Překwapjenka w Delanach
Wot apryla wužiwa dźesać porow kibutow polo mjez Róžantom a Łazkom za hnězdźenje, lehnjenje a za to, swoje młodźata woćahnyć. Tam je tuchwilu najwjetše lehnišćo tejele družiny ptačkow po cyłej Sakskej.
Róžant (SN/MiR). Hižo srjedź měrca běchu jednaćelej spěchowanskeho towarstwa Sakskeje hladarnje ptačkow w Njeswačidło dr. Winfriedej Nachtigallej prěnje kibuty napadnyli. Wšako wone dosć wótře swoje ki-wit wołaja. Spočatk apryla běchu tam dwanaće kibutow wobkedźbowali, kónc apryla picowaše tam pjeć porow 17 młodźatow. Dalše štyri pory hišće na to čakachu, zo so młodźata z jejkow wudypaja. Poslednja kontrola kónc meje wunjese, zo sydaše tam pjeć žónkow, a widźeć bě hač do dźesać młodźatow. Tónle wuspěch bě jenož móžny, dokelž bě ratar Ralf Hentzschel kibutam polo přewostajił. Dalši partnerojo běchu mjenowane towarstwo a delni zarjad za přirodoškit Budyskeho wokrjesa. Na te wašnje móžachu ptački dwaj hektaraj njewobdźěłaneje role wužiwać, na kotrejž běchu niska wegetacija a dwě wulkej pólnej łuži.
Ponowja syć tramwajkow
Krótkopowěsće (24.06.21)
Zaso do Čěskeje bjez testa
Budyšin/Zhorjelc. Jězby z Němskeje do Čěskeje su wot předwčerawšeje wutory zaso bjez online-přizjewjenja, testa abo karanteny korony dla móžne. Na to skedźbnja Budyski krajnoradny zarjad. We wokrjesu Budyšin njebě wčera žane dalše natyknjenje, incidencna hódnota po RKI je tu dźensa 1,3. Wokrjes Zhorjelc rozprawješe wčera wo dwěmaj infekcijomaj. Tamniša incidenca po RKI wučinja dale 4,7.
Mjenje dźěławych
Kamjenc. Ličba dźěławych w Sakskej je lětsa w prěnim kwartalu porno samsnemu časej loni wo 1,4 procenty woteběrała. Přičina předewšěm je mjenje samostatnych kaž tež dźěłopřijimarkow a -přijimarjow ze snadnuškej mzdu, kaž Kamjenski statistiski krajny zarjad dźensa informuje. W Němskej wučinja spad w samsnej dobje 1,6 procentow.
„Łužiska chorownja“ zawěsćena
Na swjatojanske čitanje
Horni Hajnk. Jutře, štwórtk, na swjatoh Jana w 20 hodź. wotměje so w Hornim Hajnku na zahrodźe za domom Jurja Brězana wosebite čitanje. Awtorojo předstaja swoje teksty z literarneje zběrki „Susodźa“, kotruž je Ingrid Juršikowa w Ludowym nakładnistwje Domowina wudała. Na zahrodźe budźe městno za něhdźe połsta zajimcow. Čitać budu Beno Budar a jeho wnučk Filip, Měrka Mětowa, Lydija Maćijowa a Měrana Cušcyna. Zajimcy, kotřiž su hižo wot 19 hodź. witani, njech sebi mały piknik sobu přinjesu. Napitki budu tam na předań.
Zaso přistupnej
Budyšin. Čitarnja Serbskeje centralneje biblioteki kaž tež Serbski kulturny archiw stej po tuchwilu płaćiwych zakonskich postajenjach zaso wotewrjenej. Zajimcy njech přizjewja so telefonisce pod čisłom 03591 /4972-0 abo sćelu mejlku na . Sobu přinjesć měli čitarjo dopokaz dospołneho šćěpjenja na covid-19, dopokaz wustrowjenja, nic starši hač šěsć měsacow, abo negatiwny koronatest. Wupožčenje resp. wróćenje medijow wotměwa so dale w zachodnej rumnosći Serbskeho instituta, tak zo je čitarnja jeničce za rešeršowe dźěło a studij literatury wužiwajomna.
Informacije wo sejmje njepřate
Njebjelčicy (SN/JaW). Gmejnska rada Njebjelčicy měła sej po měnjenju někotrych jeje čłonow wjacore wobzamknjenja ze zašłosće znowa wobhladać a rozsudźić, hač su hišće načasne abo nic. To wujewi so na posedźenju gremija minjeny štwórtk.
Pozadk je, zo je wjesnjanosta Tomaš Čornak (CDU) pod dypkom 10 dnjoweho porjada „informacije wjesnjanosty“ radźićelow na aktualne zdźělenki Serbskeho sejma, kotrež jim gmejna w podłožkach za posedźenja sobu podawa, skedźbnił. Radźićelej Tomaš Kral a Daniel Möller zwurazništaj, zo nochcetaj to hižo w podłožkach měć. „To je brojenje papjery“. Wjesnjanosta pak na tym wobstawa informacije Serbskeho sejma zamołwitym gmejny w podłožkach spřistupnjeć. „Smy wobzamknyli, zo jako gmejna a gmejnska rada Serbski sejm podpěrujemy. Tohodla je tež trjeba čłonow gmejnskeje rady wo aktualnych podawkach a wuwićach sejma informować“, Tomaš Čornak podšmórny.
Policija (23.06.21)
Pakostnicy zwrěšćiłoj
Kamjenc. Na Saarskej w Kamjencu su wjacori kupcy póndźelu w předawanišću dwě padušnicy zadźerželi. Žonje běštej připołdnju napoł jednej spytałoj sej twory bjez zapłaćenja sobu wzać. 23lětna pjelnješe nakupowanski wóz z tworami w hódnoće 140 eurow a pakowaše je do dweju tobołow. Před wobchodom čakaše na nju 36lětna pomocnica, kotraž jej durje wočini. Jako jej sobudźěłaćerjo a pasanća narěčachu, pušćištej wonej tobole a spytaštej twochnyć. Policisća zwěsćichu pola młódšeje 0,3 promile alkohola. Po wšěm zdaću bě wona tež drogi brała.
W LIPje žony zaso sportuja
Chcedźa dróhu dale wjesć
Budyski wokrjes stara so wo trěbne planowanje
Hamor (AK/SN). Sprjewina dróha je najwažniši zwisk mjez Budyšinom, Hamorom a Slepom. Wokrjesnu dróhu K 8481/ K 9281 su wot apryla w třoch twarskich wotrězkach wot wotbočki do Sprjowjow hač k wotbočce na statnu dróhu S 130 do Mułkec saněrowali. Zhorjelski wokrjes jako zamołwity nošer K 8481 je dróhu sporjadkować dał. Budyski wokrjes jako zamołwity za K 9281 planuje – započinajo w Mułkecach – dalewjedźenje Sprjewineje dróhi do směra na Čornu Pumpu.
Hižo nětko za jutry wušiwali
Předstawy wo tym, kak maš křižerske sekle wušiwać, su dosć wšelakore. Zašły pjatk a sobotu su sej žony na dźěłarničce wuwědomili, zo słuša k tomu wjace hač jeničce wušiwanje.
Chrósćicy (SN/MiR). Projektowa koordinatorka Domowiny Rejzka Krügerowa witaše pjatk popołdnju na zetkanju w sydarni Chróšćanskeho gmejnskeho zarjada šěsć žonow, kotrež přinjesechu jara wšelake wuměnjenja nastupajo wušiwanje sobu. Někotre běchu hižo wušiwali, tamne scyła hišće nic. Tež we woblěkanju serbskeje narodneje drasty, hač swjedźenskeje abo družčeje, běchu někotre hižo nazhonite. Što nětko wabješe k tomu, so na kursu pod hesłom „Wušiwamy a wjazamy křižersku seklu“, kotryž bě Spěchowanski kruh za serbsku ludowu kulturu zarjadował, wobdźělić? Na jednym boku chcychu žony swojemu mandźelskemu abo synej spřihotować seklu za křižerskeho konja. Druhe zaso zajimowachu so za wšelake techniki wušiwanja.
Swoju wěru z hudźbu swjećić
Na młodźinski mision wusměrjene towarstwo Iniciatiwa wuchodny wětr 3000 – Wuhotowanje přichoda přez kulturu a zetkawanje zarjaduje třeći raz Gig-festiwal. Skrótšenka woznamjenja „God is good (Bóh je dobry)“ a pokazuje na to, zo jedna so wo „katolski hudźbny festiwal“, z kotrymž chcedźa „předewšěm młodźinje radosć a rjanosć wěry sposrědkować“.
Struppen/Róžant (SN/bn). Kaž w minjenych lětach wotměja festiwal na wjacorych putniskich městnach Němskeje. Spočatk julija stej to mjez druhim Siegen w Sewjerorynsko-Westfalskej a Marienfried w Bayerskej. Po lońšej přestawce smědźa so tež wšitcy łužiscy fanojo festiwala na nawrót tohole duchowneho hudźbneho swjedźenja pod hołym njebjom wjeselić. Sobotu, 10. julija, chcedźa mjezynarodni wuměłcy zhromadnje z wopytowarjemi hesło „Swjeć swoju wěru“ na łuce Róžeńčanskeje putniskeje cyrkwje zeskutkownić. Hinak hač w minjenych lětach pak njewotměja jón – znajmjeńša po nětčišim stawje – cyły kónc tydźenja, ale jenož jenički dźeń.
