Wukubłanje je za 42lětnu přidružnicu kaž lotowe dobyće
Diana Gerber z Worcyna je so jako přidružnica w Miłočanskim transportnym předewzaću Missale požadała a hišće raz wukubłanje zahajiła. Bórze změje kónčne pruwowanje.
Prěnje nakładne awto je Diana Gerber hižo na turu pósłała, do Berlina ze spřihotowanej škleńcu. Na to je přichodna překupča za logistiske posłužby wězo tež trochu horda. W meji ma wona pisomne pruwowanje, ertne zakónčace slěduje potom w awgusće. Poprawom, tak Worcynjanka powěda, nochcyše ženje w běrowje dźěłać. Kaž pak so nětko wukopa, je to jeje wusonjene powołanje.
Zawinowar njepłaći
„Myto spěchuje a motiwuje“
Hornjołužiske předewzaćelske myto spěchuje srjedźny staw a pohonja firmy w regionje, zaměrnje dale dźěłać. Wčera su zamołwići zhromadne hospodarske myto Budyskeho a Zhorjelskeho wokrjesa w předewzaću PEWO na Horach oficialnje zahajili.
Za nowy ličenski centrum trjebaja dalšich sobudźěłaćerjow
Předewzaće itelligence je wčera na Budyskej Schliebenowej swój štwórty ličenski centrum w sprjewinym měsće přepodało. Znamjenja steja na dalši rozrost, za čož je posłužbar rezerwowu płoninu kupił. A na Słonoboršćanskim industrijnišću ma wot lěta 2019 dalše běrowowe twarjenje nastać.
Budyšin (CS/SN). Započało je so wšitko 1998 z dźesać sobudźěłaćerjemi. Dźensa ma předewzaće itelligence w Budyšinje wjace hač 200 přistajenych. Loni přewzatych 130 kolegow firmy BIT njeje tu sobu ličenych. „Z tajkim enormnym rozrostom njejsmy spočatnje ličili“, přiznawa Mirko Kruse, jednaćel Budyskeje wotnožki. Wón je sej wěsty, zo předewzaće tu hišće dale rozrosće. Za to su hnydom rezerwowu přestrjeń sobu kupili.
Tudyši region karpowych hatow skrućić
Wupruwowane iniciatiwy za łužisku rybu maja so dale wjesć, polěpšić a zhromadnje dale wuwić. Za to maja tudyše Leaderowe kónčiny łužiska jězorina, wuchodna Hornja Łužica a Hornjołužiska hola a haty hač do lěta 2020 spěchowanske srědki dohromady 975 000 eurow z Europskeho morjoweho a rybarstwoweho fondsa k dispoziciji.
Rakecy (SN/at). Zwičnić łužisku rybu steješe w srjedźišću workshopa, kotryž su regionalne managementy Leaderowych kónčin łužiska jězorina, wuchodna Hornja Łužica a Hornjołužiska hola a haty (OHTL) wčera w Rakecach zarjadowali. Něhdźe třiceći wobdźělnikow je so tam wo přichodźe rybarstwoweje kónčiny Hornja Łužica dorozumiło a ideje za wuwićowe projekty znosyło. „Namjetowane su na přikład zhromadna imagowa brošurka wo hornjołužiskim regionje karpowych hatow, kófer za wodźenja hatarjow a zhromadna ,zjednoćenstwowa‘ značka hatarjow“, wuswětli André S. Köhler z regionalneho managementa OHTL w Rakecach.
Potencial Łužicy spóznać, sylnić a dale wuwiwać
DGB we Łužicy chce přihotowany być na čas po zmilinjenju brunicy. To je wčerawša konferenca we Wojerecach wobdźělnikam wuwědomiła. Sebjewědomje a hordosć na docpěte měłoj Łužičanam při tym pomhać.
Wojerecy (JK/SN). Nahladna ličba zastupjerjow zwjazkoweje, krajneje a komunalneje politiki kaž tež hospodarstwa a wědomosće Sakskeje a Braniborskeje bě wčera přeprošenje Němskeho zwjazka dźěłarnistwow (DGB) do Wojerowskeje kulturneje fabriki sćěhowała. Sakscy a Braniborscy dźěłarnicy chcychu na swojim 13. zhromadnym schadźowanju wuradźować, kak měli postupować w času, hdyž budźe zmilinjenje brunicy we Łužicy zakónčene. Wšitcy su sej přezjedni, zo maja na hospodarske a socialne połoženje po strukturnej změnje we Łužicy derje a hižo nětko přihotowani być.
Jasnje mjenje bjezdźěłnych
Budyšin (CK/SN). Pozitiwny trend traje. W aprylu bě we wuchodnej Sakskej 21 961 bjezdźěłnych, 2 090 mjenje hač hišće w měrcu. Přewšo jasnje a nimo toho jara zahe so dźěłowe wiki lětsa wožiwjeja, kaž zwěsći to Thomas Berndt. Naprašowanje za dźěłowymi mocami pak njezłožuje so jeničce na z počasom zwisowace wuměnjenja. „Hornjołužiske dźěłowe wiki so derje wuwiwaja“, potwjerdźi šef Budyskeje agentury za dźěło dźens dopołdnja. Docpěta mjeńša bjezdźěłnosć njeje zdobom hišće kónc za lěto 2017. Bjezdźěłnostna kwota w dospołnym agenturnym wobwodźe zniži so na 7,7 procentow. Wona pak chabła dale mjez 4,1 procentom w Radebergu a 12,2 procentomaj w Zhorjelcu. Posledni je jenički wobłuk w Hornjej Łužicy z dwucyfrowej kwotu a z jasnym wotstawkom k susodnym běrowam. W Niskej na přikład wučinja kwota jeno 6,9 procentow.
Poradźowarjo agentury za dźěło maja aktualnje 4 364 socialneho zawěsćenja winowatych dźěłowych městnow k dispoziciji, 210 wjace hač w měrcu.
Za lěpši termin w zajimje wšitkich
Do lětušich jězorinowych wikow běchu wabili za jónkrótne dožiwjenja a pokazki turizma, za wólnočasne zaběry kaž tež za dowol a hospodarstwo w rozrosćacym paradizu łužiskich jězorow. Hač zamóchu wiki tele lubjenja spjelnić, wo tym móžachu so zajimcy před Wojerowskej Łužiskej halu a na dwěmaj poschodomaj domu minjeny kónc tydźenja přeswědčić.
Wojerecy (JK/SN). Něhdźe 60 wustajerjow z turizma, gastronomije, hospodarstwa, strowotnistwa kaž tež zarjadnistwa a zawěsćernjow je so prócowało w zajimcach lóšt na to budźić, při łužiskich jězorach přebywać. Něšto zasadne nowe wšak wiki pokazali njejsu, tež hdyž steješe lětsa wosebje pasažěrske łódźnistwo w srjedźišću informacijow. Za to bě sej tež Złokomorowska łódźnica Marianne Löwa chwile wzała, zo by swoje předewzaće a přichodne plany při jězorinje předstajiła. Ale wosta wona jenička, kotraž něšto noweho prezentowaše.
