Zelena liga sej wotmołwy žada
Choćebuz (SN/at). Na dźewjeć prašenjow k rewěrowemu konceptej LEAG žada sej wobswětowy zwjazk Zelena liga wotmołwy wot dr. Helmara Rendeza, nawody předsydstwa. Kaž wjelelětny zastupjer wobswětowych zwjazkow w braniborskim brunicowym wuběrku Renej Šuster zdźěli, „wostanje rewěrowy koncept w mnohich dypkach njejasny“. Ma-li so Janšojska milinarnja po wuběženju susodneje jamy maksimalnje wosom do dźesać lět z wuhlom z juha rewěra zastarać, „móže to 18 do 180 milionow tonow emisije CO2 woznamjenjeć. Z tajkim difuznym wuprajenjom njemóžeš ani wudobywanske pola kaž Wjelcej-juh potwjerdźić, ani njeje to zakład strukturneho a stejnišćoweho wuwića“.
Dalše wotewrjene prašenja měrja so na přikład na kónc Janšojskeje jamy před Dubojcami (Taubendorf), na škit Braniborskeje před zniženjom dnowneje wody Wochožanskeje jamy a na to, hač LEAG w Slepjanskej gmejnje abo we wjace njewotpohladanej wudobywanskej kónčinje kupjene płoniny zaso předa.
W zajimje hosći hromadźe dźěłać
Budyšin (SN/at). Pjeć sakskich wólnočasnych parkow je minjeny pjatk w Budyšinje zajimowe zjednoćenstwo „Sakske wólnočasne a swójbne parki“ wutworiło. Na te wašnje chcedźa Małowjelkowski prazwěrjenc, vogtlandski wólnočasny park Plohn, Słónčny kraj Lichtenau pola Kamjenicy, Kulturna kupa Einsiedel nad Nysu kaž tež swójbny wólnočasny park Belantis w Lipsku swoje zajimy zhromadnje zastupować. Za rěčnika zjednoćenstwa pomjenowachu jednaćela parka Belantis Erwina Linnenbacha.
Kaž Volker Bartko, jednaćel Budyskeje Zawodoweje a wobdźělenskeje towaršnosće (BBB), kotraž prazwěrjenc wobhospodarja, rozłoži, chcedźa wobdźělene předewzaća hospodarski wobłuk dnjoweho turizma bóle do srjedźišća stajić. „Wšitcy rěča wo ličbach přenocowanja. Wuměnjenje za to pak su přiwabliwe poskitki, kaž te našich parkow. Za to druhdy připóznaće pobrachuje.“ Nimo toho chcedźa zhromadne marketingowe akcije přewjesć, politiske a prawniske wužadanja zmištrować a jedyn wot druheho wuknyć.
Wopory, nadźija, perspektiwa
Nowy brunicowy koncept předewzaća LEAG wšelake reakcije zbudźił
Nowy koncept łužiskeho brunicoweho předewzaća LEAG, kotryž su tydźenja w Choćebuzu zjawnosći předstajili, zbudźa wolóženje, ale tež njezrozumjenje. Zludani su wosebje wot Wjelčanskeje brunicoweje jamy potrjecheni. Za nich chce koncern z čěskim mějićelom EPH hakle w lěće 2020 rozsudźić, kak tam dale póńdźe. Hižo lěta trajaca njewěstosć tam dale wostanje. Njezadźiwa tuž, zo maja so tamniši wobydlerjo za wopor čěskich spekulantow, kotrymž je jenož wažne z regiona dosć dobytka čerpać. Politika je po jich słowach zaprajiła.
Originalne łužiske městna zachować
Turistiski zwjazk Łužiska jězorina dźěła hižo wot lěta 2007 zaměrnje na wuwiću Energijoweje čary łužiskeje industrijneje kultury. Wulku wažnosć kładu zamołwići při tym na originalne stejnišća, kotrež chcedźa zachować.
Rań (AK/SN). „Chcemy wukony bywšich přistajenych hódnoćić a zajimawe regionalne stawizny powědać“, wuzběhnje projektowa koordinatorka energijoweje čary Antje Boshold.
Přihotowali su wjacore tak mjenowane wotkrywanske tury jako dnjowe jězby. Jedna tajka na přikład wjedźe zajimcow wokoło wopytowanskeho centruma IBA-terasow w Ranju (Großräschen). „Dalše stacije tam su Victoria-wyšina, winica, jězorowy móst, studijny dom IBA a čitanska kofejownja“, wuswětla prokuristka twarskeje a hospodarskeje towaršnosće IBA-terasy dr. Cornelia Wobar. Turisća móža potom dale po derje wuhotowanej šćežce do Sucheho Gozda (Dörrwalde) kolesować a sej tam ponowjeny historiski młyn wobhladać.
Dobre šansy w regionje
Partnerske zrěčenje mjez dźěłowej agenturu a wysokej šulu podpisane
Žitawa (CK/SN). Posrědkowarjo Budyskeje dźěłoweje agentury móžachu dotal něhdźe 640 dźěłowych městnow z akademiskimi narokami wobsadźić. To je štwórćina wjace hač hišće před lětom. Akademikarjow pytaja hłownje w kumštnomaćiznowej industriji, w inženjerskich powołanjach kaž tež dodawarjo awtomobiloweje industrije. Potrjeba na tym polu je přiběraca. Z teje přičiny staj šef Budyskeje dźěłoweje agentury Thomas Berndt a rektor Wysokeje šule Žitawa/Zhorjelc prof. Friedrich Albrecht tydźenja w Žitawje kooperaciske zrěčenje podpisałoj. Zaměr je młodych ludźi tak poradźować, zo idealne studijne městno a perspektiwu w regionje nańdu. Častodosć starši a šulerjo ani njewědźa, kajke dobre šansy akademikarjo tule maja, Thomas Berndt podšmórny.
Na Wysokej šuli Žitawa/Zhorjelc studuje tuchwilu něhdźe 3 000 młodych ludźi w šěsć fakultach z cyłkownje 40 studijnymi směrami. Něhdźe 15 procentow studowacych je z wukraja.
„Čerwjena nitka“ wukrajnym fachowcam
Budyšin (CS/SN). Dźěłowe wiki Budyskeho wokrjesa su mjez wukrajnymi fachowcami prašane. Tole zdźěla Lars Eibisch, nawoda wotrjada za wukrajnikow Budyskeho krajnoradneho zarjada. Tak pytaja stajnje zaso absolwenća z Čěskeje za dźěło- wym abo wukubłanskim městnom. Managerojo abo wědomostnicy z cyłeje Europy chcedźa w Hornjej Łužicy skutkować. Tola tež personal za hladanje starych a chorych, wosebje z aziskich krajow, pyta tule za dźěłowym městnom.
Přirodowy a wuměłstwowy paradiz před kubłom
Šćeńc (JoS/SN). Po přikładźe bywšich „Šćeńčanskich alpow“ nastawa před Gižkojskim kubłom wotměnjawa pohórnistwowa krajina. Ideja k tomu je hižo štwórć lětstotka stara. Při wotbagrowanju wsy njebě kubło potrjechene a steji tuchwilu na kromje brunicoweje jamy. Po tym zo běchu lěta 2009 wuwozny móst a bagry wottud ćahnyli, slědowaše rekultiwowanje. Wo aktualnym stawje informowaše tydźenja předewzaće Łužiska energija a milinarnje (LAEG).
Jubilej wikow a zdobom kónc
Hospodarske wiki WIR, kotrež běchu stajnje wuspěšna pokazka hospodarstwa a rjemjesła regiona, wotměchu so kónc tydźenja jubilejny 25. raz a zdobom posledni króć w tej formje.
Kamjenc (JK/SN). To, štož bě so za kulisami hižo připowědźiło, wobkrući zamołwity organizator Andreas Heinrich, nawoda Budyskeho zarjada za wokrjesne wuwiće. „Wiki w tej formje hižo njebudu. Pytamy za nowymi móžnosćemi, region a jeho hospodarstwo předstajić a zajimcam prezentować“, rjekny wón k zakónčenju přehladki.
Najebać nimale lětnje wjedro su wiki mjenje, ale přiwšěm zajimowanych hosći přiwabili. Po pjatkownym zjawnym zahajenju witaše město Kamjenc zajimcow, jako zahaji kampanju jako kompetencny centrum za zhotowjenje baterijow.
W tradicionalnym kulinariskim wubědźowanju dźěše lětsa wo kołbasu a mjasowe wudźěłki. Nimo fachowcow z rězniskeho zjednoćenstwa Budyskeho wokrjesa bě jury tež zaso ze zjawnej prominencu wokrjesa wobsadźena. Zamołwity organizator, Worklečanski rězniski mišter Gerat Wałda, witaše hosći wubědźowanja ze serbskim postrowom.
Za lěpše zwiski w bliskowobchadźe
Zaměrowy wobchadny zwjazk zjawneho bliskowobchada Hornja Łužica-Delnja Šleska (ZVON) chce zaso železniski zwisk mjez Zhorjelcom a Wojerecami zmóžnić. Jězbny čas ma so wo dźesać mjeńšin skrótšić.
Budyšin (UM/SN). Na železniskej čarje mjez Wojerecami a Hórku budu wot decembra 2018 zaso wosobowe ćahi jězdźić. Zaměrowy wobchadny zwjazk zjawneho bliskowobchada ZVON je to na swojim posedźenju minjeny pjatk w Budyšinje hižo zašo hač planowane wotpowědnje rozsudźił. Kaž zastupny jednaćel zwjazka Christoph Mehnert wobkrući budu ćahi w dwuhodźinskim rytmusu jězdźić. Jězbny čas mjez Zhorjelcom a Wojerecami so potom wo dźesać mjeńšin na něhdźe hodźinu skrótši.
Nalěćo w Hornjej Łužicy dźěłowe městna přinjesło
Budyšin (CK/SN). W měrcu bě we wuchodnej Sakskej 24 051 bjezdźěłnych registrowanych, 1 239 mjenje hač měsac do toho. Po słowach Thomasa Berndta je nalěćo wočakowany rozmach na dźěłowych wikach přinjesło. Tole wotbłyšćowaše so w tym, zo potrjeba za fachowcami přiběraše, praji šef Budyskeje agentury za dźěło. Z 1 251 nowymi swobodnymi městnami přińdźe najwjetši dźěl znowa z firmow za dźěło na čas, ale ze 732 městnami tež nahladna ličba z předźěłaceho přemysła kaž mašinotwarstwa, metal předźěłaceje industrije a ze zhotowjenja picy. Kwota bjezdźěłnosće wučinja we wobłuku agentury dohromady 8,4 procenty. Rozdźělene po regionach saha paleta wot 4,2 procentow w Radebergu hač k 12,7 procentam w Zhorjelcu.
Kaž Thomas Berndt rozłoži, nima pohib na dźěłowych wikach jeno sezonalne přičiny. Sobudźěłaćerjo agentury móža tuchwilu 4 154 swobodnych dźěłowych městnow z winowatostnym socialnym zawěsćenjom poskićeć. To je štwórćina wjace hač před lětom. „Sym optimistiski, zo so dźěłowe wiki dale pozitiwnje wuwija“, potwjerdźi Berndt.
