Budyšin (SN/at). Łužiska ćišćernja w Budyšinje je insolwencu přizjewiła, dokelž hrožeše njekmanosć płaćenja. Drježdźanske hamtske sudnistwo je wutoru, 13. junija, próstwje předewzaća wo samozarjadowane insolwencne jednanje wotpowědowało a zdobom wupruwowaneho fachowca za saněrowanje firmow, prawiznika dr. Martina Dietricha, za społnomócnjeneho powołało. Jednaćelstwo je sobudźěłaćerjow wčera wo połoženju informowało. Produkcija běži dale. Tež Serbske Nowiny dale tam ćišća. Mzdu płaća přistajenym a sobudźěłarjam přichodne tři měsacy z insolwencnych pjenjez Zwjazkoweje agentury za dźěło.

Wobstejacych nadkapacitow dla je so Łužiska ćišćernja krótkodobnje do financnych ćežow dóstała. Za zwoprawdźenje saněrowanskeje koncepcije pak trjebaja wjace časa, rjekny jednaćel Robert Czyzowski. Tohodla je jednaćelstwo minjene tydźenje intensiwnje z wěrićelemi a wulkokupcami rěčało. Tući pak mějachu rozdźělne měnjenja, tak zo hrožeše njekmanosć płaćenja. Wupuć bě, po konsultaciji fachowcow zapodać próstwu, saněrowanje w swójskej režiji přewjesć.

Politiku sakskeho knježerstwa z Braniborskej nastupajo strukturnu změnu we łužiskim brunicowym rewěrje kaž tež wobłuk energije je statny minister dr. Fritz Jaeckel (CDU), nawoda sakskeje statneje kenclije, na 17. srjedźostawskim dnju rozrostoweho regiona Drježdźany Zwjazkoweho zjednoćenstwa srjedźostawskeho hospodarstwa (BVMW) wčera w Biskopicach rozłožił.

Biskopicy (SN/at). Nimale hač do lěta 2047 maja milinarnje a brunicowe jamy we wobłuku tak mjenowaneje přechodneje fazy wěstotu, w kraju produkować směć. To wuwjedźe sakski statny minister dr. Jaeckel, kiž bě na dnju zhromadneho kabinetneho posedźenja braniborskeho a sakskeho knježerstwa w Ranju do Biskopic přijěł. Nětko ma so čas wužić, tež ze srědkami Zwjazka nowe struktury za dobu po brunicy wuwić. Fritz Jaeckel mjenowaše tu za projekty sumu 1,2 miliardow eurow, kotrež žadatej sej Braniborska a Sakska hač do lěta 2024.