Wažne žórło inowacijow a idejow
Budyšin (SN/JK). Wažna institucija hospodarskeho regiona wuchodneje Sakskeje, Technologiske a załožerske srjedźišćo (TGZ), wobsteji 20 lět. Składnostnje jubilejneho zarjadowanja hódnoćachu dźensa zastupnicy politiki, hospodarstwa a wědomosće dźěło zarjadnišća na dobro hospodarskeho wuwića Sakskeje.
Korektura budźe
Berlin (SN/JK). Plany k zniženju wustorkowanja wuhlikoweho dioksida (CO2) z łužiskich milinarnjow so po móžnosći předźěłaja. To je wuslědk zetkanja načolnych politikarjow srjedu wječor w Berlinje. Po informacijach z knježerstwowych kruhow je hospodarski minister Sigmar Gabriel (SPD) wot zwjazkoweje kanclerki Angele Merkel (CDU) dóstał nadawk, nowy plan k zniženju wupuchow CO2 předpołožić. Po informacijach sćelaka MDR dźe při tym nimo dodźerženja klimoškitnych zaměrow wo zachowanje dźěłowych městnow we łužiskich milinarnjach a wuhlowych jamach.
Hospodarski minister Sigmar Gabriel budźe přichodne dny z hospodarskimi ministrami zwjazkowych krajow kaž tež dźěłarnistwami a zawodnymi radami wo móžnych změnach diskutować. Šef SPD je ke kompromisam a přilubjenjam zwólniwy.
Padnje rozsud?
Budyšin/Berlin (SN/JK). Za dźensa wječor je kanclerka Angela Merkel (CDU) na brunicowy wjeršk do Berlina přeprosyła. Mjez druhim póńdźe wo hižo dlěje diskutowany popłatk za stare milinarnje w zwisku z němskimi klimoškitnymi zaměrami. Hač powjedźe wjeršk k nowym dopóznaćam a so hižo raz korigowane ličby hospodarskeho ministra Sigmara Gabriela (SPD) dale změnja, njeje wěste.
Dotalne ličby njejsu kmane, potrjechenych we Łužicy změrować. Łužiska wobwodna nawodnica dźěłarnistwa hórnistwo, chemija a energija Ute Liebsch widźi to takle:„Z nowymi namjetami njeje pokuta za stare milinarnje hišće z blida. Strach wo tysacy dźěłowych městnow w milinarnjach a jamach dale wobsteji.“ Podobnje posudźuje René Šuster, čłon braniborskeho brunicoweho wuběrka. „Redukowanje wupucha wuhlikoweho dioksida ma so na cyłu Němsku rozdźělić. Tohodla njeliču z tym, zo so milinarnje zrazom wšitke ze syće wozmu. Skerje dyrbjeli so potrjechene bloki poměrnje jedyn po druhim wotšaltować, štož by strukturnu změnu wolóžiło.“ Hač k tomu dźensa rozsud padnje?
Nowy poskitk
Zwoprawdźa ideje druhich a ma tež swójske
W Kukowje na Chróšćanskej dróze wabi nimojěduceho wulki, z mamutoweho štoma rězbarjeny worjoł k pozastaću. Nimo toho wuhladaš tam z kreatiwnymi idejemi wuhotowanu zahrodu z přirodnych twaršćiznow, přewažnje ze zornowca a z drjewa z domjacych lěsow. Wšo, štož tam nańdźeš a widźiš, je nastało po ideji 30lětneho Měrćina Krala, kiž tam ze swójbu z třomi dźěćimi bydli. Runočasnje pak je to wizitka młodeho muža z wušiknymaj rukomaj a z přewšo tworićelskimi idejemi, kotryž je so spočatk zašłeho měsaca zesamostatnił.
Móžnosće hospodarskeho wuwića Budyskeho wokrjesa nazornje ...
Prof. Georg Milbradt je fachowc w hospodarskich naležnosćach. Na Drježdźanskej Techniskej uniwersiće k tomu přednošuje. W Budyšinje porěča wón wo šansach předewzaćelow wokrjesa.
Budyšin. Kandidat CDU za wólby wyšeho měšćanosty Budyšina Matthias Knaak přeprosy njedawno na hospodarski forum z bywšim sakskim ministerskim prezidentom prof. dr. Georgom Milbradtom. K zazběhej foruma předstaji Knaak swój wólbny program. Polěpšić chce w prěnim rjedźe wuměnjenja zasydlenja a rozšěrjenja předewzaćow a zjednorić zarjadniske dźěło jako wuměnjenje toho. Młodźi ludźo, wosebje fachowcy měli so přez wjetšu atraktiwitu Budyšina nawabić.
Łužiski hromak požadany
Ratarske zawody woblubowanu zeleninu žnjeć počeli
Budyšin (SN/JK). Sakski ratarski minister Thomas Schmidt (CDU) je w zawodźe Agrar GbR Naundörfel w Mišnjanskim wokrjesu tak mjenowanu „Nieschützsku milu“ wotewrěł. Při tej składnosći wuspyta so sam při kałanju hromaka. „Sakski hromak ze swojimi wurjadnymi kajkosćemi lubi tež lětsa zaso wulki apetit“, minister rjekny a pominaše Saksow, sej wědomje hromak z regiona popřewać. Nieschützski ratarski zawod, kotrehož hromakowe pola bjezposrědnje při kolesowarskej šćežce podłu Łobja leža, poskića nimo běłeho tež zeleny hromak. 19 sakskich zawodow wočakuje lětsa cyłkowny wunošk něhdźe 1 000 tonow hromaka. Tón wšak wostanje přewažnje w kraju a kryje 15 proc. zeleninoweje potrjeby.
Čertowa brunica
Budyšin (SN/JK). Štó je za to zamołwity, organizować strukturnu změnu we Łužicy?
Zapósłancy SPD z nowych zwjazkowych krajow w Zwjazkowym sejmje měnja: zwjazkowe knježerstwo. W rezoluciji warnuja woni před njepředwidźomnymi sćěhami za region, zdobom strukturnu změnu přiznawajo. Hladajo na žadany popłatk za stare milinarnje měli so nowe puće k docpěću klimoškitnych zaměrow kročić. Wědomostnica Němskeho instituta za hospodarske slědźenje (DIW) prof. Claudia Kemfert wupraji so wčera w telewizijnym wusyłanju MDR „Fakt ist ...!“ za podobnu pomoc łužiskimu regionej kaž w Sewjerorynsko-Westfalskej. Zdobom žada sej, zo Vattenfall swoju zamołwitosć we Łužicy hač do kónca spjelni, mějo za strukturnu změnu kompetencu. Hač zamołwići politikarjo w Berlinje wuskutki brunicoweje debaty scyła znaja, na tym wyši měšćanosta Torsten Pötzsch (Klartext) z Běłeje Wody dwěluje a zjima wokomiknitu situaciju mnohich potrjechenych w regionje: „Stejimy před črjopami našeho swójbneho a powołanskeho žiwjenskeho planowanja.“
Energiju lutować
Budyšin (SN/JK). Jako dźěl energijoweho regiona Łužicy ma so Budyski wokrjes najebać modernu industriju napinać, energijowe a klimopolitiske zaměry Němskeje sobu zwoprawdźić. Staw přesadźenja wokrjesneje energijoweje politiki je krajny rada Michael Harig (CDU) dźensa w Budyšinje rozłožił.
„Při prócowanju, přetrjebu energije pomjeńšić a wobnowjomne energije wužiwać, njesměmy hospodarski wunošk za region z wočow zhubić“, rjekny krajny rada pokazujo na to, kak móhli předewzaća a rjemjesło regiona energijowu změnu na hospodarske dobro wokrjesa wužić. Energijowa politika je na to wusměrjena, energiju zmysłapołnje zasadźić, resursy lutować a milinu eficientnje wužiwać. Lěta 2012 załožena energijowa agentura wokrjesa ma energijowu politiku wokrjesa zwoprawdźić a wobydlerjow kaž tež předewzaća k energetiskim prašenjam twarjenja a tepjenskich připrawow poradźować. Zhromadnje z hospodarstwom pytaja za móžnosćemi, energiju eficientnje wužiwać. Aktualny projekt AgroFoRNet je na energetiske wužiwanje drjewa wusměrjeny.
Myta spožčili
Derbno (SN/JK). Hospodarska iniciatiwa Łužicy (WiL) je myto za hospodarski transfer we wobjimje 10 000 eurow spožčiła třom projektam regiona. Zastupjerjo předewzaćow a Braniborskeje techniskeje uniwersity Choćebuz-Zły Komorow (BTU) přiwzachu myta póndźelu w Derbnje. Dźesać předewzaćow a štyri wědomostne institucije běchu sydom projektow zapodali. Prěnje myto 5 000 eurow spožčichu projektej „Slědźenje a wuwiwanje nowych móžnosćow k awtomatiskemu a fleksibelnemu zhotowjenju z cementom wjazanych balkonowych platow“ slědźenskeho wotrjada produkciskeho hospodarstwa BTU. Studenća elektrotechniki na Budyskej studijnej akademiji běchu so ze zhromadnym projektom z předewzaćom ATN Hölzel z Wopakeje wo myto požadali.
Do přepodaća mytow wuzwoli WiL nowe předsydstwo. Na čłonskej zhromadźiznje wuzwolichu třoch nowych sobustawow. Dalši čłonojo předsydstwa buchu w zastojnstwje wobkrućeni. Předsyda WiL wostanje Michael von Bronk, kiž přeje sej dale konstruktiwne dźěło na dobro łužiskeho hospodarstwa.
