Park „Trixi“ je cyłoněmske wočerstwjenišćo
Wulki Šunow (Großschönau) (AK/K). Wulkošunowski park „Trixi“ z kupjelu, dowolowymi domčkami, gastronomiju a campingownišćom je dale bóle cyłoněmske wočerstwjenišćo. „Hłownje drje su hosćo ze Sakskeje, spochi wjac pak tež z Braniborskeje, Berlina a samo Bayerskeje“, powěda jednaćelka parka Annette Scheibe. Loni wopyta park 20 200 ludźi. Přerěznje pjeć dnjow su wopytowarjo w dowolowych domčkach abo na campingownišću přebywali. Tuchwilu ma Trixi-park 96 dowolowych domčkow, 600 łožow za dowolnikow a campingownišćo ze 100 městnami za stany a caravany.
Pućowanje po přirodźe a kolesowanje stej hłownej motiwaciji, w kónčinje přebywać. Přiwšěm wužiwaja předewšěm w pódlanskej sezonje tež šulske rjadownje poskitki přebywanišća. Tole přinošuje k intensiwnišemu wućeženju.
Přehladka trendej přiměrjena
Šnajdrec kuchinski wobchod změje wot jutřišeho nowu wustajeńcu
Wulka Dubrawa (SN/MWj). Hižo wot januara 1990 zastaruja Křesćan Šnajder a jeho sobudźěłaćerjo hornjołužiske domjacnosće z modernymi kuchnjemi. Tež mjez serbskimi wobydlerjemi ma jeho kuchinske studijo tójšto kupcow. Předewzaće ma swoje sydło mjeztym 20 lět we Wulkej Dubrawje. „W tym času smy wjacore dźěle přehladki zas a zas přetwarjeli. Nětko pak bě raz cyłkowny přetwar trěbny“, powěda firmowy šef. Hižo loni w decembru započachu nowe špundowanje kłasć, wšitke nutřkowne sćěny přestajeć a nowe kuchnje zatwarjeć. Wonkownje błyšći so Šnajdrec dom z nowej fasadu.
W Hamorskich rostlinarnjach mjeztym dwaj tydźenjej kórki žněja. ...
Znowa wolili
Na ITB za Hornju Łužicu wabja
Na Mjezynarodnej turistiskej bursy (ITB) w Berlinje, najwjetšich turistiskich wikach swěta, je tež prózdninski region Hornja Łužica zastupjeny. Wón předstaja so na zhromadnym stejnišću Sakskeje turistiskeje marketingoweje towaršnosće na wustajenišću 102 w hali 11.2.
Berlin/Budyšin (SN/at). Zajimowe zhromadźenstwo busowa turistika Marketingoweje towaršnosće Hornja Łužica-Delnja Šleska (MGO), město Budyšin, Europske město Zhorjelc-Zgorzelec tzwr a turistiske kónčinowe zhromadźenstwo Park přirody Žitawske horiny-Hornja Łužica z.t. zastupuja po informacijach MGO tudyši prózdninski region. Jednaćel MGO Olaf Franke je na dnjomaj fachowych wopytowarjow dźensa a jutře na wustajenišću, zo by so ze zastupjerjemi politiki kaž tež wodźacymi turistikarjemi ze Sakskeje a Braniborskeje rozmołwjał.
Spěchowanske próstwy zapodać
Rakecy (SN). We wobłuku 6. projektoweje namołwy su lětsa nalěto 2,4 miliony eurow spěchowanja za wuwiće wjesneho ruma w Leaderowym regionje Hornjołužiska hola a haty k dispoziciji. Wo tym informuje regionalny management ze sydłom w Rakecach, hdźež přijimaja tež hač do 28. apryla projektowe próstwy. Wo nich rozsudźi přisłušny gremij na posedźenju 12. junija.
Priwatnicy, předewzaća, komuny a njepřemysłowe organizacije kaž towarstwa a cyrkwje móža próstwu wo podpěru zapodać. „Móžnosće, projekty spěchować, su jara wšelakore. Poručamy tuž hižo sčasom styki z regionalnym běrowom w Rakecach nawjazać, zo hodźeli so spěchowanjakmane projekty wuwić“, podšmórnje André S. Köhler z regionalneho managementa.
Za atraktiwnišu łužisku jězorinu
Markantne dypki a optiske koridory (Sichtschneisen) nad wodźiznami maja atraktiwnosć łužiskeje jězoriny dale powjetšić. To podšmórny Daniel Just, jednaćel zaměroweho zwjazka Łužiska jězorina Sakska, na wčerawšim posedźenju w Kamjencu.
Kamjenc (AK/SN). Prěni naćisk je wčera planowanski běrow Subatzus & Bringmann GbR běrow za posudźowanje štomow a krajinowu architekturu Dörrwalde pola Ranja předstajił. Jako potencielne markantne dypki mjenowaše projektowa zamołwita Ines Grimm Blunjanski nasyp, Šibojski jězor-sewjer a Energijowu fabriku Hórnikecy. Stejnišća za sydom móžnych optiskich koridorow su južny pobrjóh Nowołučanskeho jězora, sewjerny pobrjóh Zabrodskeho jězora blisko B 156, sewjerny pobrjóh Šibojskeho jězora kaž tež Jantarowy, Bjerwałdski, Třižožonjanski a Slěborny jězor.
Plany so ani kuska njezměnja
Daimler so znowa za Kamjenske stejnišćo wuprajił
Kamjenc (UM/K). Awtotwarc Daimler-Benz nima wotpohlad, zhotowjenje dźělow za baterije elektriskich awtow z Kamjenca do Stuttgarta-Untertürkheima přepołožić. Plany za Kamjenc so tak zwoprawdźa, kaž buchu wone swój čas publikowane a so ani kuska njezměnja, jedna z rěčnicow koncerna na wotpowědne naprašowanje wobkrući. Zawod w Untertürkheimje zapletu na hinaše wašnje do elektromobility, na přikład z produkciju kompresorow za ćěrjenje. „Kamjenca so to na žane wašnje njedótka“, rěčnica wudospołni.
