Jako bywši Budyski wyši měšćanosta njeje Christian Schramm serbskim naležnosćam jenož přichileny był, ale je bikulturnosć sprjewineho města tež do swojich wysokich komunalnych funkcijow zapřijał. Jeho nastajenje njeje so hač do dźensnišeho změniło. Kaž wčera na swjatočnosći w Dźiwadle na hrodźe, spóznaješ to druhdy na „małych flosklach“. W swojich dźaknych słowach po spožčenju čestneho wobydlerstwa bě Christian Schramm prěni a jenički, kotryž witaše přitomnych němsce a zdobom serbsce „Dobry wječor!“. Žanej moderatorce, žanomu aktiwnemu wyšemu měšćanosće a tež žanomu lawdatorej njeje do myslow přišło, wosebitosće města dla, Serbow w publikumje w jich maćeršćinje postrowić. Poprawnu samozrozumliwosć zamołwići w druhich radnicach serbskeho sydlenskeho ruma jako wuraz runoprawnosće prosće wobkedźbuja. Škoda, zo njejsu organizatorojo z Budyskeje radnicy „mału dwurěčnu flo­sklu“ wčera za trěbnu měli. Axel Arlt

Budyšin (SN/at). Štwórć lětstotka bě Christian Schramm měšćanosta, potom wyši měšćanosta Budyšina. Z jeho mjenom je rozkćěw města po towaršnostnym přewróće zwjazany. Jako hłowa komuny ma wón zasłužby. Toho­dla je skupina wobydlerjow, mjez nimi dr. Ines Kellerowa a Jan Budar, namjetowała, Christianej Schrammej čestne wobydlerstwo spožčić. Měšćanska rada bě namjetej přihłosowała. Wčera wotmě so swjatočnosć w Dźiwadle na hrodźe.

Wyši měšćanosta Alexander Ahrens (SPD) wobkrući swojemu předchadnikej „njetypiske za mějićela zastojnstwa: wón rady w srjedźišću njesteji.“ Swoje připó­znaće wupraji mandźelskej Sabinje Schramm, kotraž jeho jara podpěrowaše. Fotowa pokazka wołaše wokomiki ze skutkowanja Christiana Schramma do pomjatka. Lawdator, wjelelětny financny měšćanosta Michael Böhmer, so jemu dźakowaše. Wón wobswětli žiwjenje a skutkowanje počesćeneho a pokaza z widom přitomnosće na přiběrace polarizowanje w towaršnosći. „Zacpěće demokratiskich institucijow je do towaršnosće kmane“, Böhmer skonstatowa.

Mały Muk so rozžohnował

Budyšin. Serbske dźěćace dźiwadło při NSLDź je wčera jědnaty a zdobom posledni raz swoju inscenaciju „Mały Muk“ po přełožku Dorotheje Šołćiny hrało. Dohromady je sej hru 1 275 šulerjow a pěstowarskich dźěći z Chrósćic, Ralbic, Worklec, Pančic-Kukowa a Budyšina wobhladało. 2. oktobra wotměja w NSLDź casting, na kotrymž pytaja nowych hrajerjow za přichodnu hru.

Na naprašowanju so wobdźělić

Budyšin. Dźěłarnistwo rjedźerjow IG BAU namołwja něhdźe 1 470 rjedźerjow a rjedźerki Budyskeho wokrjesa so na po cyłej Němskej zahajenym internetnym naprašowanju wobdźělić. Dźe wo to wuslědźić, štó a hdźe su přeńdźenja dźěłowych wuměnjenjow. Ramikowe zrěčenje je wupowědźene. Mnozy dźěłodawarjo spytaja tuž dźěłowe zrěčenja změnić.

Zarjadowanje tež w Zhorjelcu

Hermanecy (SN). Z „oktoberskim swjedźenjom“ spominaja Hermanecy wot 19. do 22. septembra na swoje 600lětne wobstaće. W lěće 1419 bu wjes přez knježka Metzradta prěni króć naspomnjena. Ze škotowanjom a blidotenisom štyri dny trajacy jubilejny swjedźeń zahaja. Młodźinska wohnjowa wobora organizuje pjatk, 20. septembra, w 16.30 hodź. přezpólnu hru, na kotrejž so tež dorosćacy wobornicy z Bjedrichec, Šćeńcy, Běłeho Chołmca, Kulowa, Rakec a Minakała wobdźěla. Njedźelu budźe přez cyły dźeń dźěćacy swjedźeń. Wotewrjena je wot 10 do 12 hodź. domizniska stwa.

Konstituowanje rady

Worklecy (SN). Worklečenjo a dalši zajimcy su jutře, štwórtk, w 19.30 hodź. do tamnišeje wyšeje šule na zjawnu konstituowacu zhromadźiznu gmejnskeje rady přeprošeni. Po zawjazanju gmejnskich radźićelow slěduja nimo twarskich naležnosćow a k tomu słušacych próstwach wo stejišća tež informacije wjesnjanosty. Zdobom maja přitomni hosćo přiležnosć so naprašować.

Worjołej a sowje přihladować