Nowy projekt
Pirna/Drježdźany/Praha (SN). Turistikarjo w Sakskej Šwicy a Čěskej Šwicy chcedźa hišće wušo hromadźe dźěłać. Minjene lěta su kónčinu hranicu přesahowace turistisce wuwili a zwičnili. Nětko chce so region stać z přikładom poradźeneje integracije turizma, přirodo- a wobswětoškita kaž tež bjezbarjernosće.
Składnostnje dźesaćlětneje kooperacije stej předsydstwje turistiskeho zwjazka Sakska Šwica a powšitkownowužitneje towaršnosće Čěska Šwica wčera we wulkopósłanstwje Němskeje w Praze wuradźowałoj. „Połobske pěskowčiny maja so stać z modelom za přikładnu integraciju zajimow turizma, přirodo- a wobswětoškita“, rjekny předsyda sakskeho zwjazka Klaus Brähmig. Jeho čěski kolega Zbyněk Linhart, do přichoda hladajo, doda: „Bjez partnerskeho, mjezy překročaceho zhromadneho dźěła njebychmy dawno tam byli, hdźež dźensa stejimy.“
Spěchowanske srědki Europskeje unije su dwěmaj wuspěšnymaj wulkoprojektomaj polěkowali. Próstwa za dalši w lěće 2016 je zapodata. Ćežišćo ma tam wuwiće a zwoprawdźenje strategije skutkownosće za region być.
Termin za kupcow nimo
Berlin (dpa/SN). Planowana předań brunicoweje wotnožki energijoweho koncerna Vattenfall we Łužicy je w nowej fazy: Hač do dźensnišeho mějachu potencielni kupcy składnosć, swój zajim na milinarnjach a brunicowych jamach formelnje přizjewić. Zjawnje připowědźiłoj stej tole čěskej energijowej předewzaći EPH a ČEZ. Tež wobswětoškitna organizacija Greenpeace je mjez móžnymi kupcami. Hišće dźensa je wona w Berlinje přičiny swojeje njewočakowaneje iniciatiwy wopodstatniła. Kaž jeje zastupjerjo potwjerdźichu, chcyli wuhlowe jamy kupić, zo by brunica w zemi wostać móhła. Krajnej knježerstwje w Drježdźanach a Podstupimje porno tomu dwělujetej, zo je poskitk Greenpeace chutnje měnjeny.
Dotal njeje znate, hač je nimo mjenowanych zajimcow hišće dalšich móžnych kupcow. Čěskej zajimcaj powěsćerni dpa wobkrućištej, zo stej postajeny termin přizjewjenja dodźeržałoj. Vattenfall chce swoju brunicowu wotnožku we Łužicy w běhu lěta 2016 předać, dokelž njeje hižo lukratiwna.
Stare wokna su „strašne“
Misalic zawod w Miłoćicach chce swoju kapacitu składa rozšěrić
Miłoćicy (SN/MWj). Hišće hač do přichodneje wutory maja wobydlerjo składnosć, zapodać znapřećiwjenja přećiwo planam Misalic transportneje a logistiskeje firmy w Miłoćicach. Wona ma swoje sydło na dźělu bywšeje cyhelernje. Tam stare drjewo nakupuja, składuja a wotwožuja. Dotal smědźachu 5 000 tonow tajkeje maćizny składować, nětko maja wotpohlad, tele mnóstwo na 8 000 tonow rozšěrić. Dokelž chcedźa do tohole rozšěrjenja tež 1 000 tonow tak mjenowanych „strašnych wotpadkow“ zapřijeć, je za to wosebita dowolnosć po zakonju wo imisiskim škiće trěbna.
Žadyn žort, chutny wotpohlad
Choćebuz/Stockholm (SN/JK). Jako minjeny tydźeń organizacija Greenpeace swój zajim brunicowu spartu energijoweho koncerna Vattenfall přizjewi, wobhladowachu to mnozy, mjez druhim tež fachowcy, jako žort. Mjeztym pak je jasne, zo ma Greenpeace chutny wotpohlad, brunicowu spartu kupić. Wotpowědne financy sej wobstarać, njeje po měnjenju hospodarskich fachowcow ćežko za organizaciju, kotraž kaž koncern funguje. Vattenfall poskitk wobswětoweje organizacije Vattenfalla chutnje bjerje.
Wodźenski system so krok po kroku zwoprawdźa
System wodźenja po pućach łužiskeje jězoriny ma so za pućowarjow, kolesowarjow, skaterow a njemotorizowany wobchad hišće lětsa doskónčnje zwoprawdźić. „Dachmy wjac hač 500 taflow kontrolować. Smy pokiwy sćěhowali, zna- mješka wudospołnili a polěpšili. Twarske zwoprawdźenje slěduje nětko w oktobrje“, wujasnja Henriette Schindler, sobudźěłaćerka sakskeho zaměroweho zwjazka Łužiska jězorina, na njedawnej zwjazkowej zhromadźiznje w Hamorje.
Zwoprawdźić ma so tohorunja wodźenski system za motorizowany wobchad. Zaměr je, nastajić znamjenja a tafle při awtodróze, zwjazkowych dróhach a dalšich hłownych dróhach do směra na łužisku jězorinu. „Planowanja za sakski dźěl su zahajene. Dokładne stejnišća za informaciske dypki runje pruwujemy, Henriette Schindler rozłožuje, „prěnje dorěčenja z wobchadnymi zarjadami za zjawne stajenje taflow su mjeztym wotzamknjene.“ Nětko maja so informaciske tafle spěšnje dozhotowić. Prěnje maja spočatk noweho lěta stać, zjawne potom slěduja.
Sezona kurjenja móže so započeć
Spěchowanje tež we łužiskej jězorinje zahajene
Za wjesne kónčiny su w Sakskej loni nastajili tak mjenowane wuwićowe strategije (LES) we wobłuku spěchowanskeho programa Leader ze zaměrom, zo so zjawne spěchowanske srědki na dobro wuwića wjesnych kónčin zasadźa. Zwoprawdźenje LES we łužiskej jězorinje pod hesłom „Wot hórnistwa k turistiskej a energijowej kónčinje“ přinošuje k polěpšenju žiwjenskeje kwality na kraju a wožiwjenju hospodarstwa regiona.
Runja druhim spěchowanskim regionam Sakskeje je so tež w spěchowanskim regionje łužiska jězorina zahajiła prěnja namołwa k zapodaću projektow k přesadźenju wuwićoweje strategije spěchowanskeho programa Leader.
Městna akciska skupina (LAG) łužiskeje jězoriny je runje tak kaž wšě dalše spěchowane kónčiny zhromadnje z wobydlerjemi, předewzaćemi, towarstwami a komunami za wjesne kónčiny wudźěłała wuwićowu strategiju. To bě zakład, zo stanje so z připóznatej spěchowanskej kónčinu. Nětko smědźa so nadźijeć finacowanja projektow ze spěchowanskich pjenjez Europskeje unije a Swobodneho stata Sakskeje.
Rozsud tworić njeje lochko
Koncern Vattenfall budźe ze zajimcami zasadnje jednać dyrbjeć
W Sakskej a Braniborskej wobhospodari energijowy koncern Vattenfall tuchwilu hišće pjeć wuhlowych jamow a tři milinarnje: Janšojce, Čornu Pumpu a Hamor. Dalša milinarnja w Lippendorfje we wokrjesu Lipsk słuša šwedskemu koncernej hromadźe z energijowym koncernom EnBW w Karlsruhe.
Hódnota brunicoweje sparty a jeje płaćizny njejsu hišće jasne. Magnus Hall, šef koncerna, signalizowaše, zo so brunicowe hospodarstwo za Šwedsku wudani. Fachowcy rěča wo cyłkownej hódnoće někak dweju do třoch miliardow eurow. Koncern wjedźe hižo dlěši čas rozmołwy ze wšelakimi zajimcami. To su mjez druhim pólske energijowe předewzaće Polska Grupa Energetyczna (PGE), němski koncern Steag kaž tež čěskej koncernaj České energetické závody (CEZ) a Energetycký a průmyslový holding (EPH), kotremuž słuša srjedźoněmska brunicowa towaršnosć Mibrag. Nětko je so jako zajimča tež šwedska wotnožka wobswětoškitneje organizacije Greenpeace přidružiła.
Kamjenc – stolica lochkich lětadłow
Kamjenc ma so ze swojim lětanišćom wuwić na srjedźišćo předewzaćelskeje syće lětanja z lochkimi lětadłami. Kamjenski lětarski klub ma tole jako wobhospodarjer lětanišća přewodźeć.
Předewzaća z Kamjenca a wokoliny zjednoćeja mnohe lětarske kompetency w swojich rjadach. Wot naćiska a twara lětanišćow přez wukubłanje a logistiku hač k zhotowjenju lětadłow je nimale wšitko zastupjene.
„Što je bliže hač wutworić syć, kotraž inowatiwne projekty zwoprawdźa a synergije při wopyće wikow a w marketingu nastorči“, rozjasni Peter Pfeiffer z Kamjenskeho lětarskeho kluba, kotryž lětanišćo wobhospodarja. Tež pomjenowanje dotal hišće njekruty zwjazk hižo ma: „Saxony light flight system“ (Sakski lochkolětarski system).
Mjez pjatnaće załoženskimi čłonami je tež Budyski lětarski sportowy centrum, kotrehož pomjenowanje zamyla. Towarstwo ma hižo wot lěta 2008 swoje sydło w Kamjencu, byrnjež so w Budyšinje załožiło.
Tójšto wosobinskich datow našli
Böblingen (dpa/SN). Wosobinske fota, stare mejlki, powěsće a lisćiny, z kim sy wšitko telefonował – wšo to su fachowcy za wuchowanje datow namakali, jako sej trjebane datowe nošaki a mobilne telefony wobhladachu, kotrež běchu na předań. Při tym bě kóždy druhi něhdyši wobsedźer woprawdźe spytał wšitke daty zhašeć, zdźěli Kroll Ontrack, jedna z fachowych firmow powěsćerni dpa. Tola tale próca běše njewuspěšna.
Za probu bě firma cyłkownje 122 trjebanych nastrojow pola Amazon, eBay a dalšich poskićowarjow kupiła. Najebać pospytane zhašenje datow přez něhdyšich wužiwarjow zamóchu při 48 procentach wšěch składowanskich platow a při 35 procentach mobilnych telefonow hišće daty nadeńć. Te móhli internetni kriminelni znjewužiwać. W dwěmaj telefonomaj wuslědźichu na zakładźe datow samo mjeno něhdyšeho wobsedźerja.
