na tónle podawk. Jako prěni njeje nichtó druhi hač ministerski prezident Bohuslav Sobotka – do njedawna sam horliwy podpěrar króny – wótře za to wabił, euro přiwzać, a to ručež móžno. Njemało zadźiwanej ludnosći wón trěbnosć teleje naprawy z tym wuswětli, zo nastanjetej dźakowano Němskej a Francoskej w zhromadźenstwje dwě skupinje krajow rozdźělneho tempa, a Čěskej by bjez eura hrozył pad do skupiny „pomałkeje jězby“.
Praha (HJS/SN). Čěski prezident Miloš Zeman najebać poručenje parlamenta dale wotpokazuje, w měrcu zemrěteho kardinala Miloslava Vlka posthumnje wuznamjenić. Tole rozprawja dźenik Pravo w swojim wčerawšim wudaću. Parlament bě zawčerawšim, wutoru, prezidentej rjad wosobow za tradicionalne počesćenje na róčnicy załoženja Čěskosłowakskeje, 28. oktobra, namjetował. Zapósłancy maja po wustawje kraja prawo, tajkich ludźi namjetować. Tole pak njeje za prezidenta zawjazowace.
Zeman bě hižo w měrcu wotpokazał, so na žarowanskej swjatočnosći za zemrěteho kardinala w cyrkwi swj. Vita wobdźělić. K wopodstatnjenju wón rjekny, zo je Vlk jeho wospjet kritizował.