Bjez aktiwneje politiki njeńdźe
Łužiska papjera mjenuje formulu „Gigawatt za gigawatt“ směrodajnu
Choćebuz (SN/at). Tak mjenowanu „Łužisku papjeru“ (Lausitz-Papier) staj dr. Hans Rüdiger Lange, jednaćel inowaciskeho regiona Łužica tzwr, a dr. Wolfgang Krüger, hłowny jednaćel Choćebuskeje industrijneje a wikowanskeje komory, tele dny k strukturnej změnje we Łužicy předpołožiłoj. „Material je předłoha k diskusiji a nima narok na dospołnosć“, rjeknyštaj awtoraj našemu wječornikej. Wonaj wuzběhnyštaj zasadny poćah na cyłkownu Łužicu. Namjetaj nastupajo rosćace wiki elektromobility z wusměrjenjom na łužisku jězorinu abo tež k wuwiću infrastruktury w třiróžku Berlin-Drježdźany-Lipsk tomu wotpowědujetej. „Wšitkim je jasne, zo hodźi so łužiska strukturna změna jenož přez krajnu mjezu zmištrować“, staj sej awtoraj wěstaj. Jenož wysokohódne dźěłowe městna zawěsćeja trěbne wutworjenje hódnotow. Lange a Krüger mataj łužisku formulu „Gigawatt za gigawatt“ za směrodajnu.
Wosmy raz zhromadnje so předstajili
Posledni kónc tydźenja januara je kruty termin Choćebuskeje rjemjeslniskeje přehladki. Na 27. pokazce je so sobotu a njedźelu nimale 300 wustajerjow prezentowało. Za Zwjazk serbskich rjemjeslnikow a předewzaćelow z. t. (ZSRP) je to wažny termin.
Choćebuz (dku/SN). Wosmy raz wobdźěli so ZSRP ze zhromadnym stejnišćom delnjoserbskich firmownikow pod módro-čerwjeno-běłej chorhoju na tutej tradicionalnej Choćebuskej fachowej přehladce.
Problem styropora jenož wotsunjeny
Kónc decembra je zwjazkowe knježerstwo w Berlinje rozsudźiło, změnu ekosměrnicy Europskeje unije wo lěto wusadźić. Wulke wolóženje to za twarske předewzaća, ale problem wostanje.
Budyšin/Radwor (SN/BŠe). Nowa směrnica Europskeje unije nastupajo twarsku maćiznu HBCD, kotruž nańdźeš w styroporje, rjemjeslnikow hižo wot oktobra chětro wobćežuje. Srědk, kotryž móže spěšnje palacy styropor před płomjenjemi škitać, ma Europska unija nětko za jědojtu. Tuž su ekosměrnicu krótkodobnje změnili, a to z konsekwancami.
We wulkim mnóstwje běchu twarske firmy styropor jako wonkownu izolaciju twarjenjow wužiwali. Su z nim domy prawdźepodobnje zapakowali. Stajnje nowe změny a prawidła ćopłotneho škita sej to prosće žadachu. Mjeztym wšak styropor hižo tak njewužiwaja, ale druhe maćizny, kaž na přikład mineralnu wołmu. Woprawdźe dobre a zapłaćomne alternatiwy twarcy tuchwilu přiwšěm nimaja. Nimo toho njeje styropor trajny, zo maja so chěže po wěstym času ponowić.
TVO ma nowe předsydstwo
W Radušu wotměja 14. žnjowodźakny swjedźeń
Wjeršk w Braniborskej je kóžde lěto žnjowodźakny swjedźeń kraja. Na Zelenym tydźenju w Berlinje su Radušenjo wčera oficialnu zamołwitosć dóstali, lětuši swjatk wuhotować.
Berlin (HA/SN). „Sće hižo nětko do Raduša wutrobnje witani.“ Takle je wjesny chronist Raduša Manfred Klicha wčera w braniborskej hali na Berlinskim Zelenym tydźenju ludźi zbliska a zdaloka na 14. centralny Braniborski žnjowodźakny swjedźeń přeprosył. 9. a 10. septembra jón w němsko-serbskej wsy přewjedu. Přepodaće stafloweho staba wuhotowarjej žnjoweho swjedźenja 2017 bě jedyn z wjerškow w braniborskej hali na najwjetšej ratarskej wustajeńcy swěta.
Wjele tysac přihladowarjow je wčera dožiwiło, kak zastupjer gmejny Steinhöfel blisko Frankfurta nad Wódru, kotraž bě loni 13. nakład žnjowodźakneho swjedźenja wuhotowała, Radušanam zamołwitosć zarjadowanja oficialnje přepoda. Z teje přičiny njejsu do Berlina jenož Radušenjo přijěli, ale tež wobydlerjo Wětošowa a krajny rada wokrjesa Hornje Błóta-Łužica Siegurd Heinze (njestronjan).
Čorna kniha z wulkej brizancu
Sto dnjow po předani łužiskeje brunicoweje sparty čěskemu inwestorej EPH předpołoži wobswětowa organizacija Greenpeace koncernej nowu wersiju čorneje knihi, kotraž wopřijima interne dokumenty, hospodarske rozprawy a rozmołwne protokole braniborskeho hospodarskeho ministerstwa.
Budyšin (SN/BŠe). Čorna kniha wo nowym mějićelu łužiskeje brunicoweje sparty skići mnohe brizantne temy. Tak předleža wudawaćelej knihi Greenpeace dokumenty, kotrež dopokazuja, zo měješe braniborske hospodarske ministerstwo hižo zahe zwiski k předewzaću EPH. Wězo steji brunicowa industrija pod wulkim ćišćom. Niske płaćizny za brunicowu milinu a klimoškitne zaměry zwjazkoweho knježerstwa, hdźež je dołhodobny kónc brunicoweho zmilinjenja předwidźany, njejsu runjewon dobry zakład za přichod łužiskeje wuhloweje sparty. Přiwšěm je ju čěski koncern wot Vattenfalla přewzał a dósta samo hišće rezerwy we wobjimje 1,7 miliardow eurow, myslene za rekultiwowanje krajiny.
Přehladka z rekordom
Drježdźany (SN/BŠe). 492 wustajerjow – telko kaž hišće nihdy – předstaji a rozłoži wot jutřišeho do njedźele zajimcam na wikach „KarriereStart“ w Drježdźanach najwšelakoriše powołanske móžnosće. Wot industrije přez rjemjeslnistwo, medije, wikowanje, posłužby, medicinu abo hladanje budu tam wšitke wobłuki zastupjene. Za młodostnych je to tuž optimalna šansa, wo powołanjach a perspektiwach so informować. Z Łužicy wobdźěli so Budyski powołanskošulski centrum za techniku a hospodarstwo. Tež Kamjenski powołanskošulski centrum, hdźež poskićeja fachowe wukubłanje drjewoweje techniki, budźe mjez wustajerjemi. Dale podadźa so zamołwići Budyskeje studijneje akademije do Drježdźan. Z Delnjeje Łužicy změje Braniborska techniska uniwersita Choćebuz-Zły Komorow stejnišćo na přehladce. Štož medicinski a hladanski wobłuk nastupa, pokazaja Hornjołužiske kliniki na bohaty powołanski poskitk. Dale chcetej wuspěšne předewzaće iteligence, kotrež ma sydło mjez druhim w Słonej Boršći, a Kulowski zawod Maja młodostnym powołanske móžnosće rozjasnić.
Wjesela so na rozmołwy
Berlin (SN/BŠe). Wjac hač połojca z cyłkownje 34 sakskich wustajerjow na lětušim Zelenym tydźenju je z Hornjeje Łužicy. Hižo mnohe lěta wobdźěla so na přehladce předewzaće Komet ze sydłom w Budestecach. Tež Wjazońčanska firma, kotraž cwibak zhotowja, Lubijska piwarnja Bergquell, Wósporski swójbny zawod Geha a Budyska rězniska firma Meisters su mjez wustajerjemi.
Chcedźa stawk dale rozšěrić
Zhorjelc (SN). Čłonojo dźěłarnistwa IG metal, kotřiž su w Zhorjelskim zawodźe Bombardiera přistajeni, diskutowachu wčera wo protestnych akcijach, zo bychu ćišć na nawodnistwo kanadiskeho koncerna wukonjeli. Tón bě kónc minjeneho lěta připowědźił, 5 000 dźěłowych městnow po cyłym swěće, mjez druhim tež w Zhorjelcu, wotstronić. „Hač do měrca chcemy z koncernom wo zawěsćenju produkciskeho stejnišća diskutować. Jeli njekooperuje, pokazamy jemu čerwjenu kartu“, podšmórny wčera šef IG metal wuchodneje Sakskeje Jan Otto.
Sobustawajo dźěłarnistwa tłóča na bórzomne rozrisanje. Wjacori jara dobri fachowcy pytaja hižo za druhim dźěłowym městnom, štož njemóže sej zawod dowolić. Tohodla su sej přistajeni přezjedni, stawk dale rozšěrić.
Jutře chce so šef Němskeho zwjazka dźěłarnistwow Reiner Hoffmann w Budyskim zawodźe Bombardier wo aktualnym połoženju wobhonić.
Předewzaćeljo předstajaswoje rjemjesła
Na fachowej přehladce rjemjeslnikow 28. a 29. januara w Choćebuzu předstaji so znowa wjele serbskich předewzaćow z Delnjeje a Hornjeje Łužicy. Pokazać chcedźa tam stare rjemjesła runje tak kaž nowu techniku.
Choćebuz (SN/BŠe). Fachowu kompetencu z najwšelakorišimi rjemjeslniskimi posłužbami skići wopytowarjam tež lětša přehladka rjemjeslnikow kónc januara w Choćebuzu. Tak předstaja předewzaćeljo ze wšelakorych wobłukow swoje sylnosće a zajimcow rady wosobinsce poradźuja. Firmownicy prezentuja na wikach tež rjemjeslniske wuměłstwo. Tajke pokazaja lětsa tohorunja serbskorěčne zawody. Z Hornjeje Łužicy budźe tam Wotrowska Wjenkec blidarnja zastupjena. Dale wobdźěli so kachlestajer a kachlicykładźer Šćěpan Čornak z Konjec, kiž změje zhromadne stejnišćo z mějićelom Wulkodubrawskeho kuchinskeho studija Křesćanom Šnajderom.
