21 namjetow
Budyšin (SN/JaW). Marketingowa towaršnosć Hornja Łužica-Delnja Šleska (MGO) je lětsa cyłkownje 21 namjetow za Hornjołužiske předewzaćelske myto wokrjesow Zhorjelc a Budyšin dóstała. To zdźěli naměstnik jednaćela MGO Christoph Pilz. „Jury změje tójšto dźěła, z namjetowanych dobyćerjow wuzwolić. Dohromady je jich 17, zdźěla tež wjacekróć namjetowanych předewzaćow. A wšitke su sej to zawěsće zasłužili cyle prědku stać“, zwurazni Pilz swoje wjeselo nad wulkim zajimom wo myto.
Nadrobnosće wo nominowanych firmach pak nochce MGO hišće wozjewić. Tak njeje jasne, hač su mjez nimi tež serbske zawody. Spočatk awgusta jury prěni raz wuradźuje. Hač do 2. septembra maja dobyćerjo pomjenowani być. Hižo dźeń pozdźišo chce MGO we wobłuku lětušeho Dnja Saksow w Lubiju wšitkich třoch mytowanych Hornjołužiskeho předewzaćelskeho myta zjawnosći předstajić. Tak profituja zawody z wosebiteho ramika a nadregionalneho wuprudźenja najwjetšeho ludoweho swjedźenja Sakskeje, rěka z běrowa marketingoweje towaršnosće.
Spěchuja busy
Budyšin/Drježdźany (SN/JaW). Sakske statne ministerstwo za hospodarstwo, dźěło a wobchad přewostaiji wozydłownistwu Regionalny bus Hornja Łužica něšto wjac hač milion eurow. Spěchowanje dyrbi firma za nakup dźesać standardnych linijowych busuow kaž tež dweju linijoweju busow ze zhibadłom nałožić. Wo tym informuje ministerstwo w nowinskej informaciji. Dale ze zdźělenki wuchadźa, zo maja wšitke jězdźidła bjezbarjerne być a wotpłunowu normu Euro VI spjelnić.
80procentowske spěchowanje projekta přewostaja Sakska we wobłuku polěpšenja wuměnjenjow zjawneho bliskowobchada. „Lětsa přewostajimy cyłkownje 130 milionow eurow za inwesticije do bliskowobchada. Z toho ma tež Hornja Łužica profitować“, rjekny sakski wobchadny minister Martin Dulig (SPD). „Naprawa přinošuje k atraktiwnemu a přijomnemu poskitkej w bliskowobchadźe a polěpši wobchadne wuměnjenja“, wobkrući Dulig rozsud ministerstwa. Regionalny bus Hornja Łužica zawěsća bliskowobchad we wokrjesomaj Budyšin a Zhorjelc.
Homann přińdźe
Drježdźany/Leppersdorf (SN/JaW). Zhotowjer žiwidłow Homann budźe wot lěta 2020 w Leppersdorfje produkować. To je rěčnik luxemburgskeje koncernoweje skupiny Theo Müller, kotrejž Homann přisłuša, Alexander Truhlar medijam zdźělił. Kaž we wozjewjenju dale rěka, chce koncern za kompletnje nowe stejnišćo njedaloko Drježdźan 500 milionow eurow nałožić. 800 dźěłowych městnow ma w nowym žiwidłowym zawodźe nastać. Rozsud za Saksku pak ma tež wěsty přisłód. Kaž Müller-koncern zdobom zdźěli, planuje wón najprjedy raz štyri stejnišća w zapadnych zwjazkowych krajach zawrěć. Dalše slěduja potom z wutwarom Leppersdorfskeho stejnišća, kaž koncern připowědźi.
Sakska a předewšěm hospodarski minister Martin Dulig (SPD) rozsud Homann, so w Leppersdorfje zasydlić, witataj. „Swobodnemu statej a předewšěm wuchodosakskemu regionej je to pozitiwny signal a rěči za atraktiwitu hospodarskeho stejnišća Sakskeje“, rjekny Dulig. Zdobom zwurazni swoju nadźiju, zo so zasydlenje tohorunja pozitiwnje na dźěłowe městna w regionje wuwije.
Turistiski region rozšěrić
Zaměrowy zwjazk Łužiska jězorina dotalne dźěło bilancował
Hamor (AK/SN). Přez mjezy kraja skutkowacy turistiski zwjazk Łužiska jězorina je minjene pjeć lět cyle zaměrnje za domjacy dowolowy region wabił. „Wot lěta 2012 smy so na 46 wikach ze swójskim informaciskim stejnišćom wobdźělili. Na dalšich 32 wikach wobdźělichmy so zhromadnje z partnerami.“ Tole zdźěli zastupowacy jednaćel zwjazka Marcus Heberle na minjenym posedźenju zaměroweho zwjazka Łužiska jězorina. Mjez wosebje wažnymi terminami běchu lětsa Drježdźanske pućowanske wiki, Kamjenske WIR, Praske For bike a Wojerowske jězorinowe wiki.
Mjeztym wobhospodarja zwjazk tež turistiskej informaciji w Złym Komorowje a we Wojerecach. „Wojerowska je wosebje wažna, dokelž leži wosrjedź jězoriny. Wona je přijomna, derje wuhotowana a hišće moderniša hač ta w Złym Komorowje“, rjekny Heberle.
Zawodaj z perspektiwu
Bombardier skónčnje koncept přichoda předstajił
Budyšin/Zhorjelc (SN/BŠe). Po dołhim čakanju je kanadiski koncern Bombardier wčera w Hennigsdorfje přichodny koncept němskich stejnišćow, mjez druhim zawodow w Budyšinje a Zhorjelcu, wozjewił. Kaž šef Bombardiera w Němskej Michael Fohrer zdźěli, je postupowanje nuznje trěbne, wšako dyrbi so koncern na přichod wusměrić. 2 200 swojich 8 500 dźěłowych městnow po cyłej Němskej chce w běhu přichodnych třoch lět wotstronić. Pozadk noweho koncepta je, zo su dochody minjene pjeć lět masiwnje woteběrali.
Zastanišća jednotne wuhotować
Dypkownje k prózdninam zetkachu so radźićeljo wobchadneho zaměroweho zwjazka Hornja Łužica-Delnja Šleska (ZVON) a wobchadneho zwjazka VVO wčera w Budyšinje. Na dnjowym porjedźe steješe nimo etata 2017 tež prašenje, kak zastanišća lěpje wuhotować.
Budyšin (SN/BŠe). Jednohłósnje wuprajichu so radźićeljo wobchadneho zaměroweho zwjazka (ZVON) za to, na zastanišćach jednotne znamješka wužiwać. „Na jednym boku dźe wo funkciju zastanišća, na tamnym wo wuhotowanje“, podšmórny předsyda ZVON, Budyski krajny rada Michael Harig (CDU), na zhromadnym wuradźowanju z wobchadnym zwjazkom VVO wčera w Budyšinje. Wonkowny napohlad zastanišćow dźě ludźi wobwliwuje, hač je wužiwaja. Zdobom měł so bjezbarjerny přistup wobkedźbować. Kak daloko budźe serbska rěč na znamješkach zapřijata, njeje dotal jasne.
Ze susodom „so ženić“
Budyšin (UM/SN). Zo móhli ideje turistikarjow dale rozšěrić, sadźa Marketingowa towaršnosć Hornja Łužica-Delnja Šleska (MGO) dale a bóle na zhromadne dźěło z čěskimi partnerami. Tak je MGO ze zwjazkarstwom „Novoborsko“ projekt z mjenom „žeńtwa“ nastorčił. „Zaměr je, zo projektni nošerjo wobeju krajow na zakładźe idejow, kotrež so derje hromadźe hodźa, kooperuja“, rozjasnja jednaćel MGO Olaf Franke. Tohodla je marketingowa towaršnosć na swojej internetnej stronje formular wozjewiła, z kotrehož pomocu móža turistikarjo projekty krótko rozłožić.
Wjeršk „žeńtwy“ ze susodom budźe 5. septembra w Großschönauwje, hdźež chcedźa 40 zapodatych idejow předstajić. Spěchować maja wone němsko-čěske zhromadne dźěło euroregiona Nysa.
„Zwjazkarstwo Novoborsko wobsteji ze štyrjoch městow a 14 gmejnow pomjezneho regiona. Zwjazkarstwo ma zaměr tradicionalnu turistisku kónčinu Łužiske hory atraktiwnišu sčinić“, zdźěli managerka Jana Nastoupilová.
Dźeń a mjenje kontrolow
Dźěłarnistwo kritizuje „składnostne wopyty“ cłownikow na twarnišćach
Drježdźany (SN/MkWj). Twarscy předewzaćeljo w Budyskim wokrjesu dyrbja dźeń a mjenje z tym ličić, zo cłownicy jich twarnišća přepruwuja. W cyłkownym wobłuku Drježdźanskeho hłowneho cłowneho zarjada su zastojnicy loni runje 388 twarskich zawodow kontrolowali. To je jědnaće procentow mjenje hač lěto do toho. Přirunujo z přepruwowanjemi, kotrež su hišće lěta 2014 přewjedli, je to samo 40procentowski spad, kaž industrijne dźěłarnistwo twar-ratarstwo-wobswět w nowinskej zdźělence informuje. Wuchodosakske industrijne dźěłarnistwo za twarstwo rěči w tym zwisku wo „njedostatkach při kontrolach“.
Wšitko swój čas traje
Liča z přerěznymi žnjemi
Rozmołwa sakskich ratarjow z ministrom Thomasom Schmidtom
Hlina (AK/SN). Sakscy ratarjo liča lětsa ze solidnymi a přerěznymi žnjemi. „Pola nazymskeho ječmjenja drje budźe to samsny wunošk kaž loni. Jara ćerpjeła pak je pšeńca“, rjekny Wolfgang Vogel, prezident Zwjazka sakskich ratarjow, minjeny štwórtk we wobłuku „žnjoweje rozmołwy na kromje pola“ z burami a sakskim ministrom za ratarstwo a přirodu Thomasom Schmidtom (CDU). Chłódne nalěćo z pózdnimi zmjerzkami je wuwiće žita haćiło. W meji a juniju padny jenož poł telko dešća kaž hewak. „Bohužel jewja so na lochkich pódach w sewjernej a wuchodnej Sakskej widźomne škody suchoty dla. Tam dyrbimy tuž ze stratami ličić“, Vogel potwjerdźi. W tamnych kónčinach Sakskeje porno tomu z toho wuchadźeja, zo změja lětsa přerězne abo samo dobre žně.
