Drježdźany (dpa/SN). Sakski agrarny minister Thomas Schmidt (CDU) namjetuje zrěčenja mjez producentami, mlokarnjemi a wikowanjom hinak wuhotować, zo by horje-a-dele nastupajo mlokowe płaćizny kónc měło. „Wo tym dyrbiš rěčeć, hdyž su płaćizny za mloko horjeka“, rjekny minister powěsćerni dpa. Wokomiknje njejstej do zrěčenjow mjez producentami a mlokarnjemi ani płaćizna ani mnóstwo zapisanej. Předźěłar pak dyrbi cyłe mnóstwo mloka wotewzać. Žana strona planowansku wěstotu nima. Tajke něšto njeje ani pola žita ani pola mjasa. Schmidt ma mlokowu płaćiznu 35 centow na liter za trěbnu. Samo zwyšenje na 40 centow hišće njedosaha, straty zarunać. Tohodla měli so płaćizny na wysokim niwowje stabilizować.

Zhorjelc/Mnichow (dpa/SN). Na njepřipowědźenym wopyće w Zhorjelskej tworni Siemensa je šef koncerna Joe Kaeser sobudźěłaćerjam wčera rozkładł, čehodla da zawod zawrěć. Zdobom jim wujasni, kotre šansy stejnišćo ma a zo z dobytkom dźěła. Po informacijach dźěłarnistwa je Kaeser přiłubił, ze zwjazkowym a krajnym knježerstwom wo tym rěčeć, kotru perspektiwu chcedźa městu Zhorjelcej a regionej zmóžnić. Kaž rjekny Ronny Zieschank, zastupowacy předsyda zawodneje rady turbinotwarca, je wopyt wočakowanja sobudźěłaćerjow spjelnił. Prěni społnomócnjeny IG metal wuchodneje Sakskeje Jan Otto mjenowaše to „respektny wuspěch protesta“.

Wodźenski system pućow za motorizowany wobchad we łužiskej jězorinje ma nastać. Po słowach jeho jednaćela Daniela­ Justa zaměrowy zwjazk Łužiska jězorina Sakskeje dale na tym dźěła.

Hory (AK/SN). „Dźe wo to, šoferow z awtodróhi zaměrnje do jězoriny wodźić. Za to nastajimy na 34 městnach pokazowaki a informaciske tafle“, rozłoži jednaćel Just na njedawnej zwjazkowej zhromadźiznje na Horach.

„Kónc awgusta běchu dźěła wupisali, w oktobrje su TDE Srjedźoněmskej serwisowej towaršnosći zwr Espenhain nadawk dali projekt zwoprawdźić. 13. nowembra wobhladachu sej wšitke stejnišća, prěnje fundamenty chcedźa hižo bórze stajić“, Daniel Just rozłoži. Zdobom staraja so w tym zwisku wo to, wuhotować měšćansku wobjězdku Wojerecy-wuchod z hamtskimi taflemi „Łužiska jě­zorina“. Zaměrowy zwjazk je plan přisłušnym zarjadam­ za přizwolenje zapodał a so nadźija,­ zo jón spěšnje wobdźěłaja.

Za dźeń wotewrjenych duri we Wojerowskim kwalifikowanskim a treningowym centrumje QTZ běchu so zarjadowarjo wjetšeho wothłosa nadźijeli, předewšěm z města samoho.

Wojerecy (JoS/SN). Nawabić nowych wučomnikow­ bě hłowny zaměr njedawneho dnja wotewrjenych duri we Wojerowskim kwalifikowanskim a treningowym centrumje QTZ. Towaršnosć za dale- a wukubłanje (GAF) poskića tam 40 do 50 wukubłanskich městnow, rozłoži wukubłanski nawoda Kai-Uwe Schollmeier. Nimo moderneho wukubłanišća rozkładźechu jednotliwe powołanja, kaž su to na přikład elektronikar, zawodowy technikar, industrijny mechanikar a mechatronikar. Wšitke powołanja hodźa so tohorunja za technisce zajimowane holcy. Dohromady zmóžnja GAF wukubłanje w 14 wšelakich powołanjach.