Produkuja dale
Budyšin (SN/at). Łužiska ćišćernja w Budyšinje je insolwencu přizjewiła, dokelž hrožeše njekmanosć płaćenja. Drježdźanske hamtske sudnistwo je wutoru, 13. junija, próstwje předewzaća wo samozarjadowane insolwencne jednanje wotpowědowało a zdobom wupruwowaneho fachowca za saněrowanje firmow, prawiznika dr. Martina Dietricha, za społnomócnjeneho powołało. Jednaćelstwo je sobudźěłaćerjow wčera wo połoženju informowało. Produkcija běži dale. Tež Serbske Nowiny dale tam ćišća. Mzdu płaća přistajenym a sobudźěłarjam přichodne tři měsacy z insolwencnych pjenjez Zwjazkoweje agentury za dźěło.
Wobstejacych nadkapacitow dla je so Łužiska ćišćernja krótkodobnje do financnych ćežow dóstała. Za zwoprawdźenje saněrowanskeje koncepcije pak trjebaja wjace časa, rjekny jednaćel Robert Czyzowski. Tohodla je jednaćelstwo minjene tydźenje intensiwnje z wěrićelemi a wulkokupcami rěčało. Tući pak mějachu rozdźělne měnjenja, tak zo hrožeše njekmanosć płaćenja. Wupuć bě, po konsultaciji fachowcow zapodać próstwu, saněrowanje w swójskej režiji přewjesć.
Awto změje přichodnje status posłužby
Politiku sakskeho knježerstwa z Braniborskej nastupajo strukturnu změnu we łužiskim brunicowym rewěrje kaž tež wobłuk energije je statny minister dr. Fritz Jaeckel (CDU), nawoda sakskeje statneje kenclije, na 17. srjedźostawskim dnju rozrostoweho regiona Drježdźany Zwjazkoweho zjednoćenstwa srjedźostawskeho hospodarstwa (BVMW) wčera w Biskopicach rozłožił.
Biskopicy (SN/at). Nimale hač do lěta 2047 maja milinarnje a brunicowe jamy we wobłuku tak mjenowaneje přechodneje fazy wěstotu, w kraju produkować směć. To wuwjedźe sakski statny minister dr. Jaeckel, kiž bě na dnju zhromadneho kabinetneho posedźenja braniborskeho a sakskeho knježerstwa w Ranju do Biskopic přijěł. Nětko ma so čas wužić, tež ze srědkami Zwjazka nowe struktury za dobu po brunicy wuwić. Fritz Jaeckel mjenowaše tu za projekty sumu 1,2 miliardow eurow, kotrež žadatej sej Braniborska a Sakska hač do lěta 2024.
30 lět so chětře minje
Štož je zhubjene, njehodźi so hižo nachwatać
Budyšin/Hózk (SN/BŠe). Žně hromaka so nachileja. Kaž pak je wot plahowarjow woblubowaneje zeleniny słyšeć, njebě sezona runjewon wunošna. Žně su lětsa chětro pozdźe a pomałku zaběželi. Nocy běchu zymne a bě sucho, štož so na kwalitu hromaka wuskutkowa.
Druhi žnjenski połčas bě drje lěpši, ale nic přemóžacy. W Hózkowskim Domanic ratarskim zawodźe mějachu w druhej połojcy sezony přerězne žně. Spočatne straty nachwatać woni njemóžachu. „Štož je zhubjene, wostanje zhubjene“, zdźěli ratar Maćij Domanja na naprašowanje. W Hózku plahuje wón bjezposrědnje při wsy na pjeć hektarach hromak. Štyrjo přistajeni delikatesu wšědnje kałaja, dalši štyrjo ju rjedźa a sortěruja, prjedy hač móža ju na swojich stejnišćach předawać. Zdobom móžeš sej Domanic hromak na přikład w Budyskim „Wjelbiku“ abo w Hrubjelčanskim hosćencu „Sprjewiny doł“ zesłodźeć dać.
Pytaja fotowe modele za jězorinu
Tursitiski zwjazk Łužiska jězorina chce nowe brošurki zhotowjeć, z kotrymiž chce za dowolowy region wabić. Za to pytaja nětko modele, kotrychž chcedźa w awtentiskich situacijach fotografować. Tohorunja chcedźa ludźi z handicapom zapřijeć a tak na bjezbarjerne móžnosće pokazać.
Zły Komorow (SN/BŠe). Turistiski zwjazk Łužiska jězorina pyta nowe mjezwoča za fota, zo bychu za dowolowy region wabili. Kónc junija do septembra planuja hižo wotpowědne fotowe akcije. Fotografować budu so domoródni w awtentiskich dowolowych situacijach kaž na přikład při kolesowanju abo kupanju. Štó pak měł na wobrazach być, dotal hišće jasne njeje. Turistiski zwjazk hišće za nimi pyta. Požadać měli so sympatiske a fotogene wosoby z regiona. Tak pytaja aktiwny porik mjez 40 a 45 lětami kaž tež muže mjez 30 a 35 lětami, kotřiž z wjeselom před kameru steja a chcedźa dowolowy region reprezentować.
Za saněrowanje wodu pušća
Šprjejcy přichodnje před wulkej wodu wěsta wjes
Šprjejcy (JoS/SN). Po zymskej přestawce twarja wot spočatka meje zaso při Małej a Wulkej Sprjewi w Šprjejcach. Wosebje koncentruja so při tym na nasyp, kotryž bu wulkeje wody dla w lěće 2013 wobškodźeny. Nasyp chce Krajne zarjadnistwo za rěčne zawěry (LTV) dołhodobnje zawěsćić. „We 80 lět starych nasypach běchu so masiwne słabosće pokazali“, wujasni projektna zamołwita LTV Cathleen Steinert, „wosebje we wotrězku, hdźež rosćachu štomy. Po pušćenju zwostachu korjenje, hdźež su zhnili. Dźensa při wobnowjenju nasypow nowe směrnicy płaća. Najebać to su tehdy po předležacej wědźe a z k dispoziciji stejacej techniku twarili.“
Pokazaj, što zamóžeš
Budyšin (SN/BŠe). Sy motiwowany a zajimowany wučomnik? Pokazaj, što zamóžeš a čiń sobu! Takle namołwja Budyske technologiske spěchowanske towarstwo zhromadnje z Budyskim wokrjesom a měšćanskim zarjadnišćom wučomnikow, so wo młodźinske inowaciske myto 2017 powabić. Woni pytaja nětko w Hornjej Łužicy za inowatiwnym wučomnikom. Tele počesćenje je zašłe lěta přiběrajo wuznam docpěło a je wuraz hódnoćenja kwalitatiwnje wysokich narokow na wukubłanje a angažement młodostnych kaž tež předewzaćow w Budyskim regionje. Zdobom je młodźinske inowaciske myto jónkrótna šansa firmam, so jako wuspěšne wukubłanske předewzaće w zjawnosći prezentować.
Wosebite spušćadło wuměnjenje za zapławjenje
Z cyłkownje 19 kwadratnymi metrami płoniny, 288 milionami kubiknymi metrami wody a 26 kilometrami přibrjoha nastanje na sewjeru Choćebuza najwjetši kumštny jězor Němskeje. W zymje 2018/2019 chcedźa zapławjenje zahajić. 2026 chcedźa to zakónčić.
Choćebuz (AK/SN). Tónle zaměr wozjewi čłon předsydstwa za hórnistwo koncerna LEAG Uwe Grosser na symboliskim prěnim zarywje wosebiteho spušćadła zašły pjatk w Choćebuzu. Po spušćadle woda do bywšeje brunicoweje jamy běži. Připrawa je wuměnjenje za zapławjenje jězora. Twarić budźe jón hłubokotwarske předewzaće Richarda Schulza tzwr ze Schwarzheide. Pjeć kubiknych metrow wody na sekundu ma do jězora běžeć. Přiwšěm budźe mnóstwo hdys a hdys trochu chabłać, dokelž wotwisuje wone zdobom wot móžneho wolumena wody w Sprjewi. 80 procentow wody je ze Sprjewje. Zbytne 20 proc. je dnowna woda. Předewzaće Łužiska energija a milinarnje (LEAG) je hižo 150 milionow eurow do přihotowanskich dźěłow inwestowało. „Doskónčnje pak budu to 300 milionow eurow“, Grosser podšmórny.
