Potorhaja móst
Zły Komorow/Čorny Chołmc (SN). Móst bywšeje wuskokolijoweje wuhloweje želenicy přez železnisku čaru Wojerecy-Łuty pola Čorneho Chołmca přichodnej kóncaj tydźenja po krokach demontuja. Wo tym informuje Łužiska a srjedźnoněmska towaršnosć hórnistwoweho zarjadnistwa (LMBV), kotraž dźěła při tym z Němskej železnicu AG hromadźe.
Wot pjatka, 20. oktobra, wječora hač do póndźele, 23. oktobra, rano w štyrjoch potorhaja južny dźěl mosta z betona a wocla z pomocu 500tonoweho mobilneho krana. Wón dźerži dwanaćemetrowski dźěl, zo móhli jón rozebrać. Sewjerny dźěl mosta tydźeń pozdźišo mjez 27. a 30. oktobrom z hinašej technologiju demontuja. Tu z hydrawliskim hamorom a betonowymi nožicami wuhotowany rjećazowy bager trěbne dźěła wukonja. To wšo přewozmje bagrowy zawod Burkhardt z Thonhausena. Přihot naprawy žadaše sej hižo minjene dny połstronske zawrjenje zwjazkoweje dróhi B 96 z rjadowanjom ample. Za čas dźěłow je železniska čara Wojerecy-Łuty zawrjena.
Z tym zhubi so sobu posledni móst wuskokolijoweje jamoweje železnicy.
Prěnja kołbaska zahrodkarja
10. króć wuhotuja Kulowscy wobchodnicy lětsa nakupowansku nóc w kuzłapołnym swětle a su sej wospjet něšto noweho wumyslili.
Kulow (SN/JaW). Něhdźe 35 stejnišćow změje lětuša 10. nakupowanska nóc w kuzłapołnym swětle pjatk, 20. oktobra, wot 19 hodź. w Kulowje. To připowědźichu čłonojo předsydstwa Kulowskeho zjednoćenstwa wikowarjow Birgit Rost, Phillipp Metzner a Maćij Čórlich minjeny štwórtk w Kulowje.
Wo přechodnym wužiwanju diskutowali
Wojerecy (AK/SN). Hač do kónc lěta ma system za wodźenje po pućach hladajo na motorizowany wobchad we Łužiskej jězorinje hotowy być. „Cyłkownje 34 stejnišćow wuhotujemy z 90 informaciskimi taflemi. Při tym so z Łužiskej a srjedźoněmskej towaršnosću hórnistwoweho zarjadnistwa (LMBV) wotměnjamy“, podšmórny jednaćel zaměroweho zwjazka Łužiska jězorina Daniel Just na njedawnym posedźenju we Wojerecach. Wotewrjene prašenja z wobchadnymi zarjadami su nětko rozrisane.
Njeměli mjezy znać
Drježdźany (SN). Swobodny stat Sakska a wójwodstwo Delnja Šleska chcetej we wobłuku inowatiwnych produkciskich technologijow wušo hromadźe dźěłać. Na XII. pólsko-sakskim hospodarskim forumje wčera a dźensa we Wrócławu je sakski hospodarski minister Martin Dulig (SPD) runje tak přitomny kaž pólska wicemaršalka Iwona Krawczyk. Z něhdźe sto pólskimi a sakskimi předewzaćelemi, wědomostnikarjemi a politikarjemi wuswětla na přikład móžnosće kooperacijow a wobstejace hospodarske zwiski.
„Inowacija je wažny kluč přichodneho hospodarskeho wuwića. Znajmjeńša tak wažne je spěchowanje mjezynarodneho dźěła we wobłukomaj wědomosć a hospodarstwo. Kooperaciska kultura njeměła mjezy znać – runje nic hladajo na susoda“, Dulig na wotewrjenju foruma wuzběhny. Potencial zhromadneho dźěła widźi wón předewšěm za mjeńše a srjedźostawske předewzaća. Na zarjadowanju hodźa so zwiski nawjazać. Dale móža so přitomni wo planowanych projektach informować.
Rjemjeslnistwo wěnuje so dźěćom
Drježdźany (SN). „Małej ručce, wulki přichod“ – pod tymle hesłom zahaji so přichodne tydźenje zwjazkowe wubědźowanje rjemjeslnistwa, kotrež wěnuje so pěstowarskim dźěćom. Skupiny kubłanišćow su přeprošeni, rjemjeslnikam při dźěle přihladować. Tež w Sakskej sej tele mjeztym hižo pjaty raz organizowane zarjadowanje jara waža. „Projekt zmóžnja dźěćom wid na dźěło rjemjeslnikow a tak twori hižo zahe zakład za pozitiwne kajkosće rjemjeslniskeho powołanja, štož je nam wutrobita naležnosć“, rozjasni hłowny jednaćel Drježdźanskeje rjemjeslniskeje komory Andreas Brzezinski. Mjez wobdźělnikami su předewzaća z Drježdźan kaž tež wokrjesow Mišnja, Budyšina, Sakska Šwica – Zapadne Rudne horiny a Zhorjelca.
Dožiwjenja a zaćišće móža dźěći potom na wulkich sćěnowinach zwobraznjeć. Kreatiwne dźěła maja so hač do 31. januara 2018 Drježdźanskej rjemjeslniskej komorje posrědkować. Jury ze zastupjerjemi rjemjeslnikow a pedagogow twórby hódnoći. Dobyćerjej kiwaja 500 eurow, kotrež móža za projekty, snano tež z temu rjemjeslnistwo, zasadźić.
Lěsy ćerpja pod suchotu a skórnikami
Strowota lěsow wažny nadawk za lěsnistwo a wobswětoškit
Kóžde lěto w juliju zahaja statny lěsniski zawod Sachsenforst wosebitu kontrolu lěsow. Tež lětsa přepytowachu fachowcy wot 27. julija hač do srjedź awgusta 6 800 štomow po cyłej Sakskej a posudźowachu jich strowotniski staw. Wažne jim při tym bě, zhonić, kak strowe naše lěsy su.
Podhladne běchu přewažnje rědke wjerški jehlinowcow abo zežołtnjena jehlina a łopjena. Ale tež škody, zawinjene wot wichorow, suchoty abo krupow, su kóždolětnje tema přepytowanja fachowcow. Tež wšelake překasancy a hriby maja móc, štomam w lěsach zeškodźeć. Hromadźe z datami europskeho wobswětoweho lěsniskeho monitoringa a wobstajnje dźěłacymi 18 sakskimi lěsnoklimatiskimi stacijemi hodźa so staw, stres a scyła strowotniski staw lěsow na wěste wašnje posudźować.
Podhladne štomy su móžny wopor dalšich škodowanjow
Kónc septembra/spočatk oktobra w nazymskich prózdninach je ...
Swinjacej mrětwje zadźěwać
W Budyskim wokrjesu dotal žane pady strašneho wirusa znate njejsu
Budyšin (SN/mwe). Němska dotal wot afriskeje swinjaceje mrětwy (ASP) potrjechena njeje. Tuž tež w Budyskim wokrjesu naprawy přećiwo ASP – wulce natykliwej wirusowej chorosći domjacych a dźiwich swini – předwidźane njejsu.
Kak spěšnje pak móže so wirus po zdaću přez pućowanski wobchad wupřestrěwać, izolowanski pad w Čěskej pokazuje. Tam su w Zlínskim kraju – něhdźe 300 kilometrow wot Budyšina zdalenym – afrisku swinjacu mrětwu zwěsćili. We wjace hač 70 padach su mrětwu pola dźiwich swini dopokazali. Domjace swinje dotal potrjechene njejsu. Wšelake areale su tam z elektriskim płotom zašlahali. Z dalšim wupřestrěwanjom mrětwy w Čěskej pak wobsteji wjetši strach, zo móhła so tež do Němskeje dóstać. Wudyrjenje ASP pola nas by enormne hospodarske sćěhi měło. Dyrbjeli swinje po tysacach morić a chlěwy zawrěć. Tež wikowanje ze swinjemi a swinjacym mjasom by zakazane było. Za čłowjeka wšak tale chorosć strašna njeje.
Z nowej technologiju za nowe kwalitne parametry
Čorna Pumpa (JoS/SN). Připrawy za wobdźěłanje jamoweje wody słušeja k najstaršim industrijnym twaram něhdyšeho kombinata Čorna Pumpa. Po wjace hač 60 lětach systemy za přiwod wody z jamy Wochozy a Wjelcej-juh nětko dospołnje wobnowja. Koncern LEAG ma sydom tajkich připrawow. Kóžde lěto wone 400 milionow kubiknych metrow wody klumpaja, we Wochozach je to 89,1 milion. Z toho wjedu 21,4 procenty do Čorneje Pumpy. W jamje Wjelcej-juh je to 67,1 milion kubiknych metrow wody, z kotrychž 16,1 procent do Čorneje Pumpy sćelu.
