Budyšin (SN/MiR). Čitanske wubědźowanje Rěčneho centruma WITAJ minjenu sobotu w Budyskej Smolerjec kniharni je Chróšćanskej Serbskej zakładnej šuli „Jurij Chěžka“ wunjesło wosebite hódnoćenje. Wšako staj šulerjej z tohole kubłanišća wubědźowanje wo lětušeju najlěpšeju čitarjow 3. lětnika dobyłoj. W skupinje A1, to su maćernorěčni šulerjo, je to był Milan Jurk a w skupinje A2, su to šulerjo z němsce rěčacych swójbow, je to była Emely Młynkec. Wobaj dóstaštaj, runja wšitkim dalšim wobdźělnikam, wopismo a knihu a k tomu knižny šek, za kotryž móžetaj sej wonaj w Smolerjec kniharni kupić knihu po swójskim słodźe. Wšitcy šulerjo ze skupiny A1 wjeselachu so nad knihu „Serbske powěsće“, ći ze skupiny A2 pak nad knihu „Babka pčołka“.

Sej kuzło wotkryć

wutora, 17. apryla 2018 spisane wot:
Dźensa hladaja hižo dźěći husto do swojeho smartphona. Kuzło čitanja w knihach pak so zhubiło njeje. Jedyn dopokaz za to je kóždolětne čitanske wubědźowanje ­Rěčneho centruma WITAJ. Pozbudźace ­lětsa běše, z kelko wšelakich dźěćacych knihow wobdźělnicy čitachu a kelko awtorow bě w tymle hodźinomaj słyšeć. Za čo to rěči? Jako před něšto lětami wospjet rěkaše, zo wubjeru sej čitacy wosebje knihi, kotrež powědaja wo wrobliku a jeho přećelach, tak je so spektrum mjeztym rozšěrił. Lětsa běchu 24 wobdźělnicy wujimki z dwanaće knihow přednjesli a z tym zasłyšachu přitomni jědnaće wšelakich awtorow. Wuhotowarjo wubědźowanja kóžde lěto zwěsća, zo je mjez spisowaćelemi jenož zrědka Jurij Brězan. Tuž je derje, zo maja serbscy wobdźělnicy přidatnje z jeho knihi „Rifko“ čitać. Snano by derje było, ­šulerjam darić tule knihu, zo bychu sej ­dalše kuzło wotkryli. Milenka Rječcyna

Třeće městno sej wubědźił

pjatk, 13. apryla 2018 spisane wot:
Jahannes Cyž (naprawo) a Syman Handrik, šulerjej 9. lětnika Serbskeje wyšeje šule „Michał Hórnik“ Worklecy, běštaj so wčera w Drježdźanach na wurisanju šulskeho předmjeta hospodarstwo, technika a domjacnosć wobdźěliłoj. W Pančicach-Kukowje a Serbskich Pazlicach bydlacaj staj so tam mjez štyrnaće wobdźělnikami z cyłeje Sakskeje wubědźowałoj, předewšěm we wušiknosći, ale tež we wobchadźenju z techniku. Syman Handrik wobsadźi třeće městno. Wotměło je so cyłodnjowske zarjadowanje znowa na Drježdźanskej Techniskej uniwersiće. Foto: Tobias Bulank

Digitalna wučbnica online

štwórtk, 12. apryla 2018 spisane wot:

Bjez přidatneho spěchowanja projekt so zwoprawdźić njehodźał

Drježdźany (SN/MiR). Dwaj ministraj a jeju zawdatej ruce, k tomu błyskanje foto­aparatow a nimale něme šwórčenje telewizijnych kamerow – tajki bě zeleny štwórtk start za digitalny poskitk www.krokpokroku.sorbischlernen.de. Prěni přitomni hladachu w medijowym a wobydlerskim centrumje sakskeje statneje kenclije w Drježdźanach hnydom na swoje smartphony, hač je poskitk serbskorěčneje digitalneje wučbnicy woprawdźe swobodnje daty.

Wabja wjace Rusow a Ukrainjanow

štwórtk, 12. apryla 2018 spisane wot:

Frankfurt nad Wódru/Słubice (RD/SN). Europska uniwersita Viadrina w Frankfurće nad Wódru chce so wo wjace studowacych z Ruskeje a z Ukrainy prócować a tak přinošować k dorozumjenju mjez krajomaj. To wozjewi amtěrowacy prezident Viadriny prof. Stephan Kudert spočatk tydźenja na nowinarskej konferency k zahajenju lětnjeho semestra.

Na najwuchodnišej wysokej šuli Němskeje pochadźa něhdźe štwórćina nimale 6 000 studowacych z wukraja. Najwjetše skupiny su pólska (435), turkowska (121) a ukrainska (108). Ruscy studenća słušeja k zastupjerjam dalšich wjace hač sto krajow ze wšěch pjeć kontinentow swěta, kotrež jónkrótne studentstwo Viadriny wučinjeja. „Uniwersity politiku nječinja, mamy pak lětdźesatki trajace nazhonjenja w swětawotewrjenosći kaž tež wědomostne ćežišćo nastupajo konfliktny management“, Kudert wuzběhny. Wšě­dny dźeń na Viadrinje so nimo toho jewi, zo studowacy porno statam, z kotrychž pochadźeja, mjez sobu žane problemy nimaja.

Krok po kroku postupować

štwórtk, 12. apryla 2018 spisane wot:

Zapodaš-li internetnu adresu www.krokpokroku.sorbischlernen.de, wočini so ći na wobrazowce spodobny a přehladny digitalny poskitk po barbje a pismje. Štóž chce, móže tam hnydom swoje mjeno zapodać.

Tola tež bjez toho móže zajimc pokro­čować. Nětko woli rěč, w kotrejž chce so po produkće pohibować. Tuchwilu hodźi so poskitk w němčinje a hornjoserbšćinje wotwołać, pozdźišo ma delnjoserbska warianta k tomu přińć.

Team je wažny

štwórtk, 12. apryla 2018 spisane wot:
Drježdźany (SN/MiR). Jan Budar, direktor Załožby za serbski lud, předstaji w Drježdźanach projekt „Serbšćinu online wu­knyć“. Kurs za jeje nawuknjenje měri so wosebje na młodostnych a dorosćenych bjez znajomosćow serbskeje rěče. Wón bazuje na zhromadnym europskim ramiku za přiswo­jenje rěčow. Tuchwilu poskitk, kotryž w hornjoserbšćinje předleži, měsačnje wjace hač 650 zajimcow wu­žiwa. Atraktiwny je kurs­ wosebje přez žiwe powědančko, w kotrymž dožiwjataj protagonistaj zajimawych ludźi a žiwjenske situacije. 80 comicowych wobrazow a mnohe awdionatočenja wutworjeja za wužiwarja jara praktiski poměr k serb­šćinje. Zjimajo swój přednošk Jan Budar podšmórny: „Wažne je sej wot wšeho spočatka za tajki projekt natwarić team fachowcow, kotřiž hromadźe dźěłaja.“

Poskitk rozšěrili

štwórtk, 12. apryla 2018 spisane wot:
Budyšin (SN/MiR). Wědomostnica Budyskeho Serbskeho instituta dr. Sonja­ Wölkowa zaběraše so z programom, kotryž namaka zajimc pod www.soblex.de. Mysleny je program za serbšćinu wuknjacych z předznajo­mo­sćemi. Soblex dalše programy za nawu­knjenje abo wužiwanje serbšćiny wu­do­społnja. Zakładny za­měr­, měć za hor­njo­serbšćinu awtomatiske přepruwowanje prawopisa, je mjeztym dawno roz­šěrje­ny. W lěće 2016 móžachu wosebje za wobłuk kwalitneje kontrole z přidatnych srědkow Załožby za serbski lud za nowe medije dalšeho sobudźěłaćerja w serbskej wědomostnej instituciji při­stajić. Mjeztym stej do Soblexa nimo modula za awtomatisku prawopisnu kontrolu zapřijatej morfologiski generator kaž tež móžnosć, serbskorěčne teksty analyzować.

Chcedźa čitać

srjeda, 11. apryla 2018 spisane wot:

Budyšin (SN). Za lětuše 14. čitanske wubědźowanje Rěčneho centruma WITAJ je 23 dźěći přizjewjenych. Pod hesłom „Knihi su zastupny lisćik do raja fantazije“ wubědźuja so šulerjo 3. lětnika serbskich šulow a tajkich, kotrež po koncepće 2plus wuwučuja. Ludowe nakładnistwo Domowina je wospjet partner zamołwiteje za rěčne projekty w RCW Michaele Hrjehorjoweje. Wubědźowanje, kotrež ma zaměr, šulerjow hižo zahe k čitanju pohnuwać a jim bohatosć serbskeje literatury spřistupnić, budźe sobotu zaso w Budyskej Smolerjec kniharni.

W maćernorěčnej skupinje wobdźěli so dźesać šulerjow a 13, kotřiž wuknu serbšćinu jako druhu rěč. Wšitcy čitaja najprjedy před publikumom samowu­zwoleny tekst, kotryž su doma zwučo­wali. Maćernorěčni serbscy šulerjo čitaja na to dalši njeznaty tekst. Jury pod na­wodom wědomostneje sobudźěłaćerki RCW Manuele Smolineje přinoški wuhódnoći a najlěpšich čitarjow mytuje.

Nowy wupłód

pjatk, 06. apryla 2018 spisane wot:

Budyšin (SN). Aktualny wupłód z wulkoprojekta Załožby za serbski lud „Serbska rěč w nowych elektroniskich medijach“ je nowa hornjoserbska prawopisna kontrola. Za projekt wužiwa załožba přidatne srědki ze Sakskeje, Braniborskeje a Zwjazka. Zajimcy móža sej wotpowědny internetny poskitk z internetneje strony www.soblex.de na swójski ličak, tablet abo smartfone składować. Wužiwar nowšich­ wersijow programoweho paketa Microsoft Office ma podatu instrukciju sćěhować.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND