Choćebuske nazymske wiki z pisanym programom
Choćebuz (mih/SN). Něhdźe 300 wustajerjow z jědnaće zwjazkowych krajow kaž tež z Awstriskeje, ze Šwicarskeje, z Pólskeje, Čěskeje a Tuneziskeje prezentowachu zašły kónc tydźenja na 20. Choćebuskich nazymskich wikach najwšelakoriše poskitki. Paleta sahaše wot twarskich móžnosćow hač k dekoraciji swójskeho bydlenja. Nimo toho poskićachu wustajerjo hišće słódne chłóšćenki abo skedźbnjachu na móžnosće, swój swobodny čas połny dožiwjenjow přežiwić.
Prěni raz přihotowachu organizatorojo wustajeńcu pod hesłom „Wěš hišće?“. Wšelake nastroje, kotrež ludźo za čas NDR we wšědnym žiwjenju wužiwachu, běchu do přehladki zapřijeli. Z posměwkom dopominachu so ludźo na tónle čas. Najbóle pak informowachu so wopytowarjo wo najwšelakorišich poskitkach wustajerjow. Wosebje stejnišćo pólskeho předewzaća Horex wuwabi wulki zajim.
Kulow wabi z nowosćemi
Wobchodnicy dźakuja so kupcam z nakupowanskej nocu
Kulow (SN/JaW). Wobchodnicy Kulowa hotuja so na 9. nakupowansku nóc w kuzłapołnym swětle pjatk, 21. oktobra. Hesło lětsa rěka „Kótwicu wućisnyć w Kulowskim přistawje“.
Žane konkretne wuprajenja
Šef němskeho stejnišća Bombardier skónčnje do Zhorjelca přijěł
Zhorjelc (SN/BŠe). Skónčnje so tež raz šef němskeho stejnišća kanadiskeho koncerna Bombardier Germar Wacker na městnje ze sobudźěłaćerjemi rozmołwja. To je wulki čas! Předewzaće dźě wotpohladuje wulki dźěl dźěłowych městnow wottwarjeć. Přičiny dosć, so tuž jónu w potrjechenym Zhorjelskim stejnišću wo połoženju wobhonić. Wčera bě Wacker na zawodowu zhromadźiznu přijěł. Poprawom dźě chcyše hižo před tydźenjomaj na prašenja přistajenych wotmołwjeć. Krótkodobny termin pak jemu tole znjemóžni. Sta přistajenych je na demonstraciji za zdźerženje dźěłowych městnow protestowało.
Dwěsćě nowych dźěłowych městnow ma nastać
Koncern Prinzhorn Holding, kotryž wudźeržuje stejnišća w 15 krajach, wotpohladuje w swojim zawodźe w Čornej Pumpje produkciju rozšěrić.
Čorna Pumpa (JoS/SN). Zawod Hamburg-Rieger, přisłušacy předewzaću Prinzhorn Holding, natwari w Čornej Pumpje nowu papjerowu mašinu. Wo tym informowaše koncern wčera na nowinarskej konferency na łužiskim stejnišću zjawnosć. Cyłkownje nałoža za to 370 milionow eurow. Tuž běchu wčera mnozy zastupnicy z politiki přišli. Mjez nimi běchu Braniborski hospodarski a energijowy minister Albrecht Gerber (SPD), Grodkowscy zapósłancy Zwjazkoweho sejma Ulrich Freese (SPD), dr. Klaus-Peter Schulze (CDU) a Birgit Wöllert (Lěwica), kaž tež mnozy měšćanosća a wjesnjanosća regiona.
Z inwesticiju maja 200 nowych dźěłowych městnow nastać, z nich 15 wukubłanskich, kaž wčera rěkaše. Nowa, druha papjerowa mašina ma wjetša a wukonićiša być hač dotalna. Ze šěrokosću 7,90 metrow móže wona lětnje 493 000 tonow běłeje a bruneje zakładneje papjery a papjerca ze stoprocentowskeje stareje papjery naprodukować.
Ličba turistow spadnyła
We wuhódnoćenju sakskeho krajneho statistiskeho zarjada w Kamjencu nětko ličby knihowanjow a přenocowanjow w hotelach, pensijach a hóstnych domach w Hornjej Łužicy předleža.
Wobdźělić so
Budyšin (SN). Budyske wokrjesne rjemjeslnistwo namołwi kupcow 650 zjednoćenstwam přisłušacych zawodow w Budyskim wokrjesu, zo bychu so hač do 15. oktobra na dobyćowej hrě we wobłuku dźakowanskeje akcije wobdźělili. Hłownej myće stej kónctydźenska jězba do Berlina a koleso. Paleta dobyćow saha wot dobropisa za frizera abo rěznika hač k přizjewjakej kura abo přepruwowanju třěchi. Jako partner akcije přewostaja jedna chorobna kasa zastupne lisćiki za Wojerowsku łužisku kupjel. Runje tak su rědke rjemjesła zastupjene. Tydźeń do kónca dźakowanskeje akcije je boka hižo derje pjelnjena z wotmołwnymi kartami, kaž wokrjesne rjemjeslnistwo zdźěla.
Dobyćerjow a „jich“ rjemjeslniske zawody přeproša 10. nowembra na „dźeń strowoty“ na Walsku 8 w Budyšinje, zo bychu jim myta přepodali. Štóž njeje so dotal wobdźělił, njech na logo akcije při zachodźe zjednoćenstwoweho fachoweho zawoda dźiwa, so tam za dobyćerskej hru praša, pytane słowo zapisa, listowu znamku nalěpi a kartu hač do 15. oktobra wotpósćele abo w sydle wokrjesneho rjemjeslnistwa woteda.
Zamołwitosć měli druzy njesć
Zhorjelski wokrjes prócuje so wo wutwar spěšneho interneta
Zhorjelc (AK/SN). Zhorjelski wokrjes pohonja wutwar techniki za spěšny internet. „Chcemy transparentne jednanje. Ćeže chcemy zjawnje spřistupnjeć“, podšmórny decernentka za wobswět, hospodarstwo a wokrjesne wuwiće Heike Zettwitz minjenu póndźelu w Zhorjelcu. „Nětko předleži studija praktikabelnosće.“ Předewzaće Inženjerska towaršnosć Tele-Kabel z Kamjenicy je połoženje w 40 gmejnach přepytowało. 13 komunow mjez druhim Slepo, Trjebin, Rěčicy a Dźěwin njebu wobkedźbowane, dokelž chcedźa swójski koncept přesadźić. Zhotowjena studija njeje po słowach Heike Zettwitz spokojaca. „We wulkich dźělach dyrbimy studiju hišće raz předźěłać. Wosebje dźe tu wo dokładniše ličby domjacnosćow a wo financne połoženje gmejnow“, decernentka wujasnja.
Nóc z rekordom
Choćebuz (SN). Wjac hač 5 700 ludźi wopyta zašłu sobotu 10. nóc kreatiwnych hłójčkow w Choćebuzu. Na 20 stejnišćach z najwšelakorišimi zarjadowanjemi pod hesłom „rjemjesło – mjez wčera a zajutřišim“, móžachu zajimcy poskitki wužić abo so samo tež raz wuspytać. Prěnju tajku nóc přewjedźe zarjadowar pool production w lěće 2007, hdźež bě 1 400 ludźi přišło. Sobotna rezonanca bě tak wulka, kaž hišće nihdy do toho, hódnoći zarjadowar nowy rekord wopytowarjow.
Braniborski hospodarski minister Albrecht Gerber (SPD) wotewrě zhromadnje z hłownym jednaćelom industrijneje a wikowanskeje komory Choćebuz dr. Wolfgangom Krügerom jubilejnu nóc. Minister so wjeseleše, zo so wobydlerjo tak intensiwnje z městom rozestajeja a so z najwšelakorišimi powołanjemi rjemjesła zeznajomnja. Wosebje wjele zajimcow bě stejnišćo koncerna Vattenfalla wopytało. Tola tež Dekra abo předewzaće Siemens je mnohich ludźi přiwabiło. Na Starych wikach prezentowachu so moderne kaž tež tradicionalne rjemjesła. Dalše stejnišća běchu w statnym dźiwadle abo w studiju rbb natwarjene.
Do jězoriny zaměrnje inwestuja
Nowe Město (AK/SN). Zaměrowy zwjazk Łužiska jězorina je z dotalnej bilancu lěta přewšo spokojom. „We wobłuku přenocowanjow je ličba wo wosom do dźewjeć procentow přiběrała“, zdźěli jednaćel zaměroweho zwjazka Sakskeje Volker Mielchen na njedawnym posedźenju w Nowym Měsće, hdźež rozprawješe tež wo aktualnych naprawach.
Mjez branšemi wulke rozdźěle
Mzdy w Sakskej stupaja, w Hornjej Łužicy pak su dale sobu najniše
Budyšin (CK/SN). Ze 4 447 eurami na měsac zasłužeja přistajeni we wobłuku šula a kubłanje w Hornjej Łužicy najwjace. Při tym jedna so wo přerěznu mzdu, kotrejež wysokosć dochody profesorow na Žitawskej wysokej šuli a na Budyskej studijnej akademiji bytostnje wobwliwuja. Kóždy wučer a kóžda kubłarka nima potajkim tule sumu na swojim mzdowym wotličenju stejo.
Podobnje derje zasłužeja sobudźěłaćerjo energijoweho zastaranja ze 4 258 eurami měsačnje. W tym wotbłyšćuje so wysoki mzdowy niwow pola Vattenfalla a w tarifowje wjazanych měšćanskich zawodach. Předźěłaca industrija płaći 2 230 eurow měsačnje, twarstwo 2 043. W strowotnistwje móžeš 2 426 eurow zasłužeć, we wobchadźe a logistice 1 868. Ze zawjedźenjom minimalneje mzdy je mzda w hóstnym přemysle wo 17 procentow najjasnišo postupiła, přiwšěm tam z 1 498 eurami najmjenje zasłužeš.
